“އެހެންވިއްޔާ އަހަރެންގެ ނިންމުންވެސް އަޑުއަހާ. މިއަދު ނާފިލްއަށް ޖެހޭނީ ކޮންމެވެސް އެކަކު އިޚުތިޔާރުކުރަން. އަހަރެން ވިއްޔާ އަހަރެން. ޖަނާން ވިއްޔާ ޖަނާން. ޖަނާން އިޚުތިޔާރު ކޮށްފިއްޔާ ނާފިލްއަށް ޖެހޭނީ އޭނަ ގޮވައިގެން މިގެއިން ނުކުމެގެން ދާން.” ސުލްތާނާގެ ނިންމުން އަޑު އިވުމުން ނާފިލްއަށް ގޮތް ހުސްވިއެވެ.
އޭނާއަށް މަންމަވެސް މުހިންމެވެ. އަނެއްކޮޅުން ޖަނާންއަކީ އޭނާގެ ހިތުގެ ޔާރާއެވެ. އެތަނުން އެކަކު އިޚުތިޔާރު ކުރުމަކީ އޭނާއަށް ކުރެވޭނެ ކަމެއް ނޫނެވެ. ނަމަވެސް މިއަދު އޭނާއަށް އެނޫން ގޮތެއްވެސް ނެތެވެ. މަންމަ އެހެރީ ގޮތުގައެވެ. އޭނާ ގޮތެއް ނިންމާކަށް މާގިނަ ވަގުތެއް ނުނަގައެވެ. އޭނާ ގޮތެއް ނިންމައިފިއެވެ.
“މަންމާ. އަހަރެން މަންމަގެ ޝަރުތު ޤަބޫލުކޮށްފިން.” ނާފިލްގެ ޖުމްލައިން ސުލްތާނާގެ މޫނުމަތިން އުންމީދުގެ ކުލަވަރު ފެނުނެވެ.
“މަންމައަށް އޭރުވެސް އެނގުނު ދަރިފުޅު މަންމަ ދޫކޮށްލާފައި ނުދާނެކަން.” ސުލްތާނާ ނާފިލްގެ ގައިގައި ބައްދާލިއެވެ.
ނާފިލް ދެލޯ މަރާލިއެވެ. އަދި މަޑުމަޑުން ސުލްތާނާގެ ކޮނޑުގައި ހިފައި އޭނާގެ ގަޔާއި ދުރުކޮށްލިއެވެ. ސުލްތާނާ ނާފިލްގެ މޫނަށް ބަލައިލިއެވެ. ސުލްތާނާއަށް ނާފިލްގެ ލޮލުން ފެނުނީ ސާބިތުކަމެވެ. ނުގުޑާފަދަ އަޒުމެކެވެ.
“ދަރިފުޅު ތި ނިންމީ..” ސުލްތާނާއަށް ޖުމްލަ ފުރިހަމައެއް ނުކުރެވުނެވެ.
“އާނ މަންމާ. އަހަރެން ޖަނާން ގޮވައިގެން މިގެއިން ދާން މި ނިންމީ.” ނާފިލްގެ ވާހަކައިން އެންމެނަށްވެސް ލިބުނީ ސިހުމެކެވެ. އެންމެ ބޮޑު ސިހުމެއް ލިބުނީ ސުލްތާނާއަށެވެ. އޭނާ ހީކުރީ ނާފިލްއަށް އޭނައާ ދެކޮޅަށް ތެދުވާކަށް ނުކެރޭނެ ކަމަށެވެ.
“ނާފިލް. އެ ބޭރު އަންހެނާއަށްޓަކައި ކަލޭ މަންމައާ އާއިލާ ދޫކޮށްލަނީތަ؟” ސުލްތާނާ އެންމެ ފަހުގެ ހަތިޔާރު ބޭނުންކުރަން ފެށިއެވެ.
“ނޫން މަންމާ. އަހަންނަށް އެނގޭ މަންމަ އަހަރެންދެކެ ވަރަށް ލޯބިވާކަން. އަހަރެންވެސް މަންމަދެކެ ވަރަށް ލޯބިވަން. އެކަމަކު އެ ލޯބީގެ ފައިދާ ނަގަން މަންމަ ނޫޅޭ.” ނާފިލް ބުނެލިއެވެ.
ސުލްތާނާއަށް ގޮތް ހުސްވިއެވެ. އޭނާއަށް ނާފިލް ނުހުއްޓުވޭނެކަން ޔަޤީންވިއެވެ. ހުއްޓުވޭނީ ހަމައެކަނި ޖަނާން ގޭގައި ބަހައްޓައިގެންނެވެ. އެކަމެއް އޭނައަކަށް ނުކުރެވޭނެއެވެ. ޖަނާންއަށް ޅީދަރިއެއްގެ މަޤާމު ދީގެން އެގޭގައި ރާނީއެއްހެން ގެންގުޅޭކަށް އޭނާއަކަށް ނުރުހެވޭނެއެވެ.
“އެންމެ ރަނގަޅު. ނާފިލްއަށް ފެންނަ ގޮތެއް. ދަންޏާ ދާންވީ. އެކަމަކު މިގޭ އޮޅި ގިރާކުރުމަށްފަހު ނާފިލްއަށް މިގޭ ދޮރު އަބަދަށް ބަންދުވާނެކަން ހަނދާން ބަހައްޓާތި. އަދި މިގޭގެ އެއްވެސް މީހަކާ އެއްވެސް ގުޅުމެއް ނޯންނާނެކަންވެސް ހަނދާން ބަހައްޓާތި.” ސުލްތާނާ އޭނާގެ އެންމެ ފަހުބަސް އިއްވިއެވެ.
ނާފިލް ދިޔަގޮތަށް ގޮސް ވަނީ ޖަނާންގެ ކޮޓަރިއަށެވެ. އޭރު ޖަނާން އިނީ އެނދުމަތީ އިށީނދެލައިގެން ރޯށެވެ. ގޭތެރޭގައި ދެކެވެމުން ދިޔަ ހުރިހާ ވާހަކައެއް އޭނާއަށް އަޑު އިވިއްޖެއެވެ. އޭނައާ ގުޅުން ހުރި ސަބަބަކަށް ނާފިލް ގެއިން ނުކުތުން އޭނާގެ ހިތަށް ކެތްނުކުރެވޭފަދަ ވޭނެއް ދެނީއެވެ.
“ނާފިލް. އަހަރެން ދިޔަދީ. އެކަމަކު މަންމަމެންނާ ގުޅުން ކަނޑާނުލާ މަޑުކުރޭ.” ޖަނާން އާދޭހުގެ ރާގެއްގައި ބުންޏެވެ.
“ޖަނާން. ހުއްޓާލަބަލަ. އަހަރެންގެ ނިންމުން ބަދަލެއް ނުވާނެ. އަހަރެން ޖަނާން ދޫކޮށެއް ނުލާނަން. އެކަނި ފޮނުވައެއްވެސް ނުލާނަން. އަހަންނަށް ޖަނާން ގޮވައިގެން މިގޭގަ އުޅެވޭކަށް ނެތް. އެހެންވީމަ މިގޭން ދާން މި ނިންމީ.” ނާފިލް ވެސް ހުރީ ގޮތުގައެވެ. އޭނާ އެއްވެސް ހާލެއްގައި ޖަނާންގެ އެވާހަކަ ޤަބޫލެއް ނުކުރާނެއެވެ.
“ފޮށްޓަށް އެއްޗެހި އަޅާ. އަހަރެންވެސް މި އަންނަނީ.” އެހެން ބުނެލުމަށްފަހު ނާފިލް ނުކުމެގެން ގޮސް އޭނާގެ ކޮޓަރިއަށް ވަނެވެ. އަދި އޭނާގެ އަންނައުނުތައް ފޮށްޓަށް އަޅާލިއެވެ. ދެން އޭނާ ގޮސް ޖަނާންގެ ކޮޓަރިއަށް ވަތްއިރުވެސް ޖަނާން ހަމަ އެނދުމަތީ އިންގޮތަށް އިނީއެވެ.
“ބަލަ އަދިވެސް އިނީތަ؟ ޖަނާންއަށް ބުނާ އެއްޗެއް އަޑެއް ނީވޭތަ؟” ނާފިލް ގާތަށް ކުޑަކޮށް ރުޅިއައެވެ.
އާއިލީ މަޖުބޫރާހެދި އޭނަ ވަރަށް ދުވަހު އަނބިމީހާއާ އެއްފުރާޅެއްގެ ދަށުގައި އެހެނަސް ދުރުގައި އުޅެފިއެވެ. ނަމަވެސް ދެން އޭނައަށް ޖަނާންއާ ދުރަކު ނޫޅެވޭނެއެވެ.
“ޖަނާން ބޭނުންވާ ގޮތެއް ނިކަން ސާފުކޮށް ބުނެބަލަ. ޖަނާން އަހަންނާ އެކީ އުޅެން ބޭނުންތަ ނޫނީ ނޫންތަ؟” ނާފިލް ޖަނާން ކައިރީ އެނދުގައި އިށީންނަމުން އެހިއެވެ.
ޖަނާން އެއްޗެކޭ ނުބުނެއެވެ. ބަލަހައްޓައިގެން އިނީއެވެ. ނާފިލްއަށް އެކަމުން އުނދަގޫވިއެވެ. ޖަނާން ވިސްނާ އެއްޗެއް ނޭނގޭތީއެވެ.
“ޖަނާން. އަހަރެން އެބަ ސުވާލެއް ކުރަމޭ.” ނާފިލްގެ އަޑު ކުޑަކޮށް ބާރުވިއެވެ.
“އަހަރެން ނާފިލްއާ އެކީ އުޅެން ބޭނުން. އެކަމަކު މިހެންނެއް ނޫން. އެހެންވީމަ..”
“ބުނަން ޖަނާން ރަނގަޅު ވާހަކައެއް. ޖަނާން މިހާރު ތި ވިސްނަނީ މީހުން ކިޔާނެ އެއްޗަކަށްނު. މީހުން އެއްޗެހި ނުކިޔާނެ ގޮތަކަށް އެއްކަމެއްވެސް ނުކުރެވޭނެ. ޖަނާން މިހާރު އަހަންނާ ވަކިވިޔަސް އެއްވެސް ކަމެއް ބަދަލެއް ނުވާނެ. މީހުން ފާޑުފާޑު ވާހަކަ ދައްކާނެ. އޭރުން ބުނާނެ އަރުޝީއާ އަހަންނާ ދޭތެރެއަށް ވަނީއޭ. އެކީގައި އުޅުނަސް އެކަހަލަ ތުހުމަތުތައް އަންނާނެ.” ނާފިލް ހިތްހަމަނުޖެހުނެވެ. އޭނާގެ އަޑުން އެކަން ރަނގަޅަށް ހާމަވިއެވެ.
“ރުޅި ނާދެބަލަ.” ޖަނާން ބުނެލިއެވެ.
“ދެން އަހަރެން ކީއްތަ ކުރަންވީ؟ ޖަނާން އަހަރެންދެކެ ލޯބިވޭ. އުޅެންވެސް ބޭނުންވޭ. އެކަމަކު އުޅެން ކުރަންވީ ކަންކަން ކުރާކަށް ބޭނުމެއްނުވޭ. މީ ދެން އަރަތެއްނު. ދެން އަހަރެން ރުޅިނައިސް ކުރާނެ ކަމެއް ކޮބާ؟” ނާފިލްގެ އަޑު ބާރުވިއެވެ.
“ނާފިލް. މައިންބަފައިންނާ އާއިލާ ދޫކޮށްލުމަކީ ހައްލެއް ނޫނޭ. ވިސްނަބަލަ. އެމީހުންނާ ގުޅުން ކަނޑާލާފައި ގޮސް އަހަރެމެންނަށް އުފަލުގައި އުޅެވިދާނެތަ؟ އަހަރެންގެ ވާހަކަ ބާއްވާ. ނާފިލްއަށް އުޅެވޭނެތަ؟” ޖަނާން އެހިއެވެ.
“އުނދަގޫވާނެ. އެކަމަކު އުޅެވޭނެ. މަންމަމެން މިހާރު ރުޅިއައިސްފައި ތިއްބަސް ފަހުން އޯކޭވާނެޔޭ.” ނާފިލް އަދިވެސް ޖަނާންއަށް ވިސްނައިދެވޭތޯ ބެލިއެވެ.
ޖަނާންގެ އެއްވެސް އެއްބާރުލުމެއް ނުލިބުމުން ނާފިލް ތެދުވެގެން ގޮސް އަލަމާރި މަތީގައި ހުރި ޖަނާންގެ ކުޑަ ފޮށި ނެގިއެވެ. އެއަށް އަންނައުނުތައް އަޅައި ބަންދުކޮށްލިއިރު ވެސް ޖަނާން އިނީ އިންތަނުން ގުޑާނުލަން ނަދުރެއް ބުނެގެން ކަހަލައެވެ.
“ޖަނާން. ހިނގާ.” ނާފިލް ބުނެލިއެވެ.
ދެފަހަރަކު ބުނުމުންވެސް ޖަނާން ނުތެދުވުމުން ނާފިލް ޖަނާންގެ އަތުގައި ހިފައި ނެގިއެވެ. އަދި ދަމަމުން ބޭރަށް ނުކުތެވެ. ޖަނާންގެ ހިތް ވަނީ ކުދިކުދިވެފައެވެ. އޭނާގެ ސަބަބުން އާއިލާއެއް ރޫޅުނީއެވެ. ހުރިހާވެސް ކަމަކީ އޭނާގެ ސުންޕާކަމެވެ. ނިކަމެތިކަމެވެ. އޭނައަކީވެސް ފައިސާވެރިއެއްގެ ދަރިއެއްނަމަ އެ އާއިލާއިން އޭނާ ބަލައިގަތީހެވެ.
ނާފިލް ޖަނާން ގޮވައިގެން ނުކުންނަން ފެށުމުން ސުލްތާނާ ނާފިލް ހުއްޓުވަން އުޅުނެވެ. ނަމަވެސް އެކަމަށް ހުރަސް އެޅީ ރައްޒާޤެވެ.
“އޭނަ ދިޔަދީ. މިއަދު މިހެން މި ދިމާވީ ސުލްތާނާގެ ގޮތްދޫނުކުރުމުގެ ސަބަބުން. ހަޤީޤަތް އެނގުނީމާ އެކަން ޤަބޫލުކުރިނަމަ މިއަދު މިހެނެއް ނުވީސް.” ރައްޒާޤު ބުނެލިއެވެ.
“ދަނީ. މަންމައަށް ބަލާތި. މަންމަ އަމިއްލައަށް އަހަރެން ބަލައި ނާންނަހާ ދުވަހަކު އަހަރެން އެނބުރި މިގެއަކަށް ނާންނާނަން. ހިތްހެޔޮކުރާތި.” ނާފިލް ޖަނާންގެ އަތުގައި ހިފައިގެން ހިނގައިގަތެވެ. އެމީހުންގެ އާ މަންޒިލަށް ދަތުރު ފެށުމަށްޓަކައެވެ.
ނާފިލް ގެއިން ނުކުތްތަން ފެނުމުން ސުލްތާނާއަށް ސޯފާ މައްޗަށް ވެއްޓިގަނެވުނެވެ. އަދި ބާރުބާރަށް ރޯން ފެށުނެވެ. އޭނާގެ ކުށް ޤަބޫލު ކުރެވުނު ނަމަވެސް ގޮތް ދޫކުރާކަށް އަދިވެސް އޭނާގެ ހިތަކަށް ނާރައެވެ.
ނާފިލް ޖަނާން ގޮވައިގެން މާލޭގެ ކުލީ ކޮޓަރިއަކަށް ބަދަލުވިއެވެ. އާދައިގެ ނަމަވެސް ތަނަވަސް ކޮޓަރިއެކެވެ. އެ ދެމަފިރިންނަށް ދަތިކަމެއް ނެތި އުޅެވޭނެވަރުގެ ތަނެކެވެ. މުއްސަނދި ދިރިއުޅުމެއްގައި އުޅެފައި އައިސް އެ އާދައިގެ ދިރިއުޅުމެއް އުޅެން ނާފިލްއަށް އުނދަގޫވާނެ ކަމަށް ޖަނާން ހީކުރިއެވެ. ނަމަވެސް ނާފިލްއަކީ އަބަދުވެސް އާދައިގެ ދިރިއުޅުމެއް އުޅެން ބޭނުންވާ މީހަކަށް ވާތީ އޭނާއަށް އެކަމުން ދަތިކަމެއް ނުލިބެއެވެ.
“ޖަނާން. އަހަންނަށް މާފްކުރޭ. އަހަންނަށް ވަރަށް ދުވަހު ޖަނާންގެ ހިތުގައި ޖެއްސިއްޖެ. އެކަމަކު އިރާދަކުރެއްވިއްޔާ ދެން ދުވަހަކުވެސް އަހަރެންގެ ސަބަބުން ޖަނާން ހިތާމަ ކުރާކަށް ނުޖެހޭނެ.” ނާފިލް ޖަނާންގެ އަތުގައި ހިފާލަމުން ވަރަށް ލޯބިން ބުންޏެވެ.
ދުވަސްތައް ފާއިތުވަމުން ދިޔައިރު ނާފިލްއާ ޖަނާންގެ ދިރިއުޅުން ވަރަށް އުފާވެރިއެވެ. ނާފިލް އޭނާގެ ފޮޓޯގްރަފީގެ މަސައްކަތް ކުރަމުންދާއިރު ޖަނާން އޭނާގެ ތަޢުލީމު ފުރިހަމަކުރަމުން ދެއެވެ. އޭނާގެ އުންމީދަކީ އޭނާގެ މަންމަ ދުށް، ހަޤީޤަތަކަށް ނުވި ޑޮކްޓަރަކަށް ވުމުގެ ހުވަފެން ހަޤީޤަތަކަށް ހެދުމެވެ.
ނާފިލްގެ އާއިލާއިން ނާފިލް ނެތުމުގެ ފަޅުކަން އިހުސާސް ކުރާއިރު ސުލްތާނާ އަދިވެސް ހުރީ ގޮތްދޫނުކުރާށެވެ. އޭނާގެ ދަރިފުޅު އޭނާއާ ދުރުކޮށްލީތީ އޭނާ ދުވަހަކުވެސް ޖަނާންއަކަށް މާފެއް ނުކުރާނެއެވެ. އަދި އަރުޝީގެ އާއިލާގެ ކުރިމަތީގައި އެމީހުންގެ އަގު ވައްޓާލީތީ ނާފިލްއަކަށްވެސް އޭނާ މާފެއް ނުކުރާނެއެވެ.
އެއްދުވަހަކު ޖަނާން އުޅުނު ކޮޓަރި ސާފުކުރުމުގެ ތެރޭ އަލަމާރީގެ ދަމާ ވަތްގަނޑެއް ތެރޭގައި އޮތް ކުޑަ ފޮށްޓެއް ސުލްތާނާގެ ލޮލުގައި އަޅައިގަތެވެ. އޭނާ އެ ފޮށި ހުޅުވާލިއެވެ. އޭގެ ތެރޭގައި އޮތީ ބާވެފައިވާ ސިޓީއަކާއި ފޮޓޯއެކެވެ.
ފޮޓޯއަށް ބަލައިލުމާއެކު ސުލްތާނާއަށް ވަރުގަދަ ސިހުމެއް ލިބުނެވެ. އެ ފޮޓޯގައި އަންހެނަކާއެކު ވަރަށް ލޯބިން އެހެރީ ދެވަނަ މީހެއް ނޫނެވެ. އޭނާގެ ފިރިމީހާ ރައްޒާޤެވެ. އޭނާ އެ ފޮޓޯ ހިފައިގެން ރައްޒާޤު ގާތަށް ގޮސް ސުވާލު ކުރިއެވެ.
“ތި ފޮޓޯގައި ތިހިރީ ރާބިއާ. ދެން މިހިރީ.. އިހަށް މަޑުކޮށްބަލަ. ސުލްތާނާއަށް ކޮންތާކުން ތި ފޮޓޯ ލިބުނީ؟” ރައްޒާޤު އެހިއެވެ.
“ޖަނާންގެ ކޮޓަރި އަލަމާރިން. ކިހިނެއްވީ؟” ސުލްތާނާ އެހިއެވެ.
“އެހެންވީމާ އަހަރެމެންނަށް ނޭނގިވެސް ވަރަށް ބޮޑު ގޯހެއް ހެދިއްޖެ. ނޭނގި ތިބެ އަހަރެމެންނަށް މި ގޭން މި ނެރެވުނީ މިގޭ ދެކުދިން.” ރައްޒާޤު ބުނެލިއެވެ.
“ކީކޭތަ ތި ކިޔަނީ؟ ތިކިޔާ އެއްޗެއް ތަންކޮޅެއް ސާފުކޮށް ކިޔާބަލަ.” ސުލްތާނާގެ އަޑު ބާރުވިއެވެ.
“މި ކިޔަނީ ޖަނާންއަކީ ދުރު ކުއްޖެއް ނޫނޭ. އެއީ އަހަރެމެންގެ ރަފީޤުގެ ދަރިފުޅޭ.” ރައްޒާޤު އޮޅުންފިލުވައިދިނެވެ.
“އެކަމަކު އޭނަ ނިޔާވިތާ ވެސް މިހާރު ވެދާނެ ބާވީހަކަށް އަހަރު.” ސުލްތާނާއަށް އެވާހަކަ ޤަބޫލުކުރަން ދަތިވިއެވެ.
“އާނ. އެހާ ދުވަސް ވެދާނެ. އޭނަ ނިޔާވުމުގެ ކުރިން އަހަންނާ ބައްދަލުވިޔޭ. އޭނަ ވަރަށް ވާހަކަވެސް ދެއްކި. އަންހެން ދަރިޔަކު ހުރި ވާހަކަވެސް ބުނި. އެކަމަކު އޭރު އަހަރެންވެސް އެވާހަކަ ނުދެއްކީ ހިތްހަމަ ނުޖެހިފައި ހުރީމާ. އެކުއްޖާފުޅު ހޯދާކަށްވެސް، ދުނިޔޭގައި ހުރިތޯ ނެތްތޯ ބަލައިލާކަށްވެސް ބޭނުމެއްނުވި.” ރައްޒާޤުގެ ލޮލުން ކަރުނަ ފޭދުނެވެ.
“އަހަރެން މާދަމާ ދާނަން އެކުދިން ބަލައި. ދެން އަހަންނަކަށް އެކުދިންނާ ދުރުގައެއް ނޫޅެވޭނެ. ރަފީޤަށް އިހާނެތިކޮށް ހެދުނު ގޮތަށް އޭނަގެ ދަރިފުޅާ ދޭތެރޭ ކަންތައް ކުރާކަށް އަހަންނަކަށް ނުކެރޭނެ.” ރައްޒާޤުގެ ވާހަކައަށް މިފަހަރު ސުލްތާނާ ދެކޮޅެއް ނުހަދައެވެ. ޖަނާންއަކީ ކޮން އާއިލާއެއްގެ މީހެއްކަން އެނގުމުން އޭނާގެ ވިސްނުން ބަދަލުވީއެވެ.
ޖެހިގެން އައި ދުވަހު ސުލްތާނާ އާއި ރައްޒާޤު ނާފިލްމެން ތިބޭ ކޮޓަރިއަށް ދިޔައެވެ. ދުވަސްތަކަކަށްފަހު ބައްދަލު ވެވުމުން ޖަޒުބާތުގައި ޖެހިފައި އެތައް އިރަކު ތިއްބެވެ. ރައްޒާޤު ޖަނާންގެ ކިބައިން މާފަށް އެދުނެވެ. އަދި ޖަނާންގެ މަންމައާ ބައްޕައާ ދޭތެރޭ ކަންތައް ކުރެވުނު ގޮތުން މާފަށް އެދުނެވެ. ޖަނާން އެމީހުންނަށް މާފަށް އެދުނެވެ.
ސުލްތާނާވެސް ޖަނާން އާއި ނާފިލްގެ ކިބައިން މާފަށް އެދުނެވެ. އޭނާގެ ގޮތްދޫނުކުމުގެ ސަބަބުން އާއިލާ ރޫޅި، އެ ދެކުދިންގެ ދިރިއުޅުން އެހާ ދަށް ފެންވަރަކަށް ވެއްޓުނީތީއެވެ. މަންމައާއި ބައްޕަގެ އެދުމުގެ މަތިން ނާފިލް ޖަނާން ގޮވައިގެން ގެއަށް ބަދަލުވިއެވެ. އަދި ގޭގެ އެންމެނަށް ޖަނާންގެ ހަޤީޤަތް އެނގުމުން އޭނައާ ދޭތެރޭ ދެކޭގޮތް ބަދަލުވެ ހިތް ހަލާލު ދިނެވެ.
އާއިލާ އެކުވުމުގެ އުފަލުގައި ގޭގައި ކުޑަ ޕާޓީއެއް ބޭއްވުނެވެ. އެ ޕާޓީއިން އެންމެނަށްވެސް އެންމެ ބޮޑު ހައިރާންކަމެއް ލިބުނީ އަރުޝީ އައީތީއެވެ. ދަޢުވަތެއްވެސް ނުދެނީސް އަމިއްލައަށް އައީތީ އެކަން ބަލައިގަންނަށް ކުޑަކޮށް އުނދަގޫވިއެވެ.
“ވަރަށް ހައިރާންވެއްޖެ ދޯ. އަސްލު އަހަރެން މި އައީ ވަރަށް ބޮޑު ބޭނުމެއްގައި. އަހަރެންގެ ސަބަބުން ޖަނާންއަށް ލިބުނު ހުރިހާ ދެރައަކާ ކިޔުނު އެއްޗިއްސަކަށް މާފަށް އެދެންވެގެން މިއައީ. އަހަންނަށް ހަޤީޤަތުގައި އަހަރެންގެ ކުށް އިހުސާސް ކުރެވިއްޖެ. އަދި އަހަންނަށް މިހާރު ވިސްނިއްޖެ ގަދަކަމުން ލޯތްބެއް ނުހޯދޭނެކަން.” އަރުޝީ ބުންޏެވެ.
ޕާޓީ ތެރޭގައި އެކި މީހުން މަސްއޫލުވެގެން އުޅުނުއިރު އަރުޝީވެސް ޖަނާންއާ ވާހަކަދައްކައި އުޅުނެވެ. ސުލްތާނާ ހުރީ އަރުޝީގެ ހަރަކާތްތަކަށް ފާރަލައިގެންނެވެ. އޭނައަށް އަރުޝީގެ މަޤުސަދާމެދު ޝައްކުވީ އަރުޝީގެ ޢަމަލުތައް ހުރިގޮތުންނެވެ. އޭނާ އަދިވެސް ނާފިލްއަށް ބަލައިލާ ގޮތާއި ދުރުގައި ހުންނައިރު ޖަނާންއަށް ބަލައިލާ ގޮތުންނެވެ.
“ޖަނާން. ހިނގާ އަހަރެމެންގެ ދޭތެރޭ މިއޮތް ނުތަނަވަސްކަން އަބަދަށް ނައްތާލަމާ. އަން. މި ޖޫސްތަށި ބޯލާ. ޗިއަރސް.” އަރުޝީގެ އަތުގައި ހުރި ޖޫސް ދެތަށިން އެއްތަށި ޖަނާންއަށް ދިއްކޮށްލަމުން އަރުޝީ ބުނެލިއެވެ.
ޖަނާންވެސް އަރުޝީއާ އެއްބައިވެލަމުން ޖޫސްތަށި ބޯން އުޅުނު ވަގުތު ސުލްތާނާ އެތަނަށް އައެވެ. އަދި ޖަނާންގެ އަތުން ޖޫސްތަށި އަތުލިއެވެ.
“ވަރަށް ބޮޑަށް ކަރު ހިއްކައިގެންފަ މިހިރީ. ޖަނާން އެހެން ޖޫސް ތަށްޓެއް ނަގާ އިނގޭ.” ސުލްތާނާ އެހެން ބުނެފައި ޖޫސް ބޯން އުޅެނިކޮށް އަރުޝީ އޭނާގެ އަތުގައި ޖަހައި ޖޫސްތަށި ވައްޓާލިއެވެ.
“ކީއް ތިކުރީ އަރުޝީ؟” ސުލްތާނާ އެހިއެވެ.
އަރުޝީއަށް ކުރެވުނު ކަންތައް އިހުސާސް ކުރެވުނީ ދެނެވެ. އެންމެން ޝައްކުގެ ނަޒަރުން އޭނައަށް ބަލަން ފެށިއެވެ.
“ކިހިނެއްވީ؟ މިއަށް އެއްޗެއް އަޅާފައި ހުރީތަ؟” ސުލްތާނާގެ ސުވާލުން އަރުޝީ ދާހިއްލަން ފެށިއެވެ. އޭނާގެ ސިއްރު ބޭޒާރު ވެއްޖެއެވެ. ހަސަދަވެރިކަން ބޮޑުވަމުން ގޮސް އޭނާ އެއައީ ޖަނާންގެ ފުރާނަ ދުއްވާލަން ރާވައިގެންނެވެ. ނަމަވެސް ސުލްތާނާއަށް އޭނާގެ ޢަމަލުތަކާމެދު ޝައްކުވެ ފާރަލީތީ ޖަނާން ސަލާމަތްވީއެވެ.
ނާފިލް އުޅުނީ އަރުޝީ ފުލުހުންނާ ހަވާލުކުރާށެވެ. ނަމަވެސް ޖަނާން އެކަން ހުއްޓުވިއެވެ. އަދި އޭނާ އަރުޝީއަށް މާފުކޮށްފިން ކަމަށާއި ދެން އެފަދަ ކަމެއް ތަކުރާރު ނުކުރާނެކަމަށް އުންމީދުކުރާ ކަމަށް ބުންޏެވެ. އަދި އެހެން މީހުންވެސް އެކަން ހަނދާން ނައްތާލުމަށް އެދުނެވެ.
ޕާޓީ ނިމެން އުޅެނިކޮށް ޖަނާން އަނބުރައިގަތެވެ. ޑޮކްޓަރަށް ދެއްކުމުން ލޭގެ ޓެސްޓެއް ހެދުމަށެވެ. ޓެސްޓުގެ ނަތީޖާ ލިބުމާއެކު މުޅި އާއިލާއަށް ބަހާރު މޫސުން އައި ކަހަލައެވެ. ޖަނާން އަލަތު ދަރިފުޅަށް ބަލިވެ އިނީއެވެ. ނާފިލްވެސް ހީވަނީ އުފަލުން އެހެންކަމެއް ހެންނެވެ. އޭނާގެ ދިރިއުޅުން ހީނުކުރާހާ އުފާވެރިއެވެ. އޭނާގެ ހިތުގެ ޔާރާ ލިބުނީއެވެ.
(ނިމުނީ)
