މި ނިމުނު 2025 ޑިސެމްބަރު މަހުގެ 23 ވަނަ ދުވަހަކީ ދިވެހި މިއުޒިކީ ފަންނާނު އިބްރާހީމް ސިރާ ވަޙީދުގެ ފަންނީ ދަތުރަށް 15 އަހަރު ފުރުނު ތާރީޚީ މުނާސަބަތެވެ. 2010 ވަނަ އަހަރު ބޭންޑެއްގެ ޑްރަމަރެއްގެ ގޮތުގައި ފެށި މި ދަތުރަކީ، ކެތްތެރިކަމާއި، ކުރިއެރުމާއި، އަދި އަމިއްލަވަންތަ މިއުޒިކެއް އުފެއްދުމަށް ކުރި ބުރަ މަސައްކަތުގެ ނަތީޖާއެވެ.
15 އަހަރަށްފަހު، ސިރާ މިހާރު ފާހަގަކުރުމަށް ތައްޔާރުވަމުން ދަނީ ހަމައެކަނި ދާއިރާގައި ހޭދަކުރި ދިގު މުއްދަތެއް ނޫނެވެ. ސިރާ މިއަދު މި އުފާ ފާހަގަކުރަނީ އޭނާގެ ފުރަތަމަ އަމިއްލަ އަލްބަމް “ގިނި” ނެރުމަށެވެ. މިއީ ސިރާގެ ފަންނީ ތަޞައްވުރާއި ދިވެހި މިއުޒިކާމެދު ދެކޭ ހުވަފެންތައް ރަމްޒުކޮށްދޭ މަސައްކަތެކެވެ.
ޑްރަމް ކުޅުމުން ފެށުނު: މިއުޒިކީ ދަތުރު
ސިރާ ރަސްމީކޮށް މިއުޒިކީ ދާއިރާއަށް ވަދެފައިވަނީ 23 ޑިސެމްބަރު 2010 ގައެވެ. އެއީ ‘އިލްސައިޓް’ ބޭންޑުގެ ޑްރަމަރެއްގެ ގޮތުގައެވެ. އެއަށްފަހު ސިރާގެ ހުނަރު އިތުރަށް ތަރައްޤީކުރުމަށްޓަކައި އަވަށްޓެރި ސްރީލަންކާއަށް ދިރިއުޅުން ބަދަލުކޮށް، އެ ގައުމުގެ ތިން މިއުޒިކީ ފަންނާނުންނާއެކު ‘ސައިލެންޓް ތިއަރީ’ ގެ ނަމުގައި ބޭންޑެއް އުފެއްދިއެވެ. އެތަނުގައި ހޭދަކުރި ދެ އަހަރަކީ މިއުޒިކީ ތަޖުރިބާ މުއްސަނދިވެ، އަޚްލާޤީ ގޮތުންނާއި ފަންނީ ގޮތުން ބޮޑެތި ކުރިއެރުންތަކެއް ލިބުނު ދުވަސްތަކެކެވެ.
އެނބުރި ރާއްޖެއަށް އައިސް ‘ވެލްވެޓް ފްލޭމްސް’ ބޭންޑް އުފައްދާ، ގާތްގަނޑަކަށް ތިން އަހަރު އެ ބޭންޑުގައި މަސައްކަތް ކުރިއަށް ގެންދިޔައެވެ. މިއީ ހަމައެކަނި ފަންނާނެއްގެ ގޮތުގައި ނޫން، ކިޔަވައިދޭ މުދައްރިސެއްގެ ގޮތުގައިވެސް ސިރާ ފާހަގަވާން ފެށި ދުވަސްވަރެވެ.
އުނގަންނައިދިނުން: ‘ޓައިމް’ މިއުޒިކް ސްކޫލާއި ތަމްރީނު
ސިރާ ވަނީ ޝާޒް، އާމިރު އަދި ޝިޔާރުއާ ގުޅިގެން ‘ޓައިމް’ގެ ނަމުގައި މިއުޒިކް ސްކޫލެއް އުފައްދާފައެވެ. އެތަނުގައި ވޯކަލް، ޑްރަމް އަދި ގިޓާ ކުޅެން ދަސްކޮށްދިނެވެ. މިއީ މިއުޒިކް ކުޅުމުގެ އިތުރުން، ދިވެހި މިއުޒިކީ ޖީލެއް ބިނާކުރުމަށް ފެށި މުހިންމު މަސައްކަތެކެވެ. އޭގެ ފަހުން އެމް.އެމް.އޭ.ސީ (MMAC) ގައި ވެސް ޑްރަމް އަދި ވޯކަލް ޓްރޭނަރެއްގެ ގޮތުގައި ޚިދުމަތް ކުރިއެވެ.
ސްޓޭޖު މަތީގައި: މެދުނުކެނޑި ކުރިއަށް
ސިރާގެ މިއުޒިކީ ހަޔާތުގައި ‘ޓައިރިނަސައިޑް’ ބޭންޑުގެ ލަވަކިޔުންތެރިއެއްގެ ގޮތުގައި އަހަރެއްހާ ދުވަހު މަސައްކަތް ކުރުމަށްފަހު، މިހާރު ހަރަކާތްތެރިވަނީ ‘ދަ ފްލޭމްސް’ ބޭންޑުގެ ސޯލޯ ލަވަކިޔުންތެރިއެއްގެ ގޮތުގައެވެ. ކޮންމެ ބޭންޑަކުން ލިބުނު ތަޖުރިބާއަކީ އޭނާގެ އަޑާއި، މިއުޒިކީ ދާއިރާގައި ދިމާވާ ގޮންޖެހުންތަކަށް ހޭނުމަށް ލިބުނު ބޮޑު ފިލާވަޅެކެވެ.
‘ގިނި’: ރޫޙާއި އިޙްސާސްތަކުން ފުރިފައިވާ އަލްބަމެއް
15 އަހަރުގެ މިއުޒިކީ ހަޔާތާ ދިމާކޮށް ނެރޭ “ގިނި” އަލްބަމްގައި ހިމެނެނީ ސިރާ އަމިއްލައަށް ލިޔެ، ރާގު ހަދައި، ރެކޯޑުކޮށްފައިވާ ހަތް ލަވައެވެ. މިއީ ޚިޔާލީ ވާހަކައެއްގެ މައްޗަށް ބިނާކޮށްފައިވާ އަލްބަމެކެވެ. އުފާވެރި ދިރިއުޅުމެއް ފަށާ ދެމަފިރިއަކަށް ދިމާވާ ހިތްދަތި ކަންތައްތަކާއި، ބޭވަފާތެރިކަމާއި، އަދި އެ ހިތްދަތިކަމުން އަރައިގަނެ އާ ފެށުމަކުން ފަށާ ގޮތް މި ލަވަތަކުން ކިޔައިދެއެވެ.
މި އަލްބަމްގެ ކޮންމެ ލަވައަކީ ތަފާތު ރާގުތަކާއި އިޙްސާސްތައް އެކުލެވޭ މަސައްކަތެކެވެ. ސިރާ ބޭނުންވަނީ ދިވެހި ފަންނާނުން ކޮޕީ މިއުޒިކަށްވުރެ ބޮޑަށް އަމިއްލަ އުފެއްދުންތަކަށް އިސްކަންދިނުމަށެވެ.
ފުރަތަމަ ލަވަ: ‘ރާނީ’
އަލްބަމްގެ ފުރަތަމަ ލަވަ “ރާނީ” ރިލީޒްކުރުމަށް ހަމަޖެހިފައިވަނީ ފެބްރުއަރީ 14 (ލޯބިވެރިންގެ ދުވަސް) ގައެވެ. މި ލަވައިގެ ޚާއްޞަ ކަމަކީ ސިރާގެ ބޮޑުބޭބެގެ ދަރިއެއް ކަމަށްވާ ނަތާއާއެކު ކިޔާފައިވާ ޑުއެޓް ލަވައަކަށް ވުމެވެ. މިއީ ނަތާގެ ފުރަތަމަ މިއުޒިކީ މަސައްކަތެވެ.
އަޅުގނޑުގެ ކުޑައިރުގެ ރަޙްމަތްތެރިއެއްގެ ހައިސިއްޔަތުން ސިރާއާ ކުރެވުނު ސުވާލުތަކުގެ ތެރެއިން، އެންމެ ފަޚުރުވެރިވި ހަނދާނުން ފިލުވާލަންދަތި ހަނދާނަކީ ކޮބައިތޯ އެހުމުން ބުނީ:
“އަހަރެން އެންމެ ފަޚުރުވެރިވި އުފާވި ވަގުތަކީ، އަހަރެންގެ ދަރިފުޅު ސްކޫލްތަކުގެ ލަވަކިޔުމުގެ މުބާރާތެއްގައި އަހަރެން އަމިއްލައަށް ހެދި ލަވައެއް ކިޔައިދިން ދުވަސް،”
މިއީ އެންމެ ބޮޑެތި ސްޓޭޖުތަކަށްވުރެ އަމިއްލަ ދިރިއުޅުމުގެ ކާމިޔާބީ މާ މުހިންމުކަން ހާމަކޮށްދޭ ކަމެކެވެ.
“މިއުޒިކީ ދާއިރާއަށް ބަދަލެއް ގެނައުމުގެ ބާރާއި ނުފޫޒު ލިބިއްޖެނަމަ ބޭނުންވަނީ، މިއުޒިކީ ފަންނާނުންނަށް ހަމައެކަނި ރިސޯޓުތަކަށް ބަރޯސާނުވެ، މާލެ ފަދަ ސިޓީތަކުގައި ހުންނަ ‘މިއުޒިކް އެރީނާ’ ތަކުގައި އަމިއްލައަށް ފައިސާ ހޯދޭނެ މަގުތަކެއް ފަހިކޮށްދިނުމަށް.”
ރާއްޖޭގެ މިއުޒިކީ ދާއިރާއަށް ސިރާގެ އުއްމީދުތައް ހުރީ ހަމައެކަނި އޭނާއާއި ހަމައިގައި ނޫންކަމާ، ދާއިރާއަށް އޭނާގެ ލޯބި އޮތް މިންވަރު އޭނާގެ ވާހަތަކުން ވަރަށް ބޮޑަށް ސާފެވެ.
“ލަވަކިއުމުގެ ދާއިރާއަށް އަލަށް ނުކުންނަ ފަންނާނުންނަށް އަޅުގަނޑު ކުރާ އިލްތިމާސަކީ، އެހެން މީހުންގެ އަޑު ނަކަލުކުރުމުގެ ބަދަލުގައި، އަމިއްލަ ވަންތަ އަޑަކުން ލަވަކިއުމަށް އިސްކަންދިނުމަށް. އަބަދުވެސް ތިމާގެ އަމިއްލަ އުފެއްދުންތެރިކަން ކުރިއަރުވައި، އަމިއްލަ ގޮތް ގެންގުޅުމަކީ ވަރަށް މުހިންމު ކަމެއް.”
ސިރާއަކީ ދިވެހި އަމިއްލަ އުފެއްދުންތައް މި ޤައުމުގެ މިއުޒިކީ ދާއިރާއިން ދުށުމަށް ވަރަށް ބޮޑަށް އެދޭ ފަންނާނެއްކަން އޭނާގެ ވާހަކަތަކުން އެނގިގެން ދިޔައެވެ.
“މީގެ އިތުރުން، ދިވެހި ފިލްމީ ސިނާއަތުގައި އުފައްދާ ފިލްމުތަކުގައި ކޮޕީ މިއުޒިކާއި ލަވަ ބޭނުންކުރުން އެއްކޮށް ހުއްޓާލައި، އަމިއްލަ ރާގުތަކާއި އުފެއްދުންތަކަށް ބަރޯސާވާ ދުވަހެއް ފެނުމަކީ އަޅުގަނޑުގެ ވަރަށް ބޮޑު އުންމީދެއް.”
ސިރާގެ މިއުޒިކީ ދަތުރުގައި އެންމެ ބޮޑަށް އެހީތެރިވި ފަރާތްތަކަކީ ތިއްތި (އަންތަރީސް)، ޝާޒް ސައީދު އަދި ގިޓާ އުމަރުކަން ސިރާ ފާހަގަކުރިއެވެ.
“މީގެ އިތުރުން ‘ވެލްވެޓް ފްލޭމްސް’ގެ މެނޭޖަރ އަދި އަހަރެންގެ އެންމެ ޅައިރުންސުރެން ބެސްޓްފްރެންޑް މުޙައްމަދު ހުސާމް އަބަދުވެސް އަހަންނަށް އެހީތެރިވެ މަގުދައްކައިދޭން އަހަންނާއެކު އަބަދުވެސް ހުންނަކަން ޝުކުރުވެރިކަމާއެކު ފާހަގަކޮށްލަން.”
ނަމަވެސް، އާ ފަންނާނުންގެ މަސައްކަތްތައް ބަލައިގަތުމުގައި ދިމާވާ ގޮންޖެހުންތަކާއި، ބޮޑެތި ޕްލެޓްފޯމްތަކުން އަބަދުވެސް މަޝްހޫރު މީހުންނަށް އިސްކަންދޭ ކަމުގެ ޝަކުވާ ސިރާ ފާޅުކުރިއެވެ.
ނިންމާލަމުން، އަހަރެން ކަހަލަ ލަވަކިޔަން ނޭނގޭ😄 މީހަކަށް ލަވަކިޔިދާނެތޯ އެހުމުން ސިރާ ބުނީ:
“ކޮންމެ މީހަކަށްވެސް ލަވަކިޔިދާނެ. ތަފާތަކީ ބައެއް މީހުންނަށް ދަސްކޮށްދޭން ފަސޭހަވުން، އަދި ބައެއް މީހުންނަށް އުނދަގޫވުން. އެއީ އެމީހެއްގެ ހިތްވަރާއި ސާބިތުކަމާ ގުޅިފައިވާ ކަމެއް،”
އިބްރާހީމް ސިރާ ވަޙީދުގެ 15 އަހަރުގެ މި ދަތުރަކީ ހަމައެކަނި މިއުޒިކް އަލްބަމެއް އުފަންކޮށްލުން އެކަންޏެއްނޫނެވެ. އެއީ ދިވެހި ފަންނުވެރިކަމަށް އޮތް ލޯތްބާއި ސާބިތުކަމުގެ ހެއްކެކެވެ. ސިރާއަށް އުޖާލާ މުސްތަޤުބަލަކަށް އެދެމުން، “ގިނި” އަލްބަމަށް ބޮޑު ކާމިޔާބީއަކަށް އެދެމެވެ. 🎶🔥
