ޕާކިސްތާނުގެ މަޝްހޫރު ޓީވީ ޗެނަލް “ގްރީން އެންޓަޓެއިންމަންޓް” އިން އާދަޔާ ޚިލާފު، ބިރުވެރި އަދި ތަފާތު ވާހަކައެއްގެ މައްޗަށް ބިނާކޮށް އުފައްދާފައިވާ އާ ޑްރާމާ ސިލްސިލާ “ލާޖް” ދައްކަން ތައްޔާރުވެއްޖެއެވެ.
މި ޑްރާމާ ސިލްސިލާއަކީ އިންސާނެއްގެ ނުރައްކާތެރި ނަފުސާނީ އެދުންތަކާއި، ބޭވަފާތެރިކަމާއި، އަދި ސިލްސިލާ ޤާތިލެއްގެ ބިރުވެރި ހަރަކާތްތަކެއް ދައްކުވައިދޭ އަނދިރި ފަރާތްތަކެއް އެކުލެވޭ ވާހަކައެކެވެ. މި ސިލްސިލާގައި ފެނިގެންދާނީ ފިރިހެނެއްގެ ނުރައްކާތެރި މަޤުސަދުތަކާއި، އަޚެއްގެ ވަރުގަދަ ކެތްތެރިކަމާއި، އަދި މައުސޫމް އަންހެން ކުއްޖެއްގެ ދިރިއުޅުމުގެ ތެރޭގައި ހިނގާ ކުރިމަތިލުންތަކެކެވެ.
މި ޑްރާމާގެ މައިގަނޑު ރޯލުން ފެނިގެންދާނީ ޕާކިސްތާނުގެ ފުންނާބު އުސް ތަރިއެއް ކަމަށްވާ ސައީދު ޖިބްރާންއެވެ. އޭނާ މި ސިލްސިލާގައި ކުޅެނީ ވަރަށް ނުރައްކާތެރި ސިލްސިލާ ޤާތިލެއްގެ ރޯލެވެ. މީގެ އިތުރުން މަޝްހޫރު ތަރިން ކަމަށްވާ އައިޒާ އަވާން، އަލީ ޚާން އަދި ސަޗަލް އަފްޒަލް މުހިންމު ރޯލުތަކުން ފެނިގެންދާނެއެވެ.
ސައީދު ސައްޖާދު ހައިދަރު ޒައިދީގެ ސްކްރީންޕްލޭއަކަށް ތައްޔާރުކޮށްފައިވާ މި ސިލްސިލާ ޑައިރެކްޓްކޮށްފައިވަނީ އަލީ ފަރުހާންއެވެ. މި މަސައްކަތަކީ ބީ.ޖޭ ޕްރޮޑަކްޝަންސްގެ އުފެއްދުމެކެވެ.
“ލާޖް” ދައްކަން ފެށުމަށް ހަމަޖެހިފައިވަނީ 30 މޭ 2026 ގައެވެ. ކޮންމެ ހަފުތާއެއްގެ ހޮނިހިރު އަދި އާދީއްތަ ދުވަހުގެ ރޭ ރާއްޖެ ގަޑިން 8:00 ގައި ގްރީން އެންޓަޓެއިންމަންޓުން މި ޑްރާމާ ދައްކާނެއެވެ. މީގެ އިތުރުން ގްރީން އެންޓަޓެއިންމެންޓްގެ ރަސްމީ ޔޫޓިއުބް ޗެނަލުންވެސް މި ޑްރާމާގެ އެޕިސޯޑްތައް ބަލައިލެވޭނެއެވެ.
