ބޮލީވުޑްގެ ކާމިޔާބު ޑައިރެކްޓަރު ޑޭވިޑް ދަވަން ފިލްމީ ދާއިރާއިން ރިޓަޔާކުރަން ނިންމާފައިވާކަން ހާމަކުރުމާ ގުޅިގެން، މަޝްހޫރު ޕްރޮޑިއުސަރު އަދި ޑައިރެކްޓަރު ކަރަން ޖޯހަރް އޭނާގެ އިހުސާސްތައް ވަރަށް އަސަރާއެކު ބަންޑުންކޮށްލައިފިއެވެ.
މިކަމާ ގުޅޭގޮތުން ކަރަން ޖޯހަރް ސޯޝަލް މީޑިއާގައި ހިއްސާކުރި މެސެޖެއްގައި ބުނެފައިވަނީ، ޑޭވިޑް ދަވަންއަކީ އަބަދުވެސް އޭނާގެ ނަޒަރުގައި “ނަންބަރު 1” ކަމަށެވެ. ކަރަން ވަނީ ޑޭވިޑް ދަވަން ބޮލީވުޑަށް ކޮށްދީފައިވާ އަގުނުކުރެވޭފަދަ މަސައްކަތްތަކަށް ތައުރީފުކޮށް، އޭނާއަކީ ހަގީގީ “މާސްޓާ” އެއްގެ ގޮތުގައި ސިފަކޮށްފައެވެ.
ޑޭވިޑް ދަވަންއަކީ އިންޑިއާގެ ސިނަމާގައި ކޮމެޑީ ފިލްމުތަކުގެ ރަސްގެފާނުގެ ގޮތުގައި މަޝްހޫރުވެފައިވާ ފަރާތެކެވެ. އޭނާ ވަނީ “ކޫލީ ނަންބަރު 1″، “ޖުޅްވާ” އަދި “ބީވީ ނަންބަރު 1” ފަދަ އެތައް ކާމިޔާބު ފިލްމުތަކެއް އިންޑިއާގެ ސިނަމާއަށް ގެނެސްދީފައެވެ. ކަރަން ޖޯހަރް ފާހަގަކުރި ގޮތުގައި، ޑޭވިޑްގެ ފިލްމުތަކަކީ އޭނާގެ ފިލްމީ ކެރިއަރު ބައްޓަންކުރުމުގައިވެސް ވަރަށް ބޮޑު ނުފޫޒެއް ފޯރުވި މަސައްކަތްތަކެކެވެ.
ޑޭވިޑް ދަވަން ރިޓަޔާކުރާކަން އިއުލާންކުރީ އޭނާގެ ދަރިފުޅު ވަރުން ދަވަންއާއެކު ދިން އިންޓަވިއުއެއްގައެވެ. މި ޚަބަރާއެކު ބޮލީވުޑްގެ ގިނަ ފަންނާނުންތަކެއް ދަނީ ޑޭވިޑް ދަވަންގެ ދިގު އަދި ކާމިޔާބު ފިލްމީ ދަތުރަށް ސަލާމްކޮށް، އޭނާއަށް ހެޔޮ އެދުންތައް ފޮނުވަމުންނެވެ.
ކަރަން ޖޯހަރްގެ މި އަސަރުގަދަ މެސެޖުގައި އިތުރަށް ބުނެފައިވަނީ، ޑޭވިޑް ދަވަން ފިލްމީ މަސައްކަތުން ދުރުވި ނަމަވެސް، އޭނާ އުފެއްދި ފިލްމުތަކާއި އޭނާގެ ހަނދާންތައް އަބަދުވެސް ބޮލީވުޑްގެ ތާރީޚުގައި ރަން އަކުރުން ފެންނަން އޮންނާނެ ކަމަށެވެ.
