މިރޭ ރައްޓެއްސަކު މާލެއަށް ފުރާތީ އޭނާއަށް ހަދިޔާއެއް ދިނުމަށްޓަކައި ބައެއް މޭވާގެ ބާވަތްތައް ފޮށިގަނޑަކަށް އަޅާއި ބަންދުކޮށްގެން ޗެކިން ކައުންޓަރަށް ގެންދިޔައިމެވެ. ބަރުދަން ބަލާ ކައްޓާއަށް ފޮށިގަނޑު ރަނގަޅަށް ނުވެސް އެރުވިގެން އުޅެނިކޮށް ތިއެއް ނުގެންދެވޭނޭ ބުނާ އަޑު އިވުނެވެ. ގްރައުންޑް ސްޓާފަކު މިހެން ބުނުމުންވެސް އަހަންނަށް އަދި ވިސްނައެއް ނުލެވުނެވެ. އަނެއްކާވެސް އެތަނުން އެހެން ސްޓާފެއް ހަމަ އެ ޖުމްލަ ތަކުރާރުކުރިއެވެ.

“އެބުނީ ތި ކެމިކަލް ހުސްކުރި ފޮށިގަނޑު ނުގެންދެވޭނޭ!” އެވަތު އެތަނުން އެހެން މީހަކު އޮޅުންފިލުވައިދިނެވެ.

ކުއްލިއަކަށް އަހަރެންގެ ހަނދާނަށް އައީ ތަންކޮޅެއް ކުރިން މިފަހަދަ މަންޒަރެއް އަހަންނަށް ފެނުނު ހަނދާނެކެވެ.

ޑަބަލިޔޫޕީސީ ކްލީނިން ސޮލްވެންޓް ހުސްކުރި ފޮށި، ލަށްފިލުވާ ހުސްކުރި ފޮށި އަދި ކްލީންކްލީން ކެމިކަލް ފަދަ ކެމިކަލްތައް ހުސްކޮށްފައި ހުންނަ ފޮށްޓަށް އެހެން އެއްޗެއް އަޅައިގެން ވިޔަސް، ވައިގެމަގުން ދަތުރުކުރާއިރު ނުގެންދެވޭ އުސޫލެއް އޮވެއެވެ. މިއީ ވަރަށް މުހިންމު ސަބަބުތަކަކަށްޓަކައި ކަނޑައަޅާފައިވާ އުސޫލެކެވެ.

ވައިގެ މަގުން ކުރާ ދަތުރުތަކަކީ އޭގެ ސަލާމަތާއި ރައްކާތެރިކަމަށްޓަކައި ވަރަށް ހަރުދަނާ އުސޫލުތަކަކާއި ގަވާއިދުތަކެއް ކަނޑައެޅިފައިވާ ދަތުރުތަކެކެވެ. އެއާޕޯޓްތަކުގެ ޗެކް-އިން ކައުންޓަރުތަކުން ފޮށިތަކާއި މުދާ ބަލައިގަތުމުގައި ގެންގުޅޭ އެންމެ މުހިންމު އެއް އުސޫލަކީ، ބޯޓަށާއި ފަސިންޖަރުންނަށް ނުރައްކާވެދާނެ އެއްވެސް އެއްޗެއް ދަތުރުމަތީގައި ނުބެހެއްޓުމެވެ. މިގޮތުން، ޑަބްލިޔު.ޕީ.ސީ ސޮލްވެންޓް ހުސް ބަލައިނުގަތުމަކީ ދަތުރުވެރިންނަށް ދިމާވާ ކަމެކެވެ. މީގެ ފަހަތުގައި އެތައް ސަބަބުތަކެއް އެކުލެވިގެންވެއެވެ.

އެންމެ ފުރަތަމަ ސަބަބަކީ، ބައިނަލްއަގުވާމީ ވައިގެ ދަތުރުފަތުރުގެ ޖަމިއްޔާ (IATA) އިން ކަނޑައަޅާފައިވާ “ޑޭންޖަރަސް ގުޑްސް” ނުވަތަ ނުރައްކާތެރި ތަކެތީގެ ގަވާއިދެވެ. ޑަބްލިޔު.ޕީ.ސީ ކްލީނަރުތަކަކީ އާންމުކޮށް އޭގެ ޒާތުގައި ޕްރެޝަރައިޒްޑް ކޮންޓޭނަރުތަކެއް ނުވަތަ ކެމިކަލް އަދި ތެޔޮ ބޭނުންކޮށްގެން މަސައްކަތްކުރާ ސާމާނުތަކެކެވެ. މިފަދަ ތަކެތީގެ އަސްލު ފޮށީގެ ބޭރުގައި އެއީ ނުރައްކާތެރި މާއްދާއެއް ހިމެނޭ އެއްޗެއްކަން އަންގައިދޭ ނިޝާންތައް ޖަހާފައި ހުރެއެވެ. ފޮށި ހުސްވި ނަމަވެސް، އެ ނިޝާންތައް ފޮށީގައި ހުރުމަކީ ސަލާމަތީ ބޯޑަރުތަކުގައި އޮޅުން އަރާނެ ކަމެކެވެ.

ދެވަނަ ސަބަބަކީ، ސްކްރީނިންގ މަރުހަލާގައި ދިމާވާ ގޮންޖެހުންތަކެވެ. އެއާޕޯޓްގެ ސެކިއުރިޓީން އެކްސް-ރޭ މެޝިންތަކުން ތަކެތި ބަލާއިރު، ފޮށީގެ ބޭރުގައިވާ ތަސްވީރުތަކާއި ލިޔުންތަކަށް ބަލައި އެއީ ކޮން އެއްޗެއްކަން ދެނެގަނެއެވެ. ޑަބްލިޔު.ޕީ.ސީ ފޮށްޓެއް ފެނުމުން، އޭގެ އެތެރޭގައި ނުރައްކާތެރި ކެމިކަލެއް ހުރިތޯ ބަލައި ކަށަވަރު ކުރުމަށް ގިނަ ވަގުތުތަކެއް ހޭދަވެއެވެ. ފޮށި ހުސްކަން ސާފުކޮށް އެނގެން ނެތް ނަމަ، ސަލާމަތީ ސަބަބުތަކަށްޓަކައި އެއާލައިންތަކުން އެފަދަ ތަކެތި ބަލައިނުގަތުމަށް އިސްކަންދެއެވެ.

މީގެ އިތުރުން، ފޮށީގައި ހުރެދާނެ ކެމިކަލްގެ އަސަރަކީވެސް މުހިންމު ކަންބޮޑުވުމެކެވެ. ޑަބްލިޔު.ޕީ.ސީ ފަދަ ސާމާނު ބަންދުކޮށްފައި ހުންނަ ފޮށިތަކުގައި، އެ މެޝިންތަކަށް ބޭނުންކުރާ ތެޔޮ ނުވަތަ ސާފުކުރާ ކެމިކަލްގެ ވަސް ނުވަތަ އޭގެ ކުޑަ މިންވަރެއް ހަރުލާފައި ހުރެދާނެއެވެ. ބޯޓުގެ ކާގޯ ހޯލްޑަކީ ވަކި މިންވަރަކަށް ޕްރެޝަރު ހިފެހެއްޓިފައިވާ ތަނަކަށް ވުމާއެކު، މިފަދަ ކެމިކަލްގެ ވަހަކީ ނުވަތަ އަސަރަކީ ދަތުރުމަތީގައި ނުރައްކާތެރި ހާދިސާއެއް ހިނގުމަށް މަގުފަހިވެދާނެ ކަމެކެވެ.

ޗެކް-އިން ކައުންޓަރުތަކުން ޑަބްލިޔު.ޕީ.ސީ ކްލީނަރުގެ ހުސް ފޮށި ބަލައިނުގަންނަނީ ދަތުރުވެރިޔާއަށް ދަތިކުރުމުގެ މަގްސަދަކު ނޫނެވެ. އޭގެ ބަދަލުގައި، އެއީ މުޅި ބޯޓާއި އެންމެހައި ފަސިންޖަރުންގެ ސަލާމަތާއި ރައްކާތެރިކަން ކަށަވަރު ކުރުމަށްޓަކައި އެޅިފައިވާ މުހިންމު ފިޔަވަޅެކެވެ. އެހެންކަމުން، ދަތުރުވެރިން މިފަދަ ތަކެތި އުފުލުމުގައި އެއާލައިންތަކުގެ އިރުޝާދުތަކަށް ބޯލަނބައި، އެކަށީގެންވާ އެހެން ގޮތަކަށް ތަކެތި ބަންދުކުރުމަކީ ދަތުރު އޮމާންކަމާއެކު ކުރިއަށް ގެންދިއުމަށް ލިބޭ ބޮޑު އެހީއެކެވެ.