ބޮލީވުޑްގެ މަޝްހޫރު ބަތަލާ ތާޕްސީ ޕަންނޫ ސޯޝަލް މީޑިއާއާ ދުރުގައި ހުރި ސަބަބުތައް ހާމަކޮށް، އޭނާގެ އަމިއްލަ ނަފުސުގެ ހަމަޖެހުމަށް އިސްކަންދީފައިވާކަމަށް ބުނެފިއެވެ. “މިޑް-ޑޭ” އިން ރިޕޯޓްކޮށްފައިވާ ގޮތުގައި، ތާޕްސީ މި ވާހަކަތައް ހިއްސާކުރީ “އެޗްޓީ ސިޓީ” އަށް ދިން އިންޓަވިއުއެއްގައެވެ.
ތާޕްސީ ބުނި ގޮތުގައި ސޯޝަލް މީޑިއާއާ ދުރުވުމަކީ އޭނާ ގަސްތުގައި ނިންމި ނިންމުމެކެވެ. ސޯޝަލް މީޑިއާގެ ޕްލެޓްފޯމްތަކުގައި އަބަދުވެސް އާ ޓްރެންޑްތަކަށް ފޮލޯކުރުމާއި، އެކި ކަންކަމުގައި ބައިވެރިވެ، ފެންނަ ހިސާބުގައި ހުރުމަށް ކުރަންޖެހޭ މަސައްކަތަކީ ވަރަށް ބޮޑު ތަކުލީފެއްގެ ގޮތުގައި އޭނާ ސިފަކުރިއެވެ.
“އަހަރެން ސޯޝަލް މީޑިއާއާ ދުރުވާނެކަމަށް އިއުލާނެއް ނުކުރަން. އެކަމަކު އެއީ އަހަރެންގެ އަމިއްލަ ނަފުސަށްޓަކައި ކުރި ކަމެއް. އަބަދުވެސް އާ ޓްރެންޑްތަކެއް ފެށުމަށް ނުވަތަ ޓްރެންޑްތަކުގައި ބައިވެރިވުމަށް ދުވުމަކީ ވަރަށް ވަރުބަލިވާ ކަމެއް. އަހަރެން ބޭނުންވީ އަހަރެންގެ އަމިއްލަ ދިރިއުޅުން އުފަލުގައި އުޅެން.” ތާޕްސީ ބުންޏެވެ.
މީގެ އިތުރުން، ސޯޝަލް މީޑިއާގައި ހަރަކާތްތެރިވާ މިންވަރު މަދުވުމުގެ ސަބަބުން، އެކި ބްރޭންޑްތަކާއެކު މަސައްކަތްކުރުމުގެ ފުރުސަތުތަކަށް އަސަރުކުރި ކަމަށްވެސް އޭނާ އެއްބަސްވިއެވެ. މިއަދުގެ މާކެޓިންގ ދާއިރާގައި ބްރޭންޑްތަކުން ބޮޑަށް ބަލަނީ ސޯޝަލް މީޑިއާގައި މީހުންނަށް ފެންނަ މިންވަރަށެވެ. ނަމަވެސް، ތާޕްސީ ބުނީ އެލްގޮރިދަމްތަކަށްވުރެ ބޮޑަށް އޭނާއަށް މުހިންމީ އަމިއްލަ މިނިވަންކަމާއި އިޚްލާޞްތެރިކަން ކަމަށެވެ.
ތާޕްސީއަކީ އަބަދުވެސް އޭނާގެ އަމިއްލަ އުސޫލުތަކަށް މަސައްކަތްކުރާ ތަރިއެކެވެ. އޭނާ އެންމެ ފަހުން ފެނިގެން ގޮސްފައިވަނީ މިދިޔަ ފެބްރުއަރީ މަހު ސިނަމާތަކުގައި ރިލީޒްކުރި ލީގަލް ޑްރާމާ ފިލްމު “އައްސީ” އިންނެވެ. އޭނާގެ މި ވާހަކަތަކުން ދޭހަވަނީ، މަޝްހޫރު ފަންނާނެއްގެ ގޮތުގައި ހުރެމެ، އަމިއްލަ ދިރިއުޅުމާއި ނަފުސާނީ ދުޅަހެޔޮކަމަށް އިސްކަންދިނުމަކީ ކޮންމެހެން މުހިންމު ކަމެއް ކަމެވެ.
