“ހީރާ ފޭރީ” ސިލްސިލާގެ ތިންވަނަ ފިލްމު އިއުލާންކޮށްފައިވަނީ 2025 ވަނަ އަހަރުގެ ޖެނުއަރީ މަހުގައެވެ. ނަމަވެސް، މިހާރުވެސް ލަސްވެފައިވާ މި މަޝްރޫއުން މުހިންމު އެކްޓަރަކު ވަކިވާން އުޅޭކަމުގެ އަޑުތަކާއެކު، ފިލްމުގެ މަސައްކަތް ހުއްޓިދާނެކަމުގެ ބިރު ވަނީ ހީވެފައެވެ.
“ނިއުސް18” އިން ރިޕޯޓްކޮށްފައިވާ ގޮތުގައި، މިގޮތަށް އަޑުފެތުރިފައިވަނީ މަޝްހޫރު އެކްޓަރު ޕަރޭޝް ރާވަލްއާ ބެހޭގޮތުންނެވެ. ފާހަގަކޮށްލެވޭ ގޮތުގައި، މިދިޔަ އަހަރުވެސް މި ފިލްމީ ސިލްސިލާއިން އޭނާ ވަކިވާން އުޅޭކަމުގެ ޚަބަރުތަކެއް ވަނީ ފެތުރިފައެވެ.
އެންމެ ފަހުގެ މައުލޫމާތުތަކަށް ބަލާއިރު، ޑައިރެކްޓަރު ޕްރިޔަދަރުޝަން “ޓައިމްސް އޮފް އިންޑިއާ” އަށް ދިން އިންޓަވިއުއެއްގައި ބުނެފައިވަނީ، ޕަރޭޝް ރާވަލް ދެވަނަ ފަހަރަށް ފިލްމުން ވަކިވާން އުޅޭކަމުގެ އެއްވެސް މައުލޫމާތެއް އޭނާއަށް ލިބިފައިނުވާ ކަމަށެވެ. ނަމަވެސް، އުމުރުން 70 އަހަރުގެ އެކްޓަރުގެ ފަރާތުން މިކަމާ ގުޅޭގޮތުން ރަސްމީ އެއްވެސް ބަހެއް އަދި ލިބިފައެއް ނުވެއެވެ.
“ދަ ތާޖް ސްޓޯރީ”ގެ އެކްޓަރު މީގެ ކުރިން ވަގުތީ ގޮތުން ފިލްމުން ވަކިވި ނަމަވެސް، ފަހުން ވަނީ އަލުން ފިލްމުގެ މަސައްކަތާ ގުޅިފައެވެ. އޭގެ ފަހުން ފިލްމުގެ ކަންތައްތައް އޮމާންކަމާއެކު ކުރިއަށްދާ ކަމަށް ބެލެވުނު ނަމަވެސް، “ހީރާ ފޭރީ 3” ގެ ޝޫޓިންގް އަދި ފެށިފައެއް ނުވެއެވެ.
މީގެ ކުރިން މިކަމާ ބެހޭގޮތުން ވާހަކަ ދައްކަމުން ޕަރޭޝް ބުނެފައިވަނީ، ގިނަ ކަންތައްތަކެއް ހިނގައިދިޔަ ނަމަވެސް، ޑައިރެކްޓަރު ޕްރިޔަދަރުޝަން އާއި އޭނާއާ ދެމެދު އޮތް ގުޅުމަށް އެއްވެސް ހީނަރުކަމެއް ނާންނަ ކަމަށެވެ. “ބޫތު ބަންގްލާ”ގެ އެކްޓަރު ގަބޫލުކުރާ ގޮތުގައި، މިފަދަ ކަންކަމުގެ ސަބަބުން ގުޅުންތަކެއް ނުބައިވެގެން ނުދާނެއެވެ. އޭނާ އިތުރަށް ފާހަގަކުރި ގޮތުގައި، މިހާރު އެކަކު އަނެކަކު ކުރިއަށްވުރެ ބޮޑަށް ދަސްވެ، ގުޅުން ވަނީ އިތުރަށް ރަނގަޅުވެފައެވެ.
2025 ޖެނުއަރީގައި އިއުލާންކުރި “ހީރާ ފޭރީ 3” އިން ފެނިގެންދާނީ މި ސިލްސިލާގެ މަޝްހޫރު ތިން ތަރިން ކަމަށްވާ އަކްޝޭ ކުމާރު، ސުނިލް ޝެޓީ އަދި ޕަރޭޝް ރާވަލްއެވެ. މި ފިލްމު ރިލީޒްކުރާނެ ރަސްމީ ތާރީޚެއް އަދި ކަނޑައަޅާފައެއް ނުވެއެވެ.
