ދުނިޔޭގެ ސިއްޙީ ދާއިރާގެ މާހިރުން ހާމަކުރައްވާ ގޮތުގައި، ހަމުގެ ކެންސަރަކީ ދުރާލައި ދެނެގަނެވިއްޖެ ނަމަ ފަރުވާކޮށް ރަނގަޅު ކުރެވިދާނެ ބައްޔެކެވެ. ނަމަވެސް، މި ބަލީގެ ކުރީކޮޅު ފެންނަ ނިޝާންތަކަށް ސަމާލުކަން ނުދެވުމަކީ ބަލި ބޮޑުވެ، ފުރާނައަށް ނުރައްކާވާ ކަމެކެވެ.
ސިއްޙީ މައުލޫމާތު ފަތުރާ މަޝްހޫރު ‘ހެލްތު’ މަޖައްލާގައިވާ ގޮތުން، ހަމުގެ ކެންސަރުގެ މައިގަނޑު ތިން ބާވަތެއް ފާހަގަކުރެވެއެވެ. އެއީ ބޭސަލް ސެލް ކާސިނޯމާ، ސްކޭމަސް ސެލް ކާސިނޯމާ އަދި މެލަނޯމާއެވެ. މީގެ ތެރެއިން އެންމެ ނުރައްކާތެރި ބާވަތަކީ މެލަނޯމާއެވެ.
ހަމުގެ ކެންސަރު ހުންނަ ގޮތް ދެނެގަންނާނެ ގޮތްތައް:
1- ކުލައަށް އަންނަ ބަދަލު: ހަށިގަނޑުގައި ހުންނަ ބައެއް ލައްތަކުގެ ނުވަތަ އުންތަކުގެ ކުލަ ބަދަލުވުމަކީ ސަމާލުވާންޖެހޭ ކަމެކެވެ. މިގޮތުން ކަޅު، މުށި، ރަތް ނުވަތަ ނޫކުލައިގެ ލައްތައް ފެނުމަކީ ބަލީގެ ނިޝާނަކަށް ވެދާނެއެވެ.
2- ބައްޓަން ބަދަލުވުން: ލައްތަކުގެ ދެފަރާތް އެއްވަރު ނުވުމާއި (އެސިމެޓްރީ)، އޭގެ ބޭރު ރޮނގުތައް ނުވަތަ ކައިރިފަށްތައް ވަކި ތަރުތީބެއް ނެތި ހުރުމަކީ ކެންސަރުގެ އަލާމާތެކެވެ.
3- ބޮޑުވަމުންދިއުން: އާދައިގެ ކުޑަ ލަފެއް ނުވަތަ އުމެއް ކުއްލިއަކަށް ބޮޑުވާން ފެށުމަކީ ޑޮކްޓަރަކަށް ދައްކަންޖެހޭ ސަބަބެކެވެ.
4- ފަސޭހަނުވާ ފާރުގަނޑު: ހަމުގައި ހުންނަ ފާރުގަނޑެއް ނުވަތަ ބޮޑުވާ ތަނެއް ގިނަ ދުވަސްވެގެންވެސް ފަސޭހަނުވާނަމަ، އެއީ ސަމާލުވާންޖެހޭ ކަމެކެވެ.
މި ބަލި ޖެހުމަށް މެދުވެރިވާ އެންމެ ބޮޑު ސަބަބަކީ އިރުގެ އަވީގައި ހުންނަ ގެއްލުންދެނިވި އަލްޓްރާވައިލެޓް (ޔޫވީ) ދޯދިތަކަށް ހަންގަނޑު ހުށަހެޅުމެވެ. ރާއްޖެ ފަދަ ހޫނު ގައުމުތަކުގައި އަވީގައި އުޅޭއިރު ސަންސްކްރީން ބޭނުންކުރުމާއި، ހަށިގަނޑު ނިވާވާނެހެން ހެދުން އެޅުމަކީ މި ބަލިން ރައްކާތެރިވުމަށް އެޅިދާނެ މުހިންމު ފިޔަވަޅެކެވެ.
ޑޮކްޓަރުން އިރުޝާދު ދެއްވަނީ ހަށިގަނޑުގެ ހަންގަނޑަށް އަންނަ އެއްވެސް އާދަޔާ ހިލާފު ބަދަލަކަށް ފަރުވާކުޑަ ނުކޮށް، ވީހާވެސް އަވަހަކަށް ސިއްޙީ އެހީތެރިކަން ހޯދުމަށެވެ.
