ދުނިޔޭގެ މަޝްހޫރު ޕޮޕް ލަވަކިޔުންތެރިޔާ މެޑޯނާ، އޭނާގެ އެންމެ ކާމިޔާބު އެއް އަލްބަމް ކަމަށްވާ ‘ކޮންފެޝަންސް އޮން އަ ޑާންސް ފްލޯ’ ގެ ދެވަނަ ބައި ނެރޭނެ ތާރީޚު އިޢުލާންކޮށް، އާ އަލްބަމްގެ ކަވަރު ދައްކާލައިފިއެވެ.
އުމުރުން 65 އަހަރުގެ މެޑޯނާ، އޭނާގެ ރަސްމީ ސޯޝަލް މީޑިއާ އެކައުންޓްތައް މެދުވެރިކޮށް މި ޚަބަރު ހިއްސާކުރިއިރު، އާ އަލްބަމްގެ ކަވަރުން އޭނާ ފެންނަނީ ވަރަށް ޒުވާންކޮށް އަދި ސްޓައިލިޝްކޮށެވެ. މި ކަވަރު ފެނިފައި ގިނަ އަދަދެއްގެ ފޭނުންނަށް ވަނީ ބޮޑު ހައިރާންކަމެއް ލިބިފައެވެ.
ކޮންފެޝަން އޮން އަ ޑާންސް ފްލޯރ – ޕާރޓް 1- 03 ޖުލައި 2026
މެޑޯނާ ހާމަކޮށްފައިވާ ގޮތުގައި ‘ކޮންފެޝަންސް’ ޕާޓް 2 ނެރުމަށް ހަމަޖެހިފައިވަނީ މިއަހަރުގެ ފަހުކޮޅުގައެވެ. މި އަލްބަމަކީ 2005 ވަނަ އަހަރު ނެރުނު ކާމިޔާބު އަލްބަމްގެ ކުރިއަށް އޮތް ބައި ކަމަށްވާތީ، މިއީ މިއުޒިކް އިންޑަސްޓްރީގައި މިވަގުތު އެންމެ ބޮޑަށް އިންތިޒާރު ކުރެވޭ އެއް މަސައްކަތެވެ.
މި އަލްބަމްގެ މަސައްކަތް ކުރިއަށްދަނީ އެމެރިކާގެ ނިއުޔޯކްގައެވެ. މެޑޯނާ މި އަލްބަމް ނެރެން ނިންމީ އޭނާގެ މިއުޒިކީ ދަތުރުގެ ފާއިތުވި ދުވަސްތަކުގެ ހަނދާންތައް އާކޮށް، އާ ޖީލުގެ މިއުޒިކަށް ލޯބިކުރާ ފަރާތްތަކަށް ތަފާތު އަސަރުގަދަ ލަވަތަކެއް ހަދިޔާކުރުމުގެ މަގްސަދުގައެވެ.
އާ އަލްބަމްގެ ކަވަރު ފޮޓޯއާއެކު އޭނާ ވަނީ އަލްބަމްގައި ހިމެނޭ ބައެއް ލަވަތަކުގެ ކުރު ވީޑިއޯ ކޮޅުތަކެއްވެސް ދައްކާލާފައެވެ. މިއާއެކު މުޅި ދުނިޔޭގެ މިއުޒިކް ޗާޓުތަކުން މި އަލްބަމަށް ބޮޑު ތަރުހީބެއް ލިބޭނެ ކަމަށް މިއުޒިކް ކްރިޓިކުން ލަފާކުރެއެވެ.
