މެކްސިކޯގެ ޒަކަޓެކާސް އަށް ނިސްބަތްވާ އުމުރުން 25 އަހަރުގެ އަނާ ވިކްޓޯރިއާ އެސްޕިނޯ ޑި ސަންޓިއާގޯ ވަނީ، “އޮޓޮނޮމަސް ޔުނިވަރސިޓީ އޮފް ޒަކަޓެކާސް” އިން ގާނޫނީ ދާއިރާއިން ކިޔަވައި ނިމި، ޑައުން ސިންޑްރޯމް ހުންނަ ކުދިންގެ ތެރެއިން ދުނިޔޭގައި ވެސް ފުރަތަމަ ފަހަރަށް ގާނޫނީ ވަކީލަކަށް ވުމުގެ ޝަރަފު ހޯދާފައެވެ. އޭނާގެ މި ކާމިޔާބީއަކީ ވަރުގަދަ އަޒުމާއި، އާއިލާގެ އެހީތެރިކަމާއި، އަދި ތަޢުލީމު އުގެނުމުގެ ފުރުސަތު ފަހިވެފައި އޮތްނަމަ، ކޮންމެ ހުރަހެއްވެސް ގިރާކުރެވިދާނެކަމުގެ ދިރިހުރި މިސާލެކެވެ.
އަނާ ވިކްޓޯރިއާގެ މި ދަތުރަކީ އެހާ ފަސޭހަ ދަތުރެއް ނޫނެވެ. އޭނާ ސާނަވީ ތަޢުލީމު ފުރިހަމަކުރީ އޮންލައިންކޮށެވެ. އަދި ޔުނިވަރސިޓީގެ ނިޒާމަކީ ޚާއްޞަ އެހީއަށް ބޭނުންވާ ކުދިންނަށް އެންމެ އެކަށޭނަ ގޮތަކަށް ބައްޓަންކުރެވިފައިވާ ނިޒާމަކަށް ނުވިޔަސް، އާއިލާގެ ފުރިހަމަ އެއްބާރުލުމާއެކު އޭނާ ގަދައަޅާ މަސައްކަތްކުރިއެވެ. މިގޮތުން، ފާއިތުވި ފަސް އަހަރު ދުވަހު އޭނާގެ ކިޔެވުމުގެ ކަންކަމުގައި އެހީތެރިވެދިން “ޝެޑޯ ޓީޗަރު”ގެ ދައުރު، ވަކީލަކަށް ވުމުގެ ހުވަފެން ހަގީގަތަކަށް ހެދުމުގައި ވަރަށް ބޮޑެވެ.
ގާނޫނީ ވަކާލާތުގެ އިތުރުން، އަނާއަކީ ކުރެހުމުގެ ރަނގަޅު ހުނަރެއް ލިބިފައިވާ ފަންނާނެއްވެސް މެއެވެ. އޭނާގެ އަމާޒަކީ މުޖުތަމައުގައި ހުރި ތަފާތުކުރުންތަކާ ދެކޮޅަށް މަސައްކަތްކޮށް، ޚާއްޞަ އެހީއަށް ބޭނުންވާ ފަރާތްތަކުގެ ހައްގުތަކަށް ވަކާލާތުކުރުމެވެ. މިހާރުވެސް ސްޕެއިން، ޕެރޫ އަދި ޗިލީ ފަދަ ގައުމުތަކުން އޭނާއަށް ވަޒީފާގެ ފުރުސަތުތައް ލިބިފައިވާއިރު، އޭނާގެ އުންމީދަކީ ސިޔާސީ ދާއިރާއަށް ނުކުމެ، ގާނޫނު ހަދާ މަޖިލީހުގެ މެންބަރެއްގެ ގޮތުގައި އެހެން ނުކުޅެދޭ މީހުންނަށް މަގުފަހިކޮށްދިނުމެވެ.
އޭނާގެ މި ވާހަކައިން ސާބިތުކޮށްދެނީ، އެކަށީގެންވާ އެހީތެރިކަމާއި ހިތްވަރު ލިބިއްޖެނަމަ، އިންސާނާގެ މަގުގައި ހުރި ހުރަސްތައް ނައްތާލައި، އައު ތާރީޚެއް ލިޔެވިދާނެ ކަމެވެ.
