އަންނަ ޖުލައި މަހު، އަކްޝޭ ކުމާރް “ބެލް ބޮޓޮމް” ގެ ޝޫޓިންއަށް ލަންޑަނަށް ފުރާނެކަމަށް ޚަބަރުތައް ބުނެފިއެވެ.
ކާސްޓުންނާއި ބެހޭ މާގިނަ މަޢުލޫމާތުތަކެއް ހާމަކޮށްފައިނުވާ މި ފިލްމަކީ ޙަޤީޤީ ހާދިސާއެއްގެ މައްޗަށް ބިނާކޮށް އުފައްދާ ފިލްމެއްކަމަށް އަކްޝޭ ބުނެފައިވެއެވެ. ރަންޖީތު ތިވާރީ ޑައިރެކްޓްކުރާ މި ފިލްމުގެ ސްކްރީންޕްލޭ ލިޔެފައިވަނީ އަސީމް އަރޯރާއާއި ޕަރްވޭޒްއެވެ. ނިކިލް އަދުވާނީއާއި ވަޝޫ ބަގްނާނީ ޕްރޮޑިއުސްކުރާ މި ޕީރިއަޑް ތުރިލާ ރިލީޒް ކުރުމަށް ނިންމާފައިވަނީ އަންނަ އަހަރުގެ ޖެނުއަރީ މަހުގެ 22 ގައެވެ.
“ބެލް ބޮޓޮމް”ގެ އިތުރަށްވެސް އަކްޝޭގެ ގިނަ ފިލްމުތަކެއް ކުރިއަށް އެބަހުއްޓެވެ. އޭގެ ތެރޭގައި ރޯހިތު ޝެޓީގެ “ސޫރިޔަވަންޝީ”، ރަގަވާ ލައުރެންސްގެ “ލަކްސްމީ ބޮމްބް”، ޔަޝް ރާޖް ފިލްމްސްގެ “ޕްރިތުވިރާޖް” އަދި އާނަންދު އެލް ރާއީގެ “އަތުރަންގީ ރޭ” ހިމެނެއެވެ.
