ސިއްހީ މައުލޫމާތު ފަތުރާ މަޝްހޫރު މަޖައްލާއެއް ކަމަށްވާ “ހެލްތް” އިން ދާދި ފަހުން ޝާއިއުކުރި ރިޕޯޓެއްގައި، ގަވާއިދުން އަނބު ކެއުމުން އިންސާނާގެ ލޭގައި ހަކުރު ހުންނަ މިންވަރަށް ނުވަތަ ބްލަޑް ޝުގަރއަށް ކުރާ އަސަރުތަކުގެ މައްޗަށް އަލިއަޅުވާލައިފިއެވެ.
މި ރިޕޯޓުގައި ބަޔާންކޮށްފައިވާ ގޮތުގައި އަނބަކީ ގުދުރަތީ ހަކުރު ގިނަ މޭވާއެއް ނަމަވެސް، އޭގައި އެކުލެވޭ ފައިބަރުގެ ސަބަބުން ލޭގެ ހަކުރު ކުއްލިއަކަށް މައްޗަށް ދިއުން ކޮންމެވެސް މިންވަރަކަށް ހުއްޓުވައިދެއެވެ. ފައިބަރަކީ ހަށިގަނޑަށް ހަކުރު ދަމައިގަންނަ ދުވެލި މަޑުޖައްސައިދޭ މާއްދާއެކެވެ. މީގެ އިތުރުން، އަނބުގައި އެކުލެވޭ “މެންގިފެރިން” ފަދަ ޕޮލިފީނޯލްތަކަކީ އިންސިއުލިންގެ މަސައްކަތް ހަރުދަނާކޮށްދީ، ހަށިގަނޑުގެ ގުލްކޯޒް މެޓަބޮލިޒަމް ރަނގަޅުކޮށްދޭ މާއްދާތަކެއް ކަމަށް ދިރާސާތަކުން ދައްކައެވެ.
އަނބަކީ ވިޓަމިން ސީ، ވިޓަމިން އޭ އަދި ފޯލޭޓުން މުއްސަނދި މޭވާއެކެވެ. ނަމަވެސް، ހަކުރު ބަލި ހުންނަ މީހުން އަނބު ކެއުމުގައި ވަކި މިންގަނޑެއް ހިފެހެއްޓުމަކީ މުހިންމު ކަމެއް ކަމަށް ސިއްހީ މާހިރުން ވިދާޅުވެއެވެ. ލޭގެ ހަކުރު އެއްވަރެއްގައި ހިފެހެއްޓުމަށްޓަކައި އަނބާއެކު ޕްރޮޓީން ނުވަތަ ފައިދާހުރި ފެޓްސް ހިމެނޭ ކާނާއެއް (މިސާލަކަށް ނަޓްސް ނުވަތަ ގްރީކް ޔޯގަޓް) ބޭނުންކުރުމަކީ އެންމެ އެދެވިގެންވާ ގޮތެވެ.
މި ދިރާސާގެ މައިގަނޑު ބޭނުމަކީ އަނބަކީ ހަކުރު ގިނަވުމުގެ ސަބަބުން ސިއްހަތަށް ނުރައްކާވެދާނެ މޭވާއެއް ކަމަށް ގިނަ ބަޔަކު ދެކޭ ދެކުން ބަދަލުކޮށް، އޭގެ ފައިދާ ހޯދޭނެ ރަނގަޅު ގޮތްތައް އޮޅުންފިލުވައިދިނުމެވެ. އެގޮތުން، މިންގަނޑެއްގެ ތެރޭގައި އަނބު ބޭނުންކުރުމަކީ ލޭގެ ހަކުރު ކޮންޓްރޯލް ކުރުމަށާއި ހަށިގަނޑަށް ބޭނުންވާ މުހިންމު މާއްދާތައް ހޯދުމަށް އެހީތެރިވެދޭނެ ކަމެކެވެ.
