ދެކުނު ކޮރެއާގެ މީޑިއާ ރިޕޯޓްތަކުން ހާމަކޮށްފައިވާ ގޮތުގައި، ޖޭ.ޓީ.ބީ.ސީ އިން ދެއްކި މަޤުބޫލު ޑްރާމާ ސީރީޒްއެއް ކަމަށްވާ “ބިޔޯންޑް ދަ ބާ” ގެ ދެވަނަ ސީޒަނެއް ފެނުމުގެ ފުރުސަތު ވަނީ ބޮޑުވެފައެވެ.
މިކަމާ ގުޅިގެން މިމަހުގެ ފުރަތަމަ ދުވަހު މި ޑްރާމާ އުފައްދާ ކުންފުނި ކަމަށްވާ އެސް.އެލް.އެލް އިން ބުނެފައިވަނީ، ދެވަނަ ސީޒަނެއް އުފެއްދުމާ ގުޅޭގޮތުން މިހާރު ދަނީ މަޝްވަރާ ކުރެވެމުން ކަމަށެވެ. ނަމަވެސް، ޝޫޓިން ފަށާނެ ތާރީޚަކާއި މީގައި ބައިވެރިވާނެ ކާސްޓުން ފަދަ މުހިންމު މަޢުލޫމާތުތައް އަދި ކަށަވަރު ނުވާކަމަށް އެ ކުންފުނިން ހާމަކުރެއެވެ.
“ބިޔޯންޑް ދަ ބާ” އަކީ ޤާނޫނީ ދާއިރާގެ މަސައްކަތްތަކުގެ މައްޗަށް ބިނާކޮށް އުފައްދާފައިވާ އޮފީސް ޑްރާމާއެކެވެ. މީގެ ވާހަކަ ބިނާވެފައިވަނީ ‘ޔޫލިމް ލޯ ފާމް’ އާ އަލަށް ގުޅޭ، ހިންގުންތެރި އަދި އިންސާފަށް ލޯބިކުރާ، ނަމަވެސް އިޖުތިމާއީ ކަންކަމަށް އާދައިގެ ވަކީލެއް ކަމަށްވާ ހިޔޯ މިން (ޖަންގް ޗައޭ ޔޮން) ގެ މައްޗަށެވެ. މި ސީރީޒުން ފެނިގެންދަނީ އެ ފާމްގެ ޕާޓްނަރެއް ކަމަށްވާ ޔޫން ސިއޮކް ހޫން (ލީ ޖިން ވޫކް) އާ ދެމެދު ހިނގާ ކުރިމަތިލުންތަކާއި، އޭނާގެ ވަކީލުކަމުގެ ހަޔާތުގައި ކުރިއެރުންތައް ހޯދާ ގޮތެވެ.
މިދިޔަ އަހަރުގެ އޮގަސްޓް މަހުން ފެށިގެން ސެޕްޓެމްބަރު މަހުގެ ނިޔަލަށް ދެއްކި މި ޑްރާމާއަށް އާންމުންގެ ބޮޑު ތަރުހީބެއް ލިބިފައިވެއެވެ. އެގޮތުން މުޅި ޤައުމުގެ ވިއުއަރޝިޕް ރޭޓިންގް 9.1 އިންސައްތައަށް އަރާފައިވެއެވެ. މި ސީރީޒްގެ މައިގަނޑު ރޯލުތަކުން ފެނިގެންދަނީ ލީ ޖިން ވޫކް، ޖަންގް ޗައޭ ޔޮން، ލީ ހަކް ޖޫ އަދި ޖިއޯން ހްޔޭ ބިން އެވެ.
ކިމް ޖައޭ ހޮންގް ޑައިރެކްޓްކޮށް، ޕާކް މީ ހިޔޮން ސްކްރިޕްޓް ލިޔެފައިވާ މި ޑްރާމާގެ ދެވަނަ ސީޒަނަކަށް ގިނަ ބަޔަކު މިހާރު ތިބީ ކެތްތެރިކަމެއް ނެތި އިންތިޒާރުކޮށްގެންނެވެ.
