އދ.ދަނގެތީ ޖަމިއްޔަތުލް އަންވާރުން އިންތިޒާމްކޮށްގެން ބާއްވާ 14 ވަނަ ފުޓްސަލް މުބާރާތް “އަންވާރު ފުޓްސަލް ކަޕް 2026” ފިތުރު ޢީދު ދުވަހު ފެށުމަށް ހަމަޖެހިއްޖެއެވެ.

މި މުބާރާތަކީ ޒުވާނުންގެ މެދުގައި ފުޓްސަލް ކުރިއެރުވުމާއި، ކުޅުންތެރިންގެ އަޚްލާޤު ރަނގަޅުކުރުމާއި، ކުޅުންތެރިންގެ މެދުގައި ގުޅުން ބަދަހިކުރުމުގެ އިތުރުން ޒުވާނުންގެ ހިތްތަކުގައި ފުޓްސަލްއަށް އޮތް ލޯބި އިތުރުކޮށް ޖަމިއްޔާއާ ގުޅުން ބަދަހިކުރުމަށް އަދި މުބާރާތަކީ ރާއްޖޭގެ ފެންވަރުގައި ފާހަގަކޮށްލެވޭ މުބާރާތަކަށް ހެދުމުގެ މަޤްސަދުގައި ބާއްވާ މުބާރާތެކެވެ.

މުޅި ރާއްޖެއަށް ހުޅުވާލައިގެން ކުރިއަށް ގެންދާ މި މުބާރާތަކީ އަތޮޅުގެ ރަށްތަކާއި ރިސޯޓްތަކުގެ ތަރުހީބު ނުހަނު ބޮޑަށް ލިބިފައިވާ މުބާރާތެކެވެ. ޗެމްޕިއަން ޓީމަށް -/30000 (ތިރީސްހާސް) ރުފިޔާ އަދި ރަނަރަޕް ޓީމަށް -/15000 (ފަނަރަހާސް) ރުފިޔާ ކަނޑައެޅިފައިވާ މި މުބާރާތުގައި ބައިވެރިވުމަށް -/4000 (ހަތަރުހާސް) ރުފިޔާގެ ފީއެއް ދައްކަން ޖެހެއެވެ.

މި އަހަރުގެ މުބާރާތުގައި ބައިވެރިވުމުގެ މުއްދަތު މި މަހުގެ ފަސްވަނަ ދުވަހު ހަމަވެފައިވާއިރު، 14 ޓީމެއް ވަނީ ބައިވެރިވެފައެވެ. އެއީ 2 ރިސޯޓާއި، އދ. ޕޮލިސް ތަމްސީލްކުރާ ޓީމެއްގެ އިތުރުން މުބާރާތް ބާއްވާ ދަނގެއްޗަށް ނިސްބަތްވާ 4 ޓީމު އަދި މަންދޫ 3 ޓީމާއި މަހިބަދޫ 4 ޓީމެވެ.

ވޭތުވެދިޔަ އަހަރުގެ ޗެމްޕިއަން ދަނގެތީ ސްޓެލްކޯ މި އަހަރުގެ މުބާރާތުގައި ބައިވެރިއެއް ނުވެއެވެ. ޗެމްޕިއަން ޓީމު ވާދަނުކުރާއިރު، ރަނަރަޕް ވިލަމެންދޫ ރިސޯޓް މި އަހަރުގެ މުބާރާތުގައި ވެސް ވާދަކުރާނެއެވެ.

އަންވާރު ކަޕްގެ އެކި މުބާރާތްތަކުގައި ރާއްޖޭގެ މަޝްހޫރު ވަރަށް ގިނަ ފުޓްސަލް ކުޅުންތެރިން ވަނީ ކުޅެފައެވެ. ޓީމުތަކުން ހާމަކުރާ މަޢުލޫމާތަށް ބަލައިލާއިރު އެފަދަ އެތައް ކުޅުންތެރިންނެއް މި އަހަރުގެ މުބާރާތުގައި ވެސް ފެންނާނެއެވެ.

13 ވަނަ މުބާރާތުގެ އެންމެ މޮޅު ކުޅުންތެރިޔާގެ މަގާމާއި މުބާރާތުގެ އެންމެ ގިނަ ލަނޑު ޖެހި ކުޅުންތެރިޔާގެ މަގާމް ހޯދި މުޙައްމަދު ނާއިމް މި އަހަރުގެ މުބާރާތުގައި ކުޅެނީ އދ. ދަނގެތީ އެފްސީ ބިރަކާނުލާ ޓީމަށެވެ.

13 އަހަރުގެ ކާމިޔާބު ދިގު މާޒީއެއް އޮތް މި މުބާރާތް މިލްކުކުރި ހަމައެކަނި ޓީމަކީ އދ. ފެންފުށީ ބުރަދާސް އެފްސީއެވެ.