ޤައުމީ ކުތުބުޚާނާއަށް 75 އަހަރު ފުރުމުގެ މުނާސަބަތުގައި “މޭކަރސްޕޭސް”ގެ ނަމުގައި ޚާއްސަ ޕްރޮގްރާމެއް އިފްތިތާޙުކޮށްފިއެވެ.

މި ޕްރޮގްރާމަކީ ޤައުމީ ކުތުބުޚާނާއަށް 75 އަހަރު ފުރުމުގެ މުނާސަބަތާއި ގުޅިގެން ކުޑަކުދިންނަކީ ތަފާތު ހުނަރުތައް ލިބިގެންވާ ބަޔަކަށް ހެދުމުގެ މަޤްޞަދުގައި ފެށި ޕްރޮގްރާމެކެވެ.

“މޭކަރސްޕޭސް” ޕްރޮގްރާމް އިފްތިތާޙުކޮށްފައިވާއިރު، މި ޕްރޮގްރާމުގެ ޙަރަކާތްތައް ހިންގުމުގައި އެހީވުމަށް ޤައުމީ ކުތުބުޚާނާއިން ސްޓެމް ސްޕޭސްއާއެކު ފަޙުމު ނާމާއެއްގައި ވަނީ ސޮއިކޮށްފައެވެ.

ބުރާސްފަތި ދުވަހު ޤައުމީ ކުތުބުޚާނާގައި އޮތް ރަސްމިއްޔާތެއްގައި މި ފަހުމުނާމާގައި ޤައުމީ ކުތުބުޚާނާގެ ފަރާތުން ސޮއިކުރެއްވީ ފަންނާއި ސަގާފަތާއި ތަރިކައިގެ ވަޒީރުގެ ނައިބު އަޙުމަދު މުޙުސިންއެވެ. އަދި މި ފަހުމުނާމާގައި ސްޓޭމް ސްޕޭސްގެ ފަރާތުން ސޮއިކުރެއްވީ ސްޓެމް ސްޕޭސްގެ ފައުންޑަރ އަދި ސީއީއޯ ޑރ. އިބްރާހިމް ލަޠީފްއެވެ.

މިއަދު ވެވުނު ފަހުމުނާމާގެ ދަށުން ސްޓެމް ސްޕޭސްގެ އެހީތެރިކަމާއިއެކު ޤައުމީ ކުތުބުޚާނާގައި މި ޕްރޮގްރާމް ކުރިއަށްގެންދާނީ އެއް އަހަރުދުވަހުގެ މުއްދަތަށެވެ. އެއަށްފަހުވެސް މި ޕްރޮގްރާމް ޤައުމީ ކުތުބުޚާނާގައި ކުރިއަށް ގެންދިއުމަށް ވަނީ ރޭވިފައެވެ.

މޭކަރސްޕޭސްއަކީ އެކި ވައްތަރުގެ އާލާތްތަކާއި ތިމާއަށް ލިބިފައިވާ ޢިލްމެއް އަދި ބިނާކުރަނިވި ޚިޔާލު އެހެން ފަރާތްތަކާއި ހިއްސާކުރުމަށް ދެވިފައިވާ ތަނެއް ނުވަތަ ޖާގައެކެވެ. ޤައުމީ ކުތުބުޚާނާ އަދި ކުޑަކުދިންގެ މަލްޓިމީޑިއާ ލައިބްރަރީގައި ތަފާތު އުމުފުރައަށް ފަރުމާކުރެވިގެން މޭކަރސްޕޭސްގެ ހަތަކާތްތައް ހިންގުމަށް ވަނީ ހަމަޖެހިފައެވެ.

މި ޕްރޮގްރާމްގެ މައިގަނޑު ބޭނުމަކީ ކުދިންގެ ފަންނީ ހުނަރު އާލާކޮށް، ތަފާތު ނަޒަރިއްޔާތުތަކުން ވިސްނައިގެން ކަންކަމަށް ޙައްލު ހޯދަން ދަންނަ، އިޖާދީ މުޖުތަމައުއެއް ބިނާކުރުމެވެ.

މި ރަސްމިއްޔާތުގައި ހެރިޓޭޖް މިނިސްޓްރީގެ ނައިބު އަޙުމަދު މުޙުސިން ވިދާޅުވީ މިނިސްޓްރީގެ އުއްމީދަކީ ކުތުބުޚާނާއަކީ ހަމައެކަނި ފޮތް ކިޔުމާއި މަޢުލޫމާތު ފޯރުކޮށްދޭ ތަނެއްގެ އިތުރުން ހުނަރުތައް ތަރައްޤީ ކުރާ ތަނަކަށް ހެދުންކަމަށެވެ.

“އަޅުގަނޑުމެންގެ އުއްމީދަކީ ލައިބްރަރީއަކީ ފޮތް ކިޔަން ހުންނަ ތަނަކަށް ހެދުމުގެ ބަދަލުގައި ތަފާތު މަޢުލޫމާތު ފޯރުކޮށްދިނުމުގެ އިތުރުން ހުނަރުވެސް ކުދިންނަށް ދަސްކޮށްދޭ ތަނަކަށް ހެދުން. މިއީ އެކަމުގެ ފެށުމެއް. އިރާދަކުރެއްވިއްޔާ ކުރިޔަށް އޮތް ތަނުގައި ރަނގަޅު ކުރިމަގެއް ބިނާކުރެވޭނެ.” މުޙުސިން ވިދާޅުވިއެވެ.

ސްޓެމް ސްޕޭސްގެ ސީއީއޯ ޑރ. އިބްރާހިމް ލަޠީފް ވިދާޅުވީ މިހަރަކާތްތަކުގެ ތެރެއިން މައިގަނޑުގޮތެއްގައި ކުރިޔަށްދާނީ އެވަޤުތަކު ލިބެން ހުރި ތަކެތި ބޭނުންކޮށްގެން ހައްލު ހޯދުމުގެ ހަރަކާތްތަކެއް ކަމަށެވެ.

“މޭކަރސް ސްޕޭސްއަކީ ޙަޤީޤަތުގައި ޓެކްނޮލޮޖީއާއި މުޖުތަމަޢުގައި ހުންނަ އެހެނިހެން މަޞީލަތްތައް ބޭނުންކޮށްގެން ޙައްލުތައް ނެރުން. އެންމެ ބޮޑު އިސްކަމެއްދީގެން ކުރިޔަށްދާނީ އެއިރެއްގައި ލިބެން ހުންނަ ވަޞީލަތްތަކުން ހައްލު ހޯދުމުގެ ހުނަރު ތަރައްޤީ ކުރުމުގެ ޙަރަކާތްތައް. ފުންކޮށް ވިސްނައި އަމިއްލައަށް ހައްލު ހޯދުމުގެ ހުނަރާއި ދެބައި ކުރިޔަށްދާނެ.” ޑރ. އިބްރާހިމް ލަޠީފް ވިދާޅުވިއެވެ.

ލިޔުންތެރިޔާގެ ފުރަމަލަ

އަޙްމަދު ރަޝީދު
އަޙްމަދު ރަޝީދު
ހުރިހައި ދާއިރާއެއްގެ ލިޔުންތައްވެސް މުނިއަވަސްގެ ފައުންޑަރ އަދި ޗީފް އެޑިޓަރ ލިޔާނެއެވެ.