ކޯޗެލާ ފެސްޓިވަލްގައި ސެބްރީނާ ކާޕެންޓާގެ ޝޯގައި މެޑޯނާ ސަޕްރައިޒެއްގެ ގޮތުގައި ފެނިލުމުން ސޯޝަލް މީޑިއާގައި ބޮޑު ބަހުސެއް ފެށިއްޖެއެވެ.
އެޕްރީލް 17 ވަނަ ދުވަހު ކޯޗެލާގައި ކާޕެންޓާގެ ސެޓް ތެރެއިން މެޑޯނާ ސްޓޭޖް ދަށުން އެރީ އޭނާގެ 1990 ވަނަ އަހަރުގެ ހިޓް ލަވަ ‘ވޯގް’ގެ އިންސްޓްރުމެންޓަލާ އެކުގައެވެ. މެޑޯނާ އެރީ ދަނބުކުލައިގެ ކޯސެޓެއް، އެ ކުލައިގެ ތިރިއެއް، އުޅަނބޮށްޓާ ހަމައަށް ހުރި އަންގިއެއް އަދި ކަކުލާ ހަމައަށް ހުރި ބޫޓެއް ލައިގެންނެވެ. ކާޕެންޓާ ޕާފޯމްކުރީ ހުދު ކުލައިގެ ލޭސް ބޮޑީސޫޓެއް ލައި ސިލްވާ ހީލް އަކަށް އަރައިގެންނެވެ. ދެ ތަރިން އެކުގައި ‘ވޯގް’ އާއި ‘ލައިކް އަ ޕްރެޔާ’ ޕާފޯމްކުރިއެވެ. އަދި މެޑޯނާގެ ކުރިއަށް އޮތް އެލްބަމްކޮންފެޝަންސް ޓޫ’ އާ ގުޅޭ އައު ލަވައެއް ކަމަށް ބެލެވޭ ލަވައެއް ވެސް ހުށަހެޅިއެވެ.
“ވާއު، ޝުކުރިއްޔާ… ސެބްރީނާ، ކަލޭގެ ޝޯއަށް އަހަރެންނަށް ދައުވަތު ދިނީތީ ވަރަށް ބޮޑަށް ޝުކުރިއްޔާ،” ސްޓޭޖް މަތީ ހުރެ މެޑޯނާ ބުންޏެވެ.
“ޝުކުރު ބޭނުމެއް ނޫން، މެޑޯނާ،” ކާޕެންޓާ ޖަވާބުދިނެވެ.
ދެ ތަރިން ބެލުންތެރިންގެ ކުރިމަތީ އަތު ގުޅައިލިއެވެ.
“މީގެ 20 އަހަރު ކުރިން މިއަދު އަހަރެން ކޯޗެލާގައި ޕާފޯމްކުރިން… މިއީ ފުރިހަމަ ބުރެއް ހަމަވި ވަގުތެއް… އަހަރެންނަށް ވަރަށް މާނަ ފުން ވަގުތެއް،” މެޑޯނާ ބެލުންތެރިންނަށް ބުންޏެވެ. “މިއުޒިކްގެ ރީތި ކަމަކީ މީހުން އެއްތަންކުރުވާ ކަން… އެންމެން އެކުގައި ރަނގަޅު ވަގުތެއް ހޭދަކުރޭ، ދޯ؟” މެޑޯނާ އިތުރަށް ބުންޏެވެ. ހަމައެއާ އެކު، ދުވަހަކު ވެސް އޭނާއަށް ވުރެ “ކުރު” މީހަކާ އެކު ޕާފޯމް ނުކުރާ ކަމަށް ބުނެ މެޑޯނާ ސަމާސާވެސް ކުރިއެވެ.
ޕާފޯމެންސްގެ ވީޑިއޯ ފެތުރުމާ އެކު ސޯޝަލް މީޑިއާގައި ޚިޔާލުތައް ދެކަފިވިއެވެ.
“ބައެއް މީހުންނަށް އެ މީހުންގެ ޒަމާން ފާއިތުވީކަން ގަބޫލެއް ނުކުރެވޭ! ކެރިއަރު ހަލާކުކޮށްލާފައި އެއް ސީޒަން އިތުރަށް ކުޅެން އުޅޭ އެތުލީޓެއް ފަދައިން!” އެކަކު ލިޔުނެވެ.
“އޭނާގެ ނާސިސިޒަމް ކޮމަން ސެންސަށް ވުރެ ވަރުގަދަ. އޭނާ ދަނީ އަމިއްލަ ނަފްސު ފަޟީހަތް ކުރަމުން،” އެހެން މީހަކު ލިޔުނެވެ.
ނަމަވެސް އެއްބައި މީހުން މެޑޯނާ ދިފާއުކުރިއެވެ.
“އޭނާ ހާދަ ރީއްޗޭ. ދެ ތަރިންގެ ވެސް ދިނީ ފެންޓާސްޓިކް ޕާފޯމެންސެއް،” އެކަކު ލިޔުނެވެ.
“މޮޅު ކަމެއް! ބައްޕައިންގެ ބައްޕައިންގެ ޒަމާން ނިމިއްޖެ! 60ގެ އުމުރުގައި ވެސް އަންހެނުން 30 ހެން ފެންނަނީ. ކަސްރަތު، ރަނގަޅު ކެއުން، ރީތި ހެދުން، ރަނގަޅު ޕްލާސްޓިކް ސާޖަނެއް ވެސް ގޯހެއް ނޫން!” އިތުރު މީހަކު ބުންޏެވެ.
މިއީ 2006 ވަނަ އަހަރަށް ފަހު ގާތްގަނޑަކަށް 20 އަހަރު ފަހުން ކޯޗެލާ ފެސްޓިވަލަށް މެޑޯނާ އެނބުރި އައި ފަހަރެވެ.
