އޮސްޓްރޭލިއާގެ ފްލިންޑާސް ޔުނިވާސިޓީގެ ސައިންސްވެރިން، ކަށީގެ ބަލިތަކަށާއި އަނިޔާތަކަށް ފަރުވާ ދިނުމަށް ބޭނުންކުރެވޭނެ އައު މާއްދާއެއް ކެހެރި (ވޫލް) ބޭނުންކޮށްގެން އުފައްދާ، ބޭސްވެރިކަމުގެ ދާއިރާއިން ބޮޑު ކުރިއެރުމެއް ހޯދައިފިއެވެ.
މި ހޯދުމާ ގުޅޭގޮތުން ސައިންސްވެރިން ހާމަކޮށްފައިވާ ގޮތުގައި، ކެހެރިން ވަކިކުރެވޭ “ކެރަޓިން” ނަމަކަށް ކިޔާ ޕްރޮޓީންއެއް ބޭނުންކޮށްގެން ކަށީގެ ސެލްތައް އާލާވުމަށް އެހީތެރިވެދޭ “ސްކެފޯލްޑް” ތަކެއް ވަނީ ތައްޔާރުކޮށްފައެވެ. މިއީ ކަށި ބިނދުމުން ނުވަތަ ކަށީގެ ބަލިތަކުގެ ސަބަބުން ކަށި ބަލިކަށިވެ ހަލާކުވާ ހާލަތްތަކުގައި، އައު ކަށި އުފެދުމަށް މަގުފަހިކޮށްދޭނެ ވަރަށް ވަރުގަދަ އަދި ރައްކާތެރި މާއްދާއެކެވެ.
މި ދިރާސާ ކުރިއަށް ގެންދިޔަ ސައިންސްވެރިންގެ ޓީމުން ބުނާ ގޮތުގައި، މި އައު މާއްދާ އުފެއްދުމުގެ މައިގަނޑު ބޭނުމަކީ ކަށީގެ އަނިޔާތަކަށް ފަރުވާ ދިނުމުގައި މިހާރު ބޭނުންކުރާ ސިންތެޓިކް މާއްދާތަކުގެ ބަދަލުގައި، އިންސާނާގެ ހަށިގަނޑާ ބޮޑަށް ގުޅޭ އަދި ތިމާވެއްޓާ ރައްކާތެރި ވަސީލަތެއް ހޯދުމެވެ. ކެހެރިން އުފައްދާފައިވާ މި މާއްދާއަކީ އިންސާނާގެ ހަށިގަނޑުގެ ތެރޭގައި ގިރިގެންދާ (ބަޔޯޑިގްރޭޑެބަލް) އެއްޗަކަށް ވުމުން، އިތުރު އޮޕަރޭޝަނެއް ކޮށްގެން އެ ނަގަން ނުޖެހޭނެ ކަމަށްވެސް އެ ފަރާތުން ފާހަގަކުރެއެވެ.
މި އީޖާދުގެ ސަބަބުން، ކަށީގެ ބޮޑެތި އަނިޔާތައް ލިބޭ މީހުންނާއި، އުމުރުން ދުވަސްވުމުގެ ސަބަބުން ކަށީގެ ބަލިތައް ތަހައްމަލު ކުރަމުންދާ ފަރާތްތަކަށް ވަރަށް ބޮޑު އުންމީދެއް ލިބިގެންދެއެވެ. ސައިންސްވެރިން މިހާރު މަސައްކަތް ކުރަމުންދަނީ މި މާއްދާ ބޭނުންކޮށްގެން އިންސާނުންނަށް ފަރުވާ ދިނުމުގެ މަރުހަލާތައް ފެށުމަށެވެ.
މިއީ ދުނިޔޭގެ ބޭސްވެރިކަމުގެ ދާއިރާއަށް ލިބުނު ވަރަށް މުހިންމު ކުރިއެރުމެއްގެ ގޮތުގައި މާހިރުން ސިފަކުރެއެވެ. މިފަދަ އީޖާދުތަކުގެ ސަބަބުން، ކުރިމަގުގައި ކަށީގެ ބަލިތަކަށް ދެވޭ ފަރުވާ މިހާރަށްވުރެ ފަސޭހަވެ، އަވަސްވެގެންދާނެ ކަމަށް ބެލެވެއެވެ.
