މިއީ ނިއުޒީލޭންޑްގެ ނޭޝަނަލް އެކުއޭރިއަމްގައި އުޅުނު ‘އިންކީ’ ނަމަކަށް ކިޔާ ބޯވައެއް، އެންމެން ހައިރާންކޮށްލުމަށްފަހު މިނިވަންކަމަށް ކުރި ދަތުރުގެ ވާހަކައެވެ.
އިންކީ ކެތްތެރިކަމާއެކު އިންތިޒާރު ކުރަމުންދިޔައީ އެކުއޭރިއަމްގެ މުވައްޒަފުން މަސައްކަތް ނިންމާލާފައި ގެއަށްދާނެ ވަގުތަކަށެވެ. މުޅި ތަން ހިމޭންވުމުން، އެސޮރު އުޅޭ ތާނގީގެ މަތިން ކުޑަކުޑަކޮށް ހުޅުވިފައި ހުރި ތަންކޮޅަކުން، ފުޓުބޯޅައެއްގެ ބޮޑުމިން ހުރި އޭނާގެ ހަށިގަނޑު ލޫދިފައި ބޭރަށް ނިކުތެވެ.
ނަމަވެސް އެސޮރު އަކުއޭރިއަމްގެ ތަޅުންގަނޑު މަތީގައި އަމާޒެއް ނެތި ފިރުކުނީކީ ނޫނެވެ. އޭގެ ބަދަލުގައި، އިންކީ ދިޔައީ ސީދާ އެ ތާނގީގެ ފެން ބޭރުކުރާ ހޮޅިއާ ދިމާލަށެވެ. ބޯވަޔަކީ ކަށީގެ އެއްވެސް މިންވަރެއް ހަށިގަނޑުގައި ހުންނަ އެއްޗަކަށް ނުވުމުން، ވަރަށް ފަސޭހަކަމާއެކު އެސޮރުގެ މުޅި ހަށިގަނޑު ހަނިކޮށްލައިގެން އެ ހޮޅީގެ ތެރެއަށް ދެމިގަތެވެ. އަދި 6 އިންޗީގެ އެ ހަނި ހޮޅީގެ ތެރެއިން 150 ފޫޓަށްވުރެ ދުރަށް ދަތުރުކޮށް، ސީދާ ކަނޑުގެ ލޮނުގަނޑަށް ނިކުމެ މިނިވަންވިއެވެ.
މީގެ ފަހުން ކޮންމެ ފަހަރަކު ބޯވައެއް ފެނުމުން ހަނދާންކުރާށެވެ. ތިޔަ ބަލަނީ ދުނިޔޭގައިވާ އެންމެ ސިއްރުވެރި އަދި ފިލުމަށް އެންމެ ހުޝިޔާރު މާހިރަށެވެ!
