ބޮލީވުޑްގެ މަޝްހޫރު އެކްޓަރު ވަރުން ދަވަން، ހޮލީވުޑްގެ މަޝްހޫރު ޕްރޮޑިއުސަރު ލޯރެންސް ކަސަނޮފްއާ އެކު އޭނާގެ ފުރަތަމަ ހޮލީވުޑް ފިލްމުގެ މަސައްކަތް ފެށުމަށް ތައްޔާރުވަމުންދާ ކަމަށް ރިޕޯޓްތައް ބުނެފިއެވެ.
މި މަޝްރޫއާ ބެހޭ ގޮތުން މަޝްވަރާ ކުރުމަށް “މޯޓަލް ކޮމްބެޓް” ފަދަ ކާމިޔާބު ފިލްމުތައް އުފައްދާފައިވާ ޕްރޮޑިއުސަރު ލޯރެންސް ކަސަނޮފް މި ފަހުން ވަނީ އިންޑިއާގެ މުމްބާއީއަށް ޒިޔާރަތްކޮށް ވަރުން ދަވަންއާ ބައްދަލުކޮށްފައެވެ. މި ބައްދަލުވުމަކީ ވަރުންގެ ހޮލީވުޑް ދަތުރުގެ ފެށުމެއް ކަމަށް ބޮލީވުޑްގެ ޚަބަރުތައް ބުނެއެވެ.
މައުލޫމާތު ލިބިފައިވާ ގޮތުގައި، މި ދެ ފަންނާނުން ގުޅިގެން މަސައްކަތް ކުރުމަށް ހަމަޖެހިފައިވަނީ ވަރަށް ބޮޑު ބަޖެޓަކުން އުފައްދާ އެކްޝަން ފިލްމެއްގައެވެ. މިއީ ވަރުން ދަވަން ބައިނަލްއަގުވާމީ ސިނަމާއަށް ވަނުމަށް ލިބޭ ބޮޑު ފުރުސަތެކެވެ. ވަރުން މިހާރުވެސް ދަނީ އެމެޒޯން ޕްރައިމްގެ ބައިނަލްއަގުވާމީ ސީރީޒް “ސިޓަޑެލް”ގެ އިންޑިއަން ވާޝަން “ސިޓަޑެލް: ހަނީ ބަނީ” ގައި މަސައްކަތް ކުރަމުންނެވެ.
ވަރުން ދަވަން ހޮލީވުޑަށް ނުކުންނަން ތައްޔާރުވަމުން މިދަނީ، ބޮލީވުޑްގެ އެހެން މަޝްހޫރު ތަރިން ކަމަށްވާ ޕްރިޔަންކާ ޗޯޕްރާ އާއި އާލިއާ ބަޓް ފަދަ ތަރިން ހޮލީވުޑްގައި ކާމިޔާބު ހޯދަމުންދާ ދަނޑިވަޅެއްގައެވެ.
މި ފިލްމާ ބެހޭ އިތުރު ތަފްސީލުތަކާއި، ފިލްމުގެ ނަމާއި، މަސައްކަތް ފަށާނެ ތާރީޚެއް ކުރިއަށް އޮތް ތަނުގައި ރަސްމީކޮށް އިޢުލާން ކުރާނެ ކަމަށް ބެލެވެއެވެ.
