އާންމުކޮށް ގިނަ ބަޔަކު ބޭނުންކުރާ ވިޓަމިންއެއް ކަމަށްވާ ވިޓަމިން ބީ12 އާއި ކެންސަރު ބަލީގެ ބައެއް ބާވަތްތަކާ ދެމެދު ހައިރާންކުރުވަނިވި ގުޅުމެއް އޮތްކަން ދިރާސާވެރިން ހާމަކޮށްފިއެވެ.
ސައިންސް ޑެއިލީގައި ޝާއިޢުކޮށްފައިވާ މި ދިރާސާގައި ބަޔާންކޮށްފައިވާ ގޮތުގައި، ލޭގައި ވިޓަމިން ބީ12 ހުންނަންޖެހޭ މިންވަރަށްވުރެ އިތުރުވުމަކީ ކެންސަރުގެ ނުރައްކާ ބޮޑުވެދާނެ ކަމުގެ ނިޝާނެކެވެ. މި ދިރާސާ ކުރިއަށް ގެންގޮސްފައިވަނީ ބައިނަލްއަގުވާމީ ސިއްހީ މާހިރުންގެ ޓީމަކުންނެވެ.
ދިރާސާވެރިން ފާހަގަކުރި ގޮތުގައި، ހަށިގަނޑުގައި ވިޓަމިން ބީ12 ގިނަވުމަކީ ހަމައެކަނި ކެންސަރު ޖެހުމުގެ ނުރައްކާ އޮތް ކަމެއް ނޫނެވެ. ނަމަވެސް، މިއީ ހަށިގަނޑުގެ ތެރޭގައި ކެންސަރުގެ ސެލްތައް އުފެދެމުންދާކަމުގެ ކުރީގެ ނިޝާނަކަށް ވުމުގެ ފުރުސަތު ބޮޑެވެ. ޚާއްޞަކޮށް ފުރަމޭގެ ކެންސަރާއި، ފުއްޕާމޭގެ ކެންސަރުގެ އިތުރުން ލޭގެ ކެންސަރާ މި ވިޓަމިންއާ ގުޅުން ހުރިކަން ވަނީ ފާހަގަކުރެވިފައެވެ.
މި ހޯދުންތަކާ ގުޅިގެން މާހިރުން އިރުޝާދު ދެއްވަނީ، އެއްވެސް ޑޮކްޓަރެއްގެ މަޝްވަރާއާ ނުލައި އަމިއްލައަށް ވިޓަމިން ސަޕްލިމަންޓްތައް ބޭނުން ނުކުރުމަށެވެ. އަދި ލޭގެ ޓެސްޓުތަކުން ވިޓަމިން ބީ12 މަތިކޮށް ދައްކާނަމަ، އެއީ ކޮން ސަބަބަކާ ހުރެ ދިމާވާ ކަމެއްތޯ ބެލުމަށް އިތުރު ތަހުލީލުތައް ކުރުން މުހިންމު ކަމަށް ސައިންސްވެރިން ބުނެއެވެ.
ވިޓަމިން ބީ12 އަކީ އާންމުކޮށް ސިއްހަތަށް ފައިދާހުރި، ނާރުތަކުގެ މަސައްކަތަށް މުހިންމު މާއްދާއެއް ނަމަވެސް، މިފަދަ ދިރާސާތަކުން ދައްކަނީ ކޮންމެ އެއްޗަކީވެސް މިންވަރަށްވުރެ އިތުރުވެއްޖެނަމަ އޭގެ ނުރައްކާ އޮތް ކަމެވެ. މި ދިރާސާގެ ސަބަބުން ކެންސަރު ބަލި ކުރިއާލާ ދެނެގަތުމަށް އާ މަގުތަކެއް ފަހިވެގެންދާނެ ކަމަށް އުންމީދު ކުރެވެއެވެ.
