އިރުގެ ހޫނުން ދުނިޔެ ފިއްސަމުން ދިޔައިރު ޒަޔާންއާއި އޭނާގެ ހަ ރައްޓެހިން ތައްޔާރުވަމުން ދިޔައީ ދަތުރު ދިއުމަށެވެ. ވަޒީފާގެ ބުރަ ދުވަސްތަކަށްފަހު ޗުއްޓީއެއް ލިބުމުން މާލޭގެ ހަލަބޮލިކަމާއި ދުރަށް ގޮސް އުފާވެރި ޗުއްޓީއެއް ހޭދަކޮށްލުމަށެވެ.
“ކޮބާތަ އެ އާދިލްއާ ނާޔާ؟ ދުވަހަކުވެސް ނާދެވޭނެ ގަޑިއަކަށް.” ޒަޔާން ބުނެލިއެވެ.
“ހީވޭތަ ގަސްތަކުގައި ނުފޮޅޭ މާ ހުއްޓާ އެމީހުންނަށް އާދެވޭނެހެން.” ލާނެތް ފަޒީލް އެހެން ބުނެލުމާއެކު އެންމެން ހޭން ފެށިއެވެ.
“އޭތް އަހަރެމެން މިތިބީ. ކޮންމެހެން ފާޑުފާޑު އެއްޗެހި ކިޔާނެ ކަމެއް ނެތް.” އެހެން އެކުވެރިން ކައިރިއަށް އައިސް މަޑުކޮށްލި ނާޔާ ބުނެލިއެވެ.
“އަހަރެމެން ނުކިޔަމޭ މާބޮޑު އެއްޗެކޭ. އަހަރެމެން މި ކިޔަނީ ތި ދެމީހުންނަށް އާދެވޭނީ މާފޮޅުވާ ނިމިގެން ނޫންހޭ.” ފަޒީލްގެ ލޯބިވެރިޔާ ސާރާ ބުނެލިއެވެ.
“ހޫނ. މިހާރު މިއޮތީ އާދެވިފައެއްނު. ހިނގާބަލަ ދެންވެސް ދާން.” އެކުވެރިންގެ ސަމާސާއަށް ހުއްޓުމެއް ނާންނާނެކަން އެނގޭތީ ނާޔާ ބުނެލިއެވެ.
އެންމެން ގޮސް ދޯންޏަށް އެރުމާއެކު ޒަޔާން ދޯނި ދުއްވާލިއެވެ. ދަތުރު ފެށުމާއެކު ފޯރި ފެށުނުއިރު ތަންކޮޅެއް ދުރުގައި މަޑުމަޑުން އިނާޔާ އިނެވެ. އޭނާގެ މޫނުމަތިން ދަތުރަށް މާބޮޑު ޝައުޤުވެރިކަމެއް އޮތްފަދަ ކުލަވަރުތަކެއް ނުފެނެއެވެ. ދޭތެރެ ދޭތެރެއިން އޭނައަށް ބެލެނީ އެންމެން ތެރޭގައި ސަކަރާތް ޖަހައި އުޅުނު ނަޒްމީއަށެވެ.
“އޭތް. އިނާ ކީއްވެފަ މާދުރުގަ އެ އިންނަނީ؟” ނާޔާ އަހާލިއެވެ.
“އޭނައަށް އިނދެވޭނެތަ އެހެން ގޮތަކަށް. އޭނަގެ ހިތް ކަތިލާފަ ދެނަހުރި ކަމަށްވެސް ނުހަދާ މީހަކު އެބައުޅޭ ވިއްޔަ.” ފަޒީލް ނަޒްމީއާ ދިމާއަށް ގާބުރިއެއް އެއްލިއެވެ. ނަޒްމީ އަޅައެއް ނުލައެވެ.
“ނަޒްމީ. ދޭބަލަ އިނާ ގޮވައިގެން އަންނަން.” އާދިލް ބުނެލިއެވެ.
“އެއީ ކުޑަކުއްޖެއްތަ އަހަރެން ގޮސް އޭނަ އުރާލައިގެން ގެންނަން. ނާންނަންޏާ އިނދެދާނެއެއްނު.” ނަޒްމީ ފަރުވާކުޑަ ގޮތަކަށް ބުނެލިއެވެ. އިނާޔާއަށް އެ އަޑު އިވުނެވެ. އޭނާ ވަގުތުން ތެދުވިއެވެ. އެމީހުން ހީކުރަނީ ކީކޭ ކަމަށް ހެއްޔެވެ؟ ނަޒްމީއާނުލައި އޭނާއަށް ނޫޅެވޭނީ ހެއްޔެވެ؟ އެއީ ވަކި ކާކު ހެއްޔެވެ؟
ފަޒީލް އެމީހުން ގެންދިޔަ ލަވަ ޖަހާ ސެޓު އޮންކޮށްލިއެވެ. ފޯރިގަދަ ދިވެހި ލަވަތަކުގެ އަޑު ގަދަކޮށްލިއިރު ފަހަރަކު މީހަކު އެ ލަވަތަކަށް ފައިހަމަކުރަމުން ދިޔައެވެ. ބައެއް ފަހަރު ދެމީހުން އެއްކޮށްވެސް އަރައެވެ. އެގޮތުން އެއްފަހަރު ނަޒްމީއާ އިނާޔާއަށް އެއްކޮށް އެރުނު ފަހަރެއްގައި ފަޒީލް ގަސްތުގައި ވަރަށް ރޮމޭންޓިކް ލަވައެއް ޖެއްސިއެވެ. ކުޑަ ވަގުތުކޮޅަކަށް ހުއްޓުން އެރި ނަމަވެސް ދަތުރުގެ ފޯރި ކެނޑުނަ ނުދިނުމަށްޓަކައި އެ ދެމީހުން ވަރަށް ފުރިހަމައަށް އެ ލަވައަށް ރޮމޭންޓިކް ނެށުމެއް ހުށަހެޅިއެވެ. އެމީހުން ނިންމާލުމާއެކު އެންމެން އަތްތިލަބަޑި ޖަހާލިއިރު ތުނބުން ފުމެ އެމީހުންނާ ދިމާކުރިއެވެ. އިނާޔާގެ މޫނު ލަދުން ރަތްވިއެވެ. ނަމަވެސް ލަވަސެޓުގެ ފޯރި ދިޔައީ ގަދަވަމުންނެވެ.
އޮމާންކޮށް އޮތް ލޮނުގަނޑަށް ގުޑުމެއް އެރީ ކުއްލިއަކަށެވެ. ފުރަތަމަ ފަހަރު ތަންކޮޅެއް ކުޑަކޮށެވެ. ވުމާއެކު އަރާފައި ތިބި ފޯރިގަނޑުގައި އެމީހުންނަށް އެކަން ފާހަގައެއް ނުވިއެވެ. ދެވަނަ ފަހަރު ދޯނި ތަޅުވައިގަތްލެއް ބާރުކަމުން އެވަގުތު ކޮޅަށް ހުރި އިނާޔާ ދޯނީގެ އެއްފަރާތަށް ގުޅައަކަށް ޖެހުނެވެ. ނަޒްމީއަށް އެއްލި އަތުން އިނާޔާގެ އަތުގައި ހިފުނުކަން އެއީ ނަސީބެވެ. ނޫންނަމަ އޭނާ ދޯނީގެ މަތީ ބައިން ވެއްޓުނީހީ މާސިންގާ ކަނޑަށެވެ.
ސިކުންތުކޮޅެއްގެ ތެރޭގައި ހިނގި މި ކުޑަ ހާދިސާއަށްފަހު އެންމެން މައިތިރިވިއެވެ. އިނާޔާގެ އަރިކައްޓަށް ވީ ތަދުން ނާޔާ އިނީ އިނާޔާ އޭނާގެ ފައިމަތީ ބާއްވައިގެން މަޑުމަޑުން އޭނާގެ އަރިކަށި މޮޑޭށެވެ. ދަތުރުގެ ފޯރި ކުޑަވެދާނެތީ އިނާޔާ އޭނާ ރަނގަޅޭ ކީނަމަވެސް އޭނައަށް އިށީނދެލައިގެން އިންނަންވެސް އުނދަގުލެވެ.
ހުންގާނުގައި ހުރި ޒަޔާންއަށް ޖީޕީއެސްގައި މައްސަލައެއް އުޅޭކަން ފާހަގަވިއެވެ. އޭނާ ފޯނު ބަލައިލިއިރު ފޯނުވެސް މަސައްކަތެއް ނުކުރެއެވެ. އޭނާ އެހެން މީހުންނަށް އެކަން އަންގާލުމަށްޓަކައި ގޮވާލިއެވެ.
“އޭތް. މަގޭ ޖީޕީއެސް މަސައްކަތެއް ނުކުރޭ. އަހަރެމެން މިހާރު މިތިބީ ކޮން ހިސާބެއްގައިކަމެއް ނޭނގެ.” ކަންބޮޑުވެފައި ޒަޔާން ގޮވައިލިއެވެ.
“މާބޮޑު ކަމަކަށް ނުހަދާބަލަ. ކަނޑުމަތީގައި ތިކަހަލަ ކަންކަން ދިމާވާނެ. ކުރިއަށް ހިނގާ. އަހަރެމެން މިދަނީ ރަނގަޅު މިސްރާބަށް.” އާދިލް ހަމަޖެހިލާފައި ބުންޏެވެ.
“އެކަމަކު ޖީޕީއެސް ނެތި ކިހިނެއް ދާނީ؟ ފަރަކަށް އަރައިފިއްޔާޔޯ.” ޒަޔާން އަނެއްކާވެސް ބުނެލިއެވެ.
“ޒަޔާން ބުނަން. ތިކަހަލަ ފިނޑިންނަކަށް ކަންކަމެއް ނުވާނެ. ހިނގާ ކުރިއަށް. އެއްވެސް ކަމެއް ނުވާނެ.” އާދިލް ހަމަޖެހިލާފައި ބުނެލިއެވެ. އޭނާ ހާހެއް ނުވެއެވެ. ކަމުގެ ނުރައްކާތެރިކަން އޭނައަށް އިހުސާސެއް ނުކުރެވެއެވެ.
ކުއްލިއަކަށް އުޑުމަތި ބަދަލުވާން ފެށިއެވެ. ގަދައަށް ދިއްލާލާފައިވާ އަވި މަޑުވަމުން ގޮސް އަލިކަން ގެއްލިއްޖެއެވެ. ބޯ ވިލާތަކުން އުދަރެސް އެއްކޮށް ބައްދާލައިފިއެވެ. ކަނޑުގެ ރާޅުތައްވެސް ބޮޑުވާން ފެށީ ކުއްލިއަކަށެވެ. ދޯނި ކޮންޓްރޯލުން ނެއްޓޭން ފަށައިފިއެވެ. ގަދަ ވަޔާއެކު އައި ކޮޅިގަނޑެއްގައި ޖެހި އެންމެން ބިރުން ހަޅޭއްލަވަން ފެށިއެވެ. އެއްވެސް ކަމަކާ ހާސްނުވާ އާދިލްވެސް މިފަހަރު ހާސްވެއްޖެއެވެ.
ދޯނި އެނބުރެމުން ރާޅުތަކާ ތަޅަމުން ދިޔައިރު ދޯނީގެ ހަރަކާތް އާދަޔާ ޚިލާފަށް ބާރުވަމުން ދިޔަކަމެއް އެމީހުންނަކަށް އިހުސާސެއް ނުކުރެވެއެވެ. އެއަށްވުރެ އެމީހުން ތިބީ ބިރުގަނެފައެވެ. ކޮޅިގަނޑު އައުމާއެކު ދޯނީގެ ހިޔާކުރި ބަޔަށް ވަދެ އެންމެން ތިރީގައި އޮށޯވެގެން ތިބިއިރު ބޭރުގައި ހިނގާ ކަންކަމެއް އެމީހުންނަކަށް ނޭނގެއެވެ.
ކޮޅިގަނޑުގައި ދޯނި ތަޅުވައި ތަޅުވައި އެންމެން ތިބީ ވަރުބަލިވެގެން ނިދިފައެވެ. ހޭލެވުނުއިރު މޫސުން އޮތީ އިހު އޮތްގޮތަށް އިޔާދަވެފައެވެ. ބޭރު ބަލައިލިއިރު އެމީހުންނަށް ތިބެވުނީ މާކަނޑުގެ މެދުގައެވެ. ދުރުދުރުންވެސް ރަށެއްހާ ހިސާބުވެސް ފެންނާކަށް ނެތެވެ. ދޯނީގެ އިންޖީނުވެސް ވަނީ ހުއްޓިފައެވެ. ސަލާމަތް ނުވާނެފަދަ ހާދިސާއަކުން ސަލާމަތް ވީތީ އެމީހުންނަށް ލިބުނު ހައިރާންކަމުގައި ﷲ އަށް ޙަމްދު ކުރެވުނެވެ.
ޒަޔާންއާއި ފަޒީލް އިންޖީނު ސްޓާޓްކޮށްލިއެވެ. ކުރިއެކޭވެސް އެއްގޮތަށް ޖީޕީއެސް މަސައްކަތެއް ނުކުރިއެވެ. ދެން ދާންވީ ގޮތެއް ނޭނގިގެން އެވާހަކަ ދައްކަން ތިބެފައި ﷲ އަށް ވަކީލުކޮށްލާފައި ޒަޔާން ދޯނި ދުއްވާލިއެވެ. ރަށެއް ނުފެނި އެތައް އިރަކު ދުއްވަން ޖެހުނެވެ. އެއްވެސް މީހެއްގެ ފޯނެއް މަސައްކަތެއް ނުކުރިއެވެ. ދޯނި ދުއްވަމުން ދިޔައެވެ.
“އެކޮޅުން އެބަ ފެނޭ ރަށެއް.” ބިރުން އިން ނާޔާ ބުނެލިއެވެ.
ތެދެކެވެ. ވަރަށް ދުރުން ކުޑަކުޑަކޮށް ފުސްކޮށް ރަށެއް ފެންނަން އެބައޮތެވެ. ޒަޔާން އިންޖީނު ބާރުކޮށްލާފައި އެ ރާށާ ދިމާލަށް ދޯނީގެ މިސްރާބު ބަދަލު ކޮށްލިއެވެ. ރަށާއި ކައިރިވަމުން ދިޔަ ވަރަކަށް އެންމެންގެ ހިތުގައިވެސް ސުވާލު އުފެދެމުން ދިޔައެވެ. އެ ރަށުގައި ތަފާތެއް އެބަ ހުއްޓެވެ. މުޅި ރާއްޖޭގައި ދަތުރުކޮށްފައިވާ ފަޒީލްގެ ހަވަނަ ހިއްސު އިންޒާރު ދެމުން ދިޔައެވެ.
“އޭތް. އަހަންނަކަށް ހިޔެއްނުވޭ މީ ރަނގަޅު ރަށެއްހެންނެއް. ރާއްޖޭގައި ނޯންނާނެ އަހަރެން ނުދާ ފަޅު ރަށެއްވެސް. އެކަމަކު މި ރަށް އަހަރެން މި ދުށީ އަލަށް.” ފަޒީލް ބުނެލިއެވެ.
“އެއްކަލަ ފަޒީލް. ކަލޭ ހާދަ ބިރެއް ގަނެޔޭ ދޯ. ކީކޭތަ ތި ކިޔަނީ؟ ރަނގަޅު ރަށެއްހެނެއް ހިޔެއްނުވެޔޭ!” އާދިލް ކުޑަކޮށް ހިތްހަމަނުޖެހިފައި މަލާމާތުގެ ރާގަކަށް ބުނެލިއެވެ.
“އާނ. އެހެން މި ކިޔަނީ. އަހަންނަށް ފެންނަނީ ދޯނި އަނބުރާލަން. އެހެން ދިމާލަކަށް ދުއްވާ.” ޒަޔާން ގާތު ފަޒީލް ބުނެލިއެވެ.
“އޭތް ފަޒީލް. ކަލޭ ފާޑުފާޑު ވާހަކަ ނުދައްކާ ހުރޭ އިނގޭ. މީގަ އެބަތިބި ޒުވާން ތިން އަންހެންކުދިން. އެމީހުން ބިރުގަންނަވަން ފާޑުފާޑު ވާހަކަ ނުދައްކާ.” އާދިލް އަނެއްކާވެސް ހިތްހަމަނުޖެހިފައި ބުންޏެވެ.
“ފަޒީލް. އެބުނާހެން ތިކަހަލަ ވާހަކަ ނުދައްކަބަލަ. އަހަންނަކަށް ނުފެނޭ ކޮޅު ބަދަލު ކުރާކަށް. އެ ރަށަށް ދާން ފެންނަނީ.” ޒަޔާން ވެސް ހަމަޖެހިލެވޭތޯ މަސައްކަތްކުރަމުން ބުނެލިއެވެ.
ރަށާއި ކައިރިވީ ވަރަކަށް އެ ރަށުގެ ތަފާތުކަން ފާހަގަކުރެވެމުން ދިޔައެވެ. ދުރުން ފެނުނު ފުސް ކަމަށްވުރެ ކައިރިވުމުން ފެނުނު ފުސްކަންވެސް އިތުރެވެ. ރުއްތަކާއި ގަސްތައްވެސް ހުރީ ފުސް ކުލައެއްގައެވެ. ގޮނޑުދޮށަށް ދޯނި ކައިރިކުރުމާއެކު އެކުވެރިން ފައިބަން އުޅުނެވެ.
“އޭތް. ނުފައިބާ. އަހަންނަށް އަދިވެސް ފެންނަނީ އަނބުރާލާފަ ދާން. މިތަން އޮތްގޮތް ބަލާބަލަ. ވެލިގަނޑުވެސް މިހިރީ އަޅިކުލައިގައި. މިތަނުން މިއޮއް ދުވަނީވެސް ކޮންކަހަލަ ވަހެއް. ވަރަށް ބާ ވަހެއް.” ފަޒީލް ބުނެލިއެވެ.
“ފަޒީލް. ކަލޭ ހަމަ ފިނޑީ. އަހަރެމެން ބެހިގެން މި އާދެވުނީ ރާއްޖޭން ބޭރަށް ކަންނޭނގެ. ބޭރުގެ ބައެއް ރިސޯޓުތަކާއި ރަށްތަކުގައި މިކަހަލަ ވެލިގަނޑު ހުރޭ. ހިނގާ ފައިބަމާ.” އެހެން ބުނުމާއެކު އާދިލް ދޯނިން ފުންމާލައިފިއެވެ. އަދި ވާ ހިފައިގެން ގޮސް ކައިރީގައި ހުރި ވަރުގަދަ ރުކެއްގައި އައްސާލައިފިއެވެ. ދެން ނާޔާ އާދި އެހެން އެކުވެރިން ފޭބުމުގައި އެހީތެރިވެދިނެވެ. ގެނައި ސާމާނުތައްވެސް ބޭލުމަށްފަހު އެންމެން ރަށުތެރެއަށް ދާން ހިނގައިގަތެވެ.
“މި ހިޔެއްނުވޭ ފަޅު ރަށެއްހެނެއް. މިހިރީ މަގުތައްވެސް ހަދާލާފަ ހުރިލެއް ސަޅިކަން.” ނާޔާ ބުނެލިއެވެ. ކަނޑުމަތީގައި ހިނގި ބިރުވެރި ހާދިސާއަށްފަހު އޭނާއަށް ހަމަޖެހިލެވުނީ އަދި ކިރިޔާއެވެ.
“އެކަމަކު މި ރަށް ހާދަ ތަފާތޭ.” އިނާޔާ ބުނެލިއެވެ.
“މި އެއްވަރުތަ؟” އަތްތިލައިގެ އިނގިލިތައް ދައްކާލަމުން އާދިލް ބުނެލިއެވެ.
“ފަޅު ރަށެއް ނޫންނަމަ ގައިމު މީހުންގެ ހިލަމެއް ވާނެއެއްނު.” ނަޒްމީ ބުނެލިއެވެ.
“ފަޅު ރަށެއް ވިޔަސް މިރަށުން ދޫންޏެއްގެ އަޑު ނަމަވެސް އިވެން ވާނެތާ. އެކަމަކު ދޫންޏެއް ކީއްކުރަން ފަތެއް ހެލިލާ އަޑުވެސް ނީވޭ.” ސާރާ ބުނެލިއެވެ.
ސާރާގެ ހިތް ނުތަނަވަސް ކުރުވަމުން ދިޔައީ އެރަށަށް އެރުމާއެކު ކުރެވުނު ތަފާތު އިހުސާސުންނެވެ. އެ އާދަޔާ ޚިލާފު ހިމޭންކަމުން މުޅި ތަނުގައި އުފެދިފައިވަނީ ބިރުވެރިކަމެކެވެ. ހިމޭންކަމަކީ އޭނާ އަބަދުވެސް ޖެހިލުންވާ ކަމެކެވެ. ހިތަށް ބިރުވެރިކަން ވައްދާ ކަމެކެވެ. އޭނާގެ ސަމާސާ މިޒާޖަކީ ވެސް އެކަމުން ސަލާމަތްވާން އޭނާ ގެންގުޅޭ ހަތިޔާރެކެވެ.
އެންމެން އެކި ވާހަކައިގައި ކުރިއަށް ހިނގަމުން ދަނިކޮށް ގަސްތަކުގެ ތެރެއިން ގެތަކެއް ފެންނަން ފެށިއެވެ. އެ ގެތައް ހުރީ މީގެ ފަންސާސް ނުވަތަ ފަސްދޮޅަސް އަހަރު ކުރީގެ ދިވެހި ގެތައް ހުންނަ ގޮތަށެވެ. އުވަޖެހި ބޮލި ބާރުތަކާއި ފަންގިލީ އާޓޫތަކެވެ. މަގުމަތީގައި ހުރި ބޮކިތައް ހުރީ ވަރަށް ބާވެފައެވެ.
“ބަލާބަލަ. މިތަނުގައި މީހުން އުޅޭ.” ހައިރާންވެފައި ސާރާ ބުންޏެވެ.
ދޮރުމަތީގައި އިށީނދެގެން ތިބި މީހުން ފެނުމުން އެންމެން މަޑުޖެހުނެވެ. އެމީހުން ލައިގެން ތިބީ ކުރީގެ ދިވެހި ހެދުންތަކެވެ. ފިރިހެނުން މުންޑު އަނދެގެން ހުސްގަޔާ ތިބިއިރު އަންހެނުން ތިބީ ދިވެހި ލިބާހުގައެވެ. އެކަމަކު އެންމެންގެ މޫނުމަތިންވެސް ފެންނަނީ އެއްވެސް ދިރުމެއް ނެތް ފާޑެއްގެ ހުސްކަމެކެވެ. އެމީހުންގެ ނަޒަރު ހުރީ އެއް ދިމާލަކަށް ހުއްޓިފައެވެ.
(ނުނިމޭ)
