ހިންދީ ފިލްމު “އުޓްސަވް” ގައި ރޭކާއާއެކު ފުރަތަމަ މަންޒަރު ކުޅުނުއިރު ވަރަށް ބޮޑަށް ހާސްވި ކަމަށް ބޮލީވުޑްގެ ތަޖުރިބާކާރު އެކްޓަރު ޝޭކަރް ސުމަން ބުނެފިއެވެ. 1984 ވަނަ ނެރުނު މި ފިލްމަކީ ޝޭކަރް ސުމަން ފިލްމީ ދާއިރާއަށް ތަޢާރަފުވި ފިލްމެވެ.
މި ފިލްމުގައި މަޝްހޫރު ބަތަލާ ރޭކާއާއެކު ފުރަތަމަ މަންޒަރު ކުޅެން ޖެހުނު ވަގުތު އޭނާ ހުރީ ވަރަށް ބޮޑަށް ހާސްވެ، ބިރުގެންފައިކަމަށް ޝޭކަރް ސުމަން ބުންޏެވެ. ނަމަވެސް، ރޭކާގެ ފަރާތުން ލިބުނު އެހީތެރިކަމާއި ހިތްވަރުގެ ސަބަބުން އެ މަންޒަރު ފުރިހަމަކުރުމަށް ފަސޭހަވެގެން ދިޔަކަމަށް އޭނާ ފާހަގަކުރިއެވެ.
މީގެ އިތުރުން ޝޭކަރް ވަނީ އޭނާގެ ފިލްމީ ކެރިއަރު ބިނާކޮށްދިނުމުގައި ކުރީގެ މަޝްހޫރު އެކްޓަރު ޝަޝީ ކަޕޫރް އަދާކުރި ދައުރަށް ވަރަށް ބޮޑަށް ތަޢުރީފުކޮށްފައެވެ. “އުޓްސަވް” އަކީ ޝަޝީ ކަޕޫރް ޕްރޮޑިއުސްކުރި ފިލްމަކަށް ވާއިރު، އެއްވެސް ތަޖުރިބާއެއް ނެތް އާ ފަންނާނަކަށް އެފަދަ ބޮޑު ފިލްމަކުން ފުރުސަތު ދިނީތީ އޭނާ ޝަޝީއަށް ވަރަށް ބޮޑަށް ޝުކުރުވެރިވެއެވެ. ޝޭކަރް ބުނި ގޮތުގައި އޭނާގެ މުޅި ފިލްމީ ޙަޔާތް ދަރަނިވެރިވެފައިވަނީ ޝަޝީ ކަޕޫރްގެ އޯގާތެރިކަމަށެވެ.
ޝޭކަރް މި ވާހަކަތައް ހިއްސާކޮށްފައިވަނީ ދާދި ފަހުން ދިން އިންޓަވިއުއެއްގައެވެ. މި އިންޓަވިއުގައި އޭނާ ވަނީ ފިލްމީ ދާއިރާގައި ހޭދަކުރި ދިގު މުއްދަތުގެ ތަޖުރިބާތަކާއި، އޭރުގެ ބޮޑެތި ތަރިންގެ ފަރާތުން ލިބުނު އިޙުތިރާމާއި އެހީތެރިކަމުގެ މައްޗަށް އަލިއަޅުވާލާފައެވެ. ޝޭކަރް ސުމަންއަކީ މިހާރުވެސް ބޮލީވުޑްގެ އެކި މަސައްކަތްތަކުން ފެންނަމުންދާ ކާމިޔާބު ފަންނާނެކެވެ.
