މިއަދުގެ ވާދަވެރި މަސައްކަތުގެ މާހައުލަކީ ހަމައެކަނި އުފެއްދުންތެރިކަމާއި ކުރިއެރުމަށް މަސައްކަތްކުރާ ތަނެއް ނޫނެވެ. އެއީ އިންސާނީ އިހުސާސްތަކާއި، ކިބުރުވެރިކަމާއި، ނުތަނަވަސްކަން އެކުލެވިގެންވާ ތަނެއްވެސް މެއެވެ. އޮފީސްތަކާއި އެކި މުއައްސަސާތަކުގައި މަސައްކަތްކުރާއިރު، ވާދަވެރިކަމާއި، ހަސަދަވެރިކަމާއި، ދޭތެރެޖެއްސުމާއި، ތަފާތު ކުރުމާއި އަދި ކެރިއަރުގައި ކުރިއަށްދިއުމަށް ކުރާ ހަނގުރާމައަކީ ކޮންމެ ދުވަހަކު ކުރިމަތިލާންޖެހޭ ކަންކަމެވެ. މި ގޮންޖެހުންތަކުން އަރައިގަނެ، އެކަންކަން އަމިއްލަ ނަފްސުގެ ކުރިއެރުމަކަށް ބަދަލުކުރުމަކީ ހަމައެކަނި ވަޒީފާގެ ކުރިއެރުމަށް މުހިންމު ކަމެއް ނޫނެވެ. އެއީ ނަފްސާނީ ހަމަޖެހުމާއި އަޚްލާގީ ސިފަތައް ވަރުގަދަކުރުމަށްވެސް ކޮންމެހެން ބޭނުންތެރި ކަމެކެވެ.
މަސައްކަތުގެ މާހައުލުގެ ހަގީގަތް:
ވާދަވެރިކަމަކީ އޭގެ ޒާތުގައި ގޯސް ކަމެއް ނޫނެވެ. ރަނގަޅު ގޮތުގައި ކުރެވޭ ވާދަވެރިކަމުގެ ސަބަބުން މީހާގެ ހުނަރުތައް ތަރައްގީވެ، މަސައްކަތުގެ ފެންވަރު ރަނގަޅުވެއެވެ. ނަމަވެސް، މި ވާދަވެރިކަން ހަސަދަވެރިކަމަށް ބަދަލުވެ، އެހެން މީހުން ދަށްކޮށްލުމުގެ ރޫހެއް އުފެދުމުން، އެތަނެއްގައި ނޭދެވޭ ކަންކަން ހިނގަން ފަށައެވެ. ދޭތެރެޖެއްސުމާއި، ބޭކާރު ވާހަކަ ދެއްކުމާއި، އަދި އެކަކު އަނެކަކަށް ޖެއްސުންކުރުމަކީ މީގެ ނަތީޖާއެވެ. މީގެ ސަބަބުން ޓީމެއްގެ ގޮތުގައި ކުރާ މަސައްކަތަށް ބުރޫއަރައި، މަސައްކަތުގެ މާހައުލަކީ ބިރުވެރި، ނުތަނަވަސް ތަނަކަށް ބަދަލުވެއެވެ. މީގެ ސަބަބުން ގިނަ ބަޔަކަށް ނަފްސާނީ ބަލިމަޑުކަމާއި، މަސައްކަތަށް އޮންނަ ޝައުގުވެރިކަން ކުޑަވުން ފަދަ ކަންކަން ކުރިމަތިވެއެވެ.
އިސްލާމީ ނަޒަރަކުން ބަލާއިރު:
އިސްލާމްދީން އަޅުގަނޑުމެންނަށް އުނގަންނައިދެނީ ދިރިއުޅުމުގައި ދިމާވާ ކޮންމެ ކަމަކީވެސް އިމްތިހާނެއް ކަމެވެ. މަސައްކަތުގެ މާހައުލަކީވެސް މީގެ ތެރެއިން ހިމެނޭ ތަނެކެވެ. ރިޒްގާއި، މަގާމާއި، އަދި ކާމިޔާބީއަކީ ހަމައެކަނި ﷲ ތަޢާލާގެ ހަޟްރަތުން މިންވަރުކުރައްވާ ކަންކަންކަން އަޅުގަނޑުމެން ގަބޫލުކުރަންޖެހެއެވެ. ހަސަދަވެރިވުމާއި، ދޭތެރެ ޖެހޭގޮތަށް ވާހަކަދެއްކުމަކީ އިސްލާމްދީނުގައި ނަހީކުރައްވާފައިވާ ކަންކަމެވެ. ރަސޫލާ ﷺ އިރުޝާދު ދެއްވާފައިވަނީ ތެދުވެރިކަމާއި، އަމާނާތްތެރިކަމާއި، އަދި ރީތި އަޚްލާގުގެ މައްޗަށެވެ. ހަގީގީ ކާމިޔާބީއަކީ ދުނިޔަވީ މަގާމެއް ނޫނެވެ. އެއީ ތަގުވާވެރިކަމާއި ސާފު ހިތެކެވެ. މިގޮތަށް ވިސްނުން ބަހައްޓައިފިނަމަ، މަސައްކަތުގެ މާހައުލުގައި ދިމާވާ ގޮންޖެހުންތަކަކީ ކެތްތެރިކަމާއި ހިކުމަތްތެރިކަން އިތުރުކުރުމަށް ލިބޭ ފުރުސަތުތަކެއްގެ ގޮތުގައި ފެންނާނެއެވެ.
ކެތްތެރިކަމާއެކު އިޖާބަދިނުން:
މަސައްކަތުގެ މާހައުލުގައި ދިމާވާ މައްސަލަތަކުގައި އަމިއްލަ ނަފްސުގެ މައްޗަށް ބާރުފޯރުވުމަކީ އެންމެ ވަރުގަދަ ހަތިޔާރެވެ. ރުޅިވެރިކަމާއެކު ރައްދުދިނުމުގެ ބަދަލުގައި، ކެތްތެރިކަމާއެކު ހިމޭނުން ހުރުމަކީ ބައެއް ފަހަރު މާ ނަތީޖާ ރަނގަޅު ކަމެކެވެ. ކޮންމެ ފާޑުކިޔުމަކަށް ރައްދުދޭކަށް ނުޖެހެއެވެ. އިސްލާމްދީން ބާރުއަޅަނީ ނުބައިކަމަށް ހެޔޮކަމުން ރައްދުދިނުމަށެވެ. މިއީ އަނިޔާއަށް ދޫދިނުމެއް ނޫނެވެ. އެކަމަކު، އަދަބުވެރިކަމާއި، ފަންނީ މިންގަނޑުތަކުގެ ތެރެއިން މައްސަލަތައް ހައްލުކުރުމެވެ.
ނޭދެވޭ ކަންކަން ކުރިއެރުމަކަށް ބަދަލުކުރުން
އެހެން މީހުންގެ ހަސަދަވެރިކަމަށް ވިސްނައި ވަގުތު ބޭކާރުކުރުމުގެ ބަދަލުގައި، އަމިއްލަ ހުނަރުތައް ތަރައްގީކުރުމަށް ސަމާލުކަން ދޭންޖެހެއެވެ. ތިމާ ކުރާ މަސައްކަތުގެ ފެންވަރު ރަނގަޅުކޮށް، އިޚްލާޞްތެރިކަމާއެކު މަސައްކަތުގައި ދެމިހުރުމަކީ ދިމާވާ ނޭދެވޭ ކަންކަމަށް ދެވޭ އެންމެ ރަނގަޅު ރައްދެވެ. މީގެ އިތުރުން، ދުޢާކުރުމާއި ﷲ އަށް ވަކީލުކުރުމަކީ ހިތަށް ހަމަޖެހުން ލިބޭނެ ކަމެކެވެ. ނިޔަތް ސާފުކޮށްގެން ކުރާ މަސައްކަތުގައި ބަރަކާތް ލައްވާނެއެވެ.
މަސައްކަތުގެ މާހައުލުގައި މައްސަލަތައް ދިމާވުމަކީ ގުދުރަތީ ކަމެކެވެ. ސަބަބަކީ އަޅުގަނޑުމެން މަސައްކަތްކުރަނީ އުނިސިފަތައް ހުންނަ އިންސާނުންނާއެކު ކަމަށްވާތީއެވެ. ނަމަވެސް، އިސްލާމީ ރިތި އުސޫލުތަކުގައި ހިފަހައްޓައިގެން، ކެތްތެރިކަމާއި ހިކުމަތްތެރިކަމާއެކު ކުރިއަށްދާ މީހާއަށް ނޭދެވޭ ކޮންމެ ކަމަކީވެސް ކުރިއެރުމަށް ލިބޭ ހަރުފަތަކަށް ހެދިދާނެއެވެ. މަގާމުތަކާއި ލަގަބުތަކަކީ ފަނާވެދާނެ އެއްޗެކެވެ. އެކަމަކު ރީތި އަޚްލާގާއި، ސާފު ނަމާއި، އަދި ހަމަޖެހޭ ހިތަކީ އަބަދަށް ދެމިގެންވާނެ ކާމިޔާބީއެވެ. މައްސަލަތަކުން ފިލާވަޅު ލިބިގަނެ، އެކަންކަން ކުރިއެރުމަކަށް ބަދަލުކުރުމަކީ ހަމައެކަނި ފަންނީ ހުނަރެއް ނޫނެވެ. އެއީ މަތިވެރި އަޅުކަމެއްވެސް މެއެވެ.
