2022 ވަނަ އަހަރު ޔުނިވަރސިޓީ އޮފް ނިއުކާސަލްގެ ދިރާސާވެރިން ކުރި ދިރާސާއަކުން ދައްކާގޮތުގައި، ކާތަކެތި ތަތްނުލަވާ ގޮތަށް ހުންނަ (ނޮން-ސްޓިކް) ކައްކާ ތަވާ ފަދަ ތަކެތީގައި ކުޑަކޮށް ނަމަވެސް ރެނދުލާފައި ނުވަތަ ކޯޓިންގް ހަލާކުވެފައި ހުރިނަމަ، އިންސާނާގެ ލޮލަށް ނުފެންނަ އެތައް ހާސް ޕްލާސްޓިކް ކުނޑިތަކެއް ކާތަކެތީގެ ތެރެއަށް ބޭރުވެދާނެއެވެ.

މި ދިރާސާގައި ބޭނުންކުރި ކުރިއަރާފައިވާ “ރާމަން އިމޭޖިންގ” ޓެކްނޮލޮޖީގެ އެހީގައި ދިރާސާވެރިން އަންދާޒާކުރާ ގޮތުގައި، “ޓެފްލޯން” ކޯޓިންގް ޖަހާފައިވާ ތަވައެއްގައި ހުންނަ އެންމެ ރެނދަކުންވެސް ގާތްގަނޑަކަށް 9,000 އަށްވުރެ ގިނަ މައިކްރޯޕްލާސްޓިކް އަދި ނެނޯޕްލާސްޓިކްގެ ކުދި އެތިކޮޅުތައް ބޭރުވެއެވެ. އަދި މި ފަށަލަ ބޮޑަށް ހަލާކުވެ ނުވަތަ ނެއްޓެން ފަށައިފިނަމަ، މި އަދަދު އިންތިހާއަށް އިތުރުވެގެންދާކަން ފާހަގަކުރެވުނެވެ.

މިފަދަ ތަވާތަކުގައި ބޭނުންކުރާ ކޯޓިންގް އަކީ ޕީޓީއެފްއީ ނަމަކަށް ކިޔާ މާއްދާއެކެވެ. މިއީ “ފޮރެވަރ ކެމިކަލްސް” ގެ ގޮތުގައި މަޝްހޫރުވެފައިވާ “ޕީއެފްއޭއެސް” ކެމިކަލް އާއިލާއަށް ނިސްބަތްވާ މާއްދާއެކެވެ. މި ތަކެއްޗަށް “ފޮރެވަރ ކެމިކަލްސް” އޭ ކިޔަނީ ތިމާވެށީގެ ތެރޭގައި ނެތިދިއުމަށް ނުވަތަ ބައިބައިވުމަށް އެތައް އަހަރެއް ނަގާތީއެވެ.

ދިރާސާވެރިން އިތުރަށް ހާމަކުރި ގޮތުގައި، ގަދަ ހޫނުގައި ކެއްކުމާއި، އެސިޑިކް ކާތަކެތި (މިސާލަކަށް ހުތް އެކުލެވޭ ތަކެތި) ތައްޔާރުކުރުމާއި އަދި ދަގަނޑު ސަމުސާ ފަދަ ތަކެތި ބޭނުންކުރުމަކީ ތަވާގެ މި ފަށަލަ އަވަހަށް ހަލާކުވުމަށް މެދުވެރިވާ ސަބަބުތަކެކެވެ.

މީގެ ބަދަލުގައި ބޭނުންކުރެވިދާނެ ރައްކާތެރި ބައެއް ވަސީލަތްތަކަކީ:

● ސްޓެއިންލެސް ސްޓީލް ތަވާ

● ކާސްޓް އަޔަން (ދަގަނޑު) ތަވާ

● ކާބަން ސްޓީލް ތަވާ

● ޕީއެފްއޭއެސް އެކުލެވިގެންނުވާ ސެރަމިކް ތަވާ

ތިބާ ބޭނުންކުރާ ނޮން-ސްޓިކް ތަވާގައި ރެނދުލާފައި ނުވަތަ ކޯޓިންގް ނެއްޓެން ފަށާފައިވާނަމަ، އެ ބޭނުންކުރުން ހުއްޓާލައި އާ އެއްޗަކަށް ބަދަލުކުރުމަކީ ހަށިގަނޑަށް މައިކްރޯޕްލާސްޓިކް އެތެރެވުމުން ސަލާމަތްވުމަށް އެޅިދާނެ މުހިންމު ފިޔަވަޅެކެވެ.