ތުއްޕުޅު މޫސާ ޢަލައިހިއްސަލާމް
ނަބީބޭކަލެއް ކަމަށްވާ މޫސާގެފާނުގެ އުފަންވެވަޑައިގަތުމާއި، ތުއްޕުޅުއިރުގެ ވާހަކައިން ދަރިފުޅަށް ގިނަގުނަ ފިލާވަޅުތަކެއް ލިބިގެންދާނެއެވެ. އޭގެ ތެރޭގައި މައިވަންތަކަމުގެ މަތިވެރި ލޯތްބާއި، ދުނިޔެމަތީގައި ކިތަންމެ ބޮޑު ނުރައްކަލަކާ ކުރިމަތިލާން ޖެހުނު ކަމުގައި ވިޔަސް، މާތް ﷲ އަށް ފުރިހަމައަށް ބޯލަނބައި، އެކަލާނގެއަށް ވަކީލުކުރުމުގެ މުހިންމުކަން ހިމެނެއެވެ.
“އެވޭލާ ޒަމާނުގައި، ރަހުމުކުޑަ އަނިޔާވެރި ރަސްކަލަކު އުޅުނެވެ. އޭނާގެ ނަމަކީ ފިރުޢައުނެވެ. އެއްދުވަހަކު އޭނާއަށް ފެނުނު ހުވަފެނެއްގެ ތަޢުބީރުގައި، ފިރިހެން ކުއްޖަކު އުފަންވެ އޭނާގެ ރަސްކަން ނިމުމަކަށް ގެންނާނެކަން އެނގުމުން، ވަކި އަހަރަކަށް އުފަންވާ ހުރިހާ ފިރިހެން ކުދިން މަރާލުމަށް އޭނާ އަމުރުކުރިއެވެ. މިއީ ބަޔާންކުރަންވެސް ދަތި، ބިރުވެރި ނާމާން އަމުރެކެވެ.
މިކަމުގެ ސަބަބުން މުޅި ގައުމަށް ބިރުވެރިކަން ފެތުރި، ބަނޑުބޮޑު އަންހެނުން އެމީހުންގެ ދަރިންނަށް ވާނެގޮތަކާމެދު އިންތިހާއަށް ކަންބޮޑުވިއެވެ. މޫސާގެފާނުގެ މަންމާފުޅަކީވެސް މީގެ ތެރެއިން އެކަކެވެ. އެކަމަނާގެ ހިތްޕުޅު ވަނީ ދަރިފުޅަށްޓަކައި އޮތް ލޯތްބާއި، ކުރިމަތިވެދާނެ ނުރައްކަލަކަށް އޮތް ބިރުވެރިކަމުން ފުރިފައެވެ.
މާތް ﷲ އެކަމަނާއަށް އިލްހާމް ކުރެއްވީ، ފޮށްޓެއް ތައްޔާރުކޮށް އޭގެ ތެރެއަށް ތުއްޕުޅު މޫސާގެފާނު ލެއްވުމަށްފަހު، ކޯރުގެ ތެރެއަށް އެ ފޮށި ދޫކޮށްލުމަށެވެ. ދަރިފުޅާ ވަކިވާން ޖެހުމުން އެކަމަނާއަށް ކުރާނެ ހިތާމަ މާތް ﷲ ދެނެވޮޑިގެންވެއެވެ. އެހެންކަމުން، އެކަލާނގެ އެ ދަރިފުޅު އަލުން އެކަމަނާއާ ބައްދަލުކޮށްދެއްވާނެ ކަމުގެ އުފާވެރި ޚަބަރު ދެއްވައި ހިތްހަމަޖައްސަވައިދެއްވިއެވެ.
މޫސާގެފާނުގެ ދައްތަ މަރްޔަމްގެފާނަށް، އެ ފޮށި ދާގޮތެއް ބެލުމަށް ފަހަތުން ދިއުމަށް މާތް ﷲ އިލްހާމް ކުރެއްވިއެވެ. އަދި އެ ފޮށި ގޮސް މަޑުކުރީ ސީދާ ފިރުޢައުނުގެ ގަނޑުވަރުގެ ދޮރުމައްޗަށެވެ!
ފިރުޢައުނުގެ އަނބިކަނބަލުން އާސިޔަތުގެފާނަށް ފިރިހެން ދަރިއަކު ލިބިވަޑައިގެންފައި ނުވާތީ، އެކަލޭގެފާނު އަމިއްލަ ދަރިއެއްގެ ގޮތުގައި ބަލައިގަތުމަށް ނިންމެވިއެވެ. ނަމަވެސް އެކަލޭގެފާނު ވަރަށް ބޮޑަށް ބަނޑުހައިވެފައިވީ ނަމަވެސް، އެއްވެސް އަންހެނެއްގެ ގާތުން ކިރުބުއިމަށް އިންކާރު ކުރެއްވިއެވެ.
މިކަން އެނގިވަޑައިގަތުމުން، މޫސާގެފާނުގެ ދައްތަ ކުރިމަތިލައި، އެކަލޭގެފާނަށް ކިރުދޭނެ އަންހެނަކު ހޯދައިދިނުމަށް ހުށަހެޅިއެވެ. އެގޮތުން ހުށަހެޅީ މޫސާގެފާނުގެ މަންމާފުޅެވެ. ނަމަވެސް، އެކަލޭގެފާނަށް އިންތިހާ ލޯތްބާއި އޯގާތެރިކަމާއެކު ކިރުދީ ބަލަހައްޓަމުން އެގެންދަނީ ސީދާ އެކަލޭގެފާނުގެ އުފަން މަންމާފުޅުކަމެއް ގަނޑުވަރުގެ އެއްވެސް މީހަކަށް ނޭނގެއެވެ.
އެންމެ ފަހުން، މޫސާގެފާނުގެ މަންމާފުޅަށް މާތް ﷲ ކުރެއްވި ވަޢުދުފުޅު ފުރިހަމަވިއެވެ. އެކަމަނާގެ ދަރިފުޅު ނުރައްކަލުން ސަލާމަތްވެ، އަލުން އެކަމަނާގެ އަތްޕުޅަށް ރުޖޫޢަވިއެވެ.”
މޫސާގެފާނާއި އަލްޚިޟްރުގެފާނުގެ ވާހަކަ
މޫސާގެފާނާއި އަލްޚިޟްރުގެފާނުގެ ވާހަކަ ފެށިގެން އަންނަނީ، ދެ ކަނޑު ބައްދަލުވާ ހިސާބުގައި ވަރަށް އިލްމުވެރި ބޭކަލަކު އުޅުއްވާކަން ﷲ ތަޢާލާ މޫސާގެފާނަށް ވަޙީކުރެއްވި ހިސާބުންނެވެ. އެ ދެބޭކަލުން ބައްދަލުވުމުން، އެބޭކަލެއްގެ އަރިހުން އުނގެނުމުގެ ފުރުސަތަކަށް މޫސާގެފާނު އެދިވަޑައިގަތެވެ.
އަލްޚިޟްރުގެފާނު މޫސާގެފާނަށް ދެންނެވީ، އެކަލޭގެފާނާއެކު ކުރައްވާ ދަތުރުގައި ކެތްތެރިކަން އިސްކުރުމަކީ މޫސާގެފާނަށް ފަސޭހަކަމަކަށް ނުވާނެ ކަމަށެވެ. ނަމަވެސް، މޫސާގެފާނު ވަރަށް ބޮޑަށް ކެތްތެރިވެވަޑައިގަންނަވާނެ ކަމަށް ވިދާޅުވިއެވެ. އެހިސާބުން އަލްޚިޟްރުގެފާނު އެންމެ ޝަރުތެއް ކުރެއްވިއެވެ. އެއީ އެކަލޭގެފާނު އަމިއްލަފުޅަށް ކަމެއްގެ ސަބަބު ބަޔާންކޮށްދެއްވަންދެން، އެއްވެސް ކަމަކާ ބެހޭގޮތުން ސުވާލު ނުކުރުމަށެވެ.
ފުރަތަމަ، އެބޭކަލުން ނަވަަކަށް އަރައިވަޑައިގެން ދަތުރުކުރައްވަނިކޮށް، އަލްޚިޟްރުގެފާނު އެ ނަވަށް ގެއްލުން ދެއްވައި ނައު ފައްތަވާލެއްވިއެވެ. މޫސާގެފާނަށް މިކަން ބަލައެއް ނުގަނެވުނެވެ. އެހެންވެ، އެކަލޭގެފާނު އެކަމާ ސުވާލު ކުރެއްވިއެވެ. އަލްޚިޟްރުގެފާނު އެބޭކަލުންގެ މެދުގައިވީ އެއްބަސްވުން ހަނދާންކޮށްދެއްވުމުން، މޫސާގެފާނު މާފަށް އެދިވަޑައިގަތެވެ.
ދެވަނައަށް، ރަށެއްގެ ތެރެއިން ވަޑައިގަންނަވަނިކޮށް، އަލްޚިޟްރުގެފާނު ކުޑަ ފިރިހެން ކުއްޖަކު އަވަހާރަކޮށްލެއްވިއެވެ. މިކަމާ މޫސާގެފާނު ކަންބޮޑުވެވަޑައިގެން އަލުން ސުވާލު ކުރެއްވިއެވެ. އަލްޚިޟްރުގެފާނު އަނެއްކާވެސް އެއްބަސްވުން ހަނދާންކޮށްދެއްވުމުން، މޫސާގެފާނު ދެވަނަ ފަހަރަށް މާފަށް އެދިވަޑައިގަތެވެ.
ތިންވަނައަށް، އެބޭކަލުން ވަޑައިގަތީ ރަށަކަށެވެ. އެރަށުގެ މީހުން އެބޭކަލުންނަށް މެހުމާންދާރީ އަދާކުރުމަށާއި ކާބޯތަކެތި ދިނުމަށް އިންކާރުކުރިއެވެ. އެރަށުގައި ވެއްޓެން ކައިރިވެފައިވާ ފާރެއް ހުއްޓާ ފެނިވަޑައިގަތުމުން، އަލްޚިޟްރުގެފާނު އެ ފާރު މަރާމާތުކޮށް ރަނގަޅުކޮށްދެއްވިއެވެ. މޫސާގެފާނު އެކަމާ މެދު ސުވާލު ކުރައްވައި، އެ މަސައްކަތުގެ އުޖޫރަ ހޯއްދެވުމަށް ލަފާދެއްވިއެވެ.
މިފަހަރު އަލްޚިޟްރުގެފާނު މޫސާގެފާނަށް މާފެއް ނުކުރެއްވިއެވެ. އަދި އެކަލޭގެފާނާއެކު ދެން އިތުރަށް ދަތުރު ނުކުރެވޭނެކަން އަންގައި، ކުރެއްވި ކަންތައްތަކުގެ ފުރަގަހުގައިވާ ސިއްރުތައް ކިޔައިދެއްވިއެވެ.
ފުރަތަމަ ކަމަކީ، އެ ނަވުގެ ވެރިންނަކީ ފަގީރު ބައެކެވެ. އެ ސަރަހައްދުގައި ރަނގަޅަށް ހުންނަ ކޮންމެ ނަވެއް ފޭރިގަންނަ އަނިޔާވެރި ރަސްކަލަކު އުޅުނެވެ. އެހެންކަމުން ނަވަށް ގެއްލުން ދެއްވީ، އެއީ އައިބު ހުރި ނަވަކަށް ހަދައި، އެމީހުންގެ ނައު ފޭރުމުން ސަލާމަތްކުރުމަށެވެ. ދެވަނަ ކަމަކީ، އެ ކުއްޖާއަކީ ބޮޑުވުމުން އޭނާގެ މައިންބަފައިންނަށް ނުބައިކަން ދައްކައި މަގުފުރައްދާނެ ކުއްޖެއް ކަމުގައިވާތީ، ﷲ ތަޢާލާ އިރާދަކުރެއްވީ އެ ދެމަފިރިންނަށް އެއަށްވުރެ ހެޔޮލަފާ ކުއްޖަކު ދެއްވުމަށެވެ. ތިންވަނަ ކަމަކީ، އެ ފާރަކީ ދެ ޔަތީމު ކުދިންގެ ފާރެކެވެ. އެ ފާރުގެ ދަށުގައި އެކުދިންގެ ބައްޕަ ރައްކާކޮށްފައިވާ ޚަޒާނާއެއް ފޮރުވިފައިވެއެވެ. އެކުދިން ބޮޑުވަންދެން އެ ޚަޒާނާ ރައްކާތެރިކުރުމަށްޓަކައި، ފާރު ވެއްޓުނަ ނުދީ ރަނގަޅުކޮށްދެއްވީއެވެ.
މި ވާހަކަ ކުދިންނަށް ކިޔައިދޭއިރު، ﷲ ތަޢާލާ މިންވަރުކުރައްވާ ކޮންމެ ކަމެއްގައިވެސް އަޅުގަނޑުމެންނަށް ނޭނގޭ ހެޔޮ ގޮތްތަކެއް ވާނެކަމާއި، ދަތި އުނދަގޫ ވަގުތުތަކުގައި ކެތްތެރިވުމުގެ މުހިންމުކަން އޮޅުންފިލުވައިދޭށެވެ.
