މާލޭގެ ހަލަބޮލި ދިރިއުޅުމުގެ ތެރެއިން އަމާންކަން ލިބޭ އެއް ތަނަކީ މާފަންނުގެ އެ ބޮޑު ގެއެވެ. ގޭގެ ގޯތިތެރޭގައި ހައްދާފައިވާ މާގަސްތަކުގެ މީރުވަސް މުޅި ސަރަހައްދަށް ފެތުރިފައިވެއެވެ. މައިރާ އިނީ ބެލްކަނީގައި ހުރި އުނދޯލީގައެވެ. އޭނާގެ ދެލޯ ހުއްޓިފައިވަނީ ގޯތިތެރޭގައި އުޅޭ އޭނާގެ ބޮޑުބޭބެގެ ދަރިފުޅު، އަރްމާނަށެވެ.
މައިރާގެ އުމުރުން އެންމެ ޅަދުވަހުން ފެށިގެންވެސް އޭނާގެ ދުނިޔެއަކީ އަރްމާނެވެ. އަރްމާނަކީ މައިރާއަށްވުރެ ދިހަ އަހަރު ދޮށީ، ވަރަށް ހަރުދަނާ އަދި އެހާމެ އޯގާތެރި ޒުވާނެކެވެ. މައިރާގެ ކޮންމެ ކަމެއްގައި އެހީތެރިވެ، އޭނާ ހިނިތުންކޮށްދޭން މަސައްކަތްކުރާ އެންމެ ގާތް އެކުވެރިއަކީވެސް އަރްމާނެވެ. ނަމަވެސް، މައިރާގެ ހިތުގައި އަރްމާނަށްޓަކައި އުފެދިފައިވާ އިޙުސާސްތަކަކީ ހަމައެކަނި އެކުވެރިކަމެއް ނޫނެވެ. އެއީ ފުން ލޯތްބެކެވެ.
“މައިރާ! ކޮން ކަމަކަށް ގެއްލިފައި؟” އަރްމާންގެ އަޑަށް މައިރާ ސިއްސައިގެން ދިޔައެވެ.
މައިރާ އަވަސްއަވަހަށް އިސްޖަހާލަމުން ހިނިތުންވެލިއެވެ.
“ކަމެއް ނުވޭ އަރްމާންބޭ. ހަމަ ވިސްނާލެވުނީ.”
އަރްމާން އައިސް މައިރާގެ ކައިރީގައި އިށީނދެލިއެވެ.
“މިއަދު މާ ބޮޑަށް އުފާވެފައި ހުރިހެން ހީވޭ. ކޮބާ ނާޔާގެ ޚަބަރަކީ؟ އޭނާ މާލެ އަންނަނީ ކޮން ދުވަހަކުން؟”
ނާޔާއަކީ މައިރާގެ އެއްބަނޑު އެއްބަފާ ދައްތައެވެ. ނަމަވެސް، ކުޑައިރު ނާޔާ ވަނީ ރާއްޖެއިން ބޭރުގައި ދިރިއުޅޭ އެހެން އާއިލާއަކަށް ދީފައެވެ. އެހެންކަމުން، މައިރާއާއި ނާޔާގެ ދެމެދުގައި އޮތީ ހަމައެކަނި ފޯނުން ވާހަކަދެއްކުމުގެ ގުޅުމެކެވެ. ނާޔާ މާލެ އަންނަ ވާހަކައަކީ މުޅި އާއިލާއަށް ލިބުނު ވަރަށް ބޮޑު އުފަލެކެވެ.
“ދައްތަ އަންނަނީ އަންނަ ހުކުރު ދުވަހު.” މައިރާ ޖަވާބުދިނެވެ.
“އަސްލު ވަރަށް އުފާވޭ ދައްތަ ފެންނާނެތީ. އެކަމަކު ހިތަށް އަރަނީ އަހަރެމެންނާ ގުޅޭނެބާވައޭ؟ އޭނާ ބޮޑުވީ މުޅިން ތަފާތު މާޙައުލެއްގައެއްނު.” މައިރާގެ ވާހަކައިން އަރްމާން ހީނލިއެވެ.
“ލޭގެ ގުޅުމަކީ ވަރަށް ބާރުގަދަ އެއްޗެއް މައިރާ. ނާޔާއަކީވެސް މި އާއިލާގެ ހިއްސާއެއް. އޭނާ އައުމުން މި ގޭގެ ފަޅުކަން ފިލާނެ.”
އެ ވަގުތު މައިރާގެ ހިތަށް ނޭނގޭ ބިރުވެރިކަމެއް ވަނެވެ. އަރްމާންގެ ލޮލުން ފެންނަމުންދާ އުންމީދީ ކުލަވަރުތަކަކީ ހަމައެކަނި ނާޔާ އަންނާތީ ފެންނަ ކުލަވަރުތަކެއް ބާވައެވެ؟ ނޫނީ މިއީ ކުރިއަށް އޮތް ތޫފާނެއްގެ ނިޝާނެއް ބާވައެވެ؟
ހުކުރު ދުވަހުގެ ހަވީރެވެ. ވެލާނާ އިންޓަރނޭޝަނަލް އެއާޕޯޓުގެ އެރައިވަލް ގޭޓުން ނާޔާ ނުކުތްއިރު، އޭނާގެ ރީތިކަމުން މުޅި ތަން އަލިވެގެން ދިޔަ ކަހަލައެވެ. ނާޔާއަކީ މައިރާއާ ވަރަށް ވައްތަރު، ނަމަވެސް މާ ބޮޑަށް ހަމަޖެހިފައިވާ، މަޑުމައިތިރި މިޒާޖެއްގެ ކުއްޖެކެވެ.
އަރްމާން ހުރީ ނާޔާއަށް މަރުޙަބާ ކިޔަން އެންމެ ކުރީގައެވެ. ދެމީހުންގެ ދެލޯ ބައްދަލުވި ހިނދު، ވަގުތު ހުއްޓުނު ފަދައެވެ. މައިރާ ދުރުގައި ހުރެ މި މަންޒަރު ބަލަމުން ދިޔައީ ހިތް ނުތަނަވަސްވެފައިވާ ޙާލުގައެވެ.
ގެއަށް އައި މަގުމަތީގައިވެސް އަރްމާންގެ މުޅި ސަމާލުކަން ހުރީ ނާޔާއަށެވެ.
“ނާޔާއަށް ރާއްޖެ ކަމުދާނެތަ؟ މިތަނުގެ ހޫނުގަދަކަމުން އުނދަގޫވާނެތަ؟” އަރްމާން ސުވާލު ކުރަމުން ދިޔައެވެ.
“އަރްމާން. މިއީ އަހަރެންގެ އަމިއްލަ ވަޒަން. މިތަނުގެ ހޫނުކަމަށްވުރެ، ތި އެންމެންގެ ލޯބީގެ ހޫނުކަން މާ ބޮޑު.” ނާޔާ ހިނިތުންވެލަމުން ބުންޏެވެ.
މި ޖުމްލައާއެކު އަރްމާންގެ މޫނުމައްޗަށް ވެރިވި ހިނިތުންވުން ފެނިފައި މައިރާގެ ހިތުގައި ރިހުމެއް އުފެދުނެވެ. އޭނާގެ އަރްމާން، އޭނާގެ ހަމައެކަނި ދުނިޔެ، އެހެން މީހަކަށްޓަކައި ހިތް ހުޅުވާލަނީ ހެއްޔެވެ؟
ދުވަސްތައް ފާއިތުވަމުން ދިޔައެވެ. ގޭގެ ތެރޭގައި ނާޔާއާއި އަރްމާންގެ ގާތްކަން ދިޔައީ އިތުރުވަމުންނެވެ. އެކުގައި ކޮފީއަށް ދިއުމާއި، ރޭގަނޑުގެ ވަގުތުތަކުގައި ގޯތިތެރޭގައި ވާހަކަދައްކަން ތިބުން އާންމުވިއެވެ. މައިރާ އިނީ އެކަހެރިވެފައެވެ. އޭނާގެ މަޤާމު ނާޔާ އަތުލައިފިކަމުގެ އިޙުސާސް އޭނާއަށް ކުރެވެން ފެށިއެވެ.
އެއްދުވަހަކު މައިރާ ކޮޓަރީގައި އިންދާ އަރްމާން އައެވެ.
“މައިރާ. އަހަރެން ވާހަކައެއް ބުނަންވެފައި އެބައޮތް.”
މައިރާގެ ހިތް ބާރަށް ތެޅެން ފެށިއެވެ.
“ކޮން ވާހަކައެއް އަރްމާންބޭ؟”
“އަހަރެން.. އަހަރެން ބޭނުންވަނީ ނާޔާއާ ކައިވެނިކުރަން. ބޮޑުބޭބެމެންނާ ވާހަކަދައްކަން މި އުޅެނީ. މައިރާ އުފާވާނެ ދޯ؟” އަރްމާންގެ ދެލޮލުން ފެންނަމުން ދިޔައީ އާދަޔާ ޚިލާފު އުފާވެރިކަމެކެވެ.
މައިރާގެ ދުނިޔެ އެނބުރިގަތް ކަހަލައެވެ. އޭނާ ބޭނުންވީ ހަޅޭއްލަވައިގަންނާށެވެ. “ނޫނެކޭ، ތިޔަކަން ނުކުރާށޭ” ބުނާށެވެ. ނަމަވެސް، އޭނާގެ ދުލުން ބޭރުވީ އެހެން ބަސްތަކެކެވެ.
“ވަރަށް.. ވަރަށް އުފާވެއްޖެ އަރްމާންބޭ. މަރުޙަބާ.” މައިރާ ގަދަކަމުން ހިނިތުންވެލަމުން ބުންޏެވެ. ނަމަވެސް އޭނާގެ ހިތް ދިޔައީ ކުދިކުދިވަމުންނެވެ.
ދުވަސްތައް ފާއިތުވަމުން ގޮސް، އަރްމާންއާއި ނާޔާގެ ކައިވެނީގެ ރަންކިޔުމުގެ ރަސްމިއްޔާތު ބޭއްވުނެވެ. މުޅި ގެ އޮތީ ދިއްލާލާފައެވެ. ގޭގެ އެންމެން އުޅެނީ ވަރަށް އުފަލުންނެވެ. ނަމަވެސް މައިރާގެ ހާލަކީ އެއީއެއް ނޫނެވެ. އޭނާގެ ހިތް ވަނީ ހަސަދައާއި، ލޯތްބާއި، އަދި މާޔޫސްކަމުގެ ތެރޭގައި ބަނދެވިފައެވެ.
ކައިވެނީގެ ރޭ، ނާޔާ ހުރީ ދިވެހި ސަގާފީ ރަތް ހެދުމަކާއި ރަން ގަހަނާތަކުން ނަލަވެލައިގެންނެވެ. އޭނާގެ ރީތިކަން ފެނިފައި ކޮންމެ މީހަކުވެސް ބުނަނީ “މާޝާﷲ” އެވެ.
“މައިރާ. އަހަރެން ރީތިތަ؟” ނާޔާ ލޯގަނޑުން އޭނާގެ ސޫރައަށް ބަލަހައްޓައިގެން ހުރެ އަހާލިއެވެ.
“ވަރަށް ރީތި ދައްތާ. އަރްމާންބެ ވަރަށް އުފާވާނެ.” މައިރާ ހިތި ހިނިތުންވުމަކާއެކު ބުންޏެވެ.
އެ ރޭގެ ޕާޓީގެ ތެރެއިން، އަރްމާން ނާޔާގެ އަތުގައި ހިފައިގެން ހުރި މަންޒަރު ފެނިފައި މައިރާއަށް އިތުރަށް ކެތެއް ނުކުރެވުނެވެ. އޭނާ ދުވެފައި ގޮސް ވަނީ ގޭގެ ފުރަގަހުގައި އޮންނަ އަނދިރި ބަގީޗާއަށެވެ. ބޯކޮށް ވާރޭ ވެހެން ފެށިއެވެ. މައިރާ ވާރެއާ ތެމެމުން، ރޮމުން، މާޔޫސްކަމާއެކު އުޑަށް ބަލާލިއެވެ.
“ކީއްވެ؟ ކީއްވެ އަހަރެންގެ ލޯބި އަހަންނަށް ނުލިބުނީ؟” މައިރާ ހަޅޭއްލަވައިގަތެވެ.
“އަހަރެން ބޭނުމެއް ނޫން މި ކައިވެނި ދެމިއޮންނާކަށް! އަހަރެން ބޭނުމީ އަރްމާންބެ ހަމައެކަނި އަހަރެންގެ މީހަކަށްވާން!”
އެ ވަގުތު އޭނާގެ ދުލުން ބޭރުވީ ވަރަށް ނުބައި ބަސްތަކެކެވެ.
“އޭ ހައްދަވާ ބޮޑުކުރެއްވި ރަސްކަލާނގެ! މި ކައިވެނި ރޫޅާލައްވާފާނދޭވެ! ނާޔާ ދައްތަ އަހަރެމެންނާ ވަކިކުރައްވާފާނދޭވެ!”
މައިރާއަށް އެ ބުނެވުނު އެއްޗެއްގެ ނުރައްކާތެރިކަން އިޙުސާސްވީ މާ ފަހުންނެވެ.
ކައިވެންޏަށްފަހު އަރްމާންއާއި ނާޔާ ނިންމީ އަރްމާންގެ ވަޒީފާގެ ކަންތަކުގައާއި މަތީ ތަޢުލީމަށް އެމެރިކާއަށް ބަދަލުވާށެވެ. މައިރާ މާލޭގައި ހުރީ އެކަނިވެފައެވެ. އޭނާގެ ދިރިއުޅުމުން އުފާވެރިކަން ގެއްލި، އޭނާވީ މަޑުމައިތިރި، ބަސްމަދު މީހަކަށެވެ.
ދެ އަހަރު ފާއިތުވެގެން ދިޔައެވެ. ނާޔާ ބަނޑުބޮޑުވި ޚަބަރު ލިބުމުން މުޅި އާއިލާ އުފަލުން ފުރުނެވެ. ނާޔާ ވިހަން ކައިރިވުމުން، އޭނާ ބޭނުންވީ މާލެ އަންނާށެވެ. ނަމަވެސް އަރްމާން ބޭނުންވީ ނާޔާ އެމެރިކާގައި ވިހާށެވެ. އެންމެ ފަހުން، މައިރާއާއި އޭނާގެ މަންމަ އެމެރިކާއަށް ދިޔައީ ނާޔާގެ ކައިރީގައި ތިބުމަށެވެ.
އެމެރިކާގައި ހޭދަކުރި ދުވަސްތަކުގައި، އަރްމާންއާއި ނާޔާގެ ދެމެދުގައި އޮތް ފުން ލޯބި ފެނިފައި ނާޔާގެ ހިތުގައިވާ ޒަޚަމްތައް އަލުން ތާޒާވިއެވެ. އެހެންނަމަވެސް، އޭނާ މަސައްކަތް ކުރީ އެކަން ފޮރުވައިގެން ހުންނާށެވެ.
އެއްދުވަހަކު، ނާޔާއާއި އަރްމާން ބޭރަށް ދިޔައީ ދަރިފުޅަށް ބޭނުންވާ ސާމާނު ގަންނާށެވެ. މަގުމަތީގައި ދަނިކޮށް، ބާރު ސްޕީޑްގައި އައި ލޮރީއެއް އެމީހުންގެ ކާރުގައި ޖެހުނެވެ.
ހޮސްޕިޓަލުން ގުޅާފައި މި ޚަބަރު ދިނުމުން މައިރާގެ ފައިދަށުން ބިންގަނޑު ދެމިގެން ދިޔަ ކަހަލައެވެ. އޭނާ ދުވެފައި ހޮސްޕިޓަލަށް ދިޔައިރު، އަރްމާން އިނީ ބޭރުގައި އިށީނދެގެންނެވެ. އޭނާގެ މުޅި ހަށިގަނޑުގައި ވަނީ ލެޔެވެ.
“އަރްމާންބޭ! ކޮބާ ދައްތަ؟” މައިރާ ރޮމުން އެހިއެވެ.
އަރްމާން އިސްއުފުލާ ބަލާލިއެވެ. އޭނާގެ ދެލޮލުން ފެންނަމުން ދިޔައީ ފުން ހިތާމައެވެ.
“މައިރާ.. ނާޔާ.. ނާޔާ އަހަރެމެންނާ ވަކިވެއްޖެ.”
މައިރާ އެތަނަށް ތިރިވިއެވެ. އޭނާގެ ސިކުނޑީގައި އެނބުރެމުން ދިޔައީ ކައިވެނީގެ ރޭ އޭނާއަށް ކުރެވުނު ބަދުދުޢާއެވެ.
“މި ކައިވެނި ރޫޅާލައްވާފާނދޭވެ! ނާޔާ ދައްތަ އަހަރެމެންނާ ވަކިކުރައްވާފާނދޭވެ!”
މައިރާގެ ހިތް ބިރުން ތެޅެން ފެށިއެވެ. އޭނާގެ ދައްތަ މަރުވީ އޭނާގެ ސަބަބުން ހެއްޔެވެ؟ އޭނާގެ ހިތުގައި އުފެދުނު ނުބައި އެދުމެއްގެ ސަބަބުން ހެއްޔެވެ؟
ނާޔާގެ މަރަށްފަހު، މުޅި އާއިލާ މާލެއަށް ބަދަލުވިއެވެ. އަރްމާން ވީ ހިނގާ ބިނގާވެ އުޅޭ ފުރާނައެއް ނެތް މަސްގަނޑަކަށެވެ. އޭނާގެ ހިތް ވަނީ ނާޔާއާއެކު ވަޅުލެވިފައެވެ. މައިރާގެ ހާލަކީވެސް އެއީއެވެ. ނަމަވެސް އޭނާގެ ހިތާމައަކީ ކުށްވެރިކަމުގެ އިޙުސާސެވެ.
އެއްރޭ، މައިރާގެ މާމަ އަރްމާންއާ ވާހަކަދެއްކިއެވެ.
“ދަރިފުޅާ އަރްމާން. ނާޔާ ވަކިވެ ދިޔައީ އަހަރެމެންނަށް ވަރަށް ބޮޑު ހިތާމައެއް ދީފައި. އެކަމަކު ދިރިއުޅުން ކުރިއަށް ގެންދަން އެބަޖެހޭ. މައިރާއަކީ މިހާރު ބޮޑުވެފައި ހުރި ކުއްޖެއް. އޭނާވެސް އެހެރީ އެކަނިވެފައި. އަހަރެން ބޭނުމީ ދަރިފުޅު މައިރާއާ ކައިވެނިކުރަން.”
މި ވާހަކަ އިވިފައި މައިރާއާއި އަރްމާންވެސް ސިހުނެވެ. މައިރާ ބޭނުންވީ ދުވެފައި ގޮސް ފިލާށެވެ. އޭނާ އެންމެ ލޯބިވި މީހާ ލިބެން މިއުޅެނީ އޭނާގެ އަމިއްލަ ދައްތަގެ މަރުގެ މަތީގައެވެ. މިއީ އޭނާއަށް ކެތްކުރެވޭނެ ކަމެއް ނޫނެވެ.
“ނޫން މާމާ! އަހަރެން އަރްމާންބެއާ ކައިވެންޏެއް ނުކުރާނަން!” މައިރާ ރޮމުން ބުންޏެވެ.
ނަމަވެސް އާއިލާގެ ބާރު އެޅުމާއި، އަރްމާންގެ ހާލަތަށް ބަލާފައި، އެންމެ ފަހުން މައިރާއަށް ޖެހުނީ ކައިވެންޏާ އެއްބަސްވާށެވެ.
މައިރާއާއި އަރްމާންގެ ކައިވެނި ކުރެވުނީ ވަރަށް އާދައިގެ ގޮތަކަށެވެ. އެއްވެސް އުފާވެރިކަމެއް ނެތެވެ. ކައިވެނީގެ ފުރަތަމަ ރޭ، އަރްމާން މައިރާއާ ހަތަރުކަޅި ހަމަކުރަންވެސް ބޭނުމެއް ނުވިއެވެ.
“މައިރާ. އަހަރެން މި ކައިވެނި ކުރީ ހަމައެކަނި މާމަގެ އެދުމަށް.” އަރްމާން ފިނި ރާގަކަށް ބުންޏެވެ.
“އަހަރެންގެ ހިތުގައި ނާޔާ ނޫން އެހެން މީހަކަށް ޖާގައެއް ނެތް. އަހަރެމެން އުޅޭނީ އެކަކު އަނެކަކަށް އިޙްތިރާމްކުރާ ދެ އެކުވެރިން ފަދައިން.”
މައިރާގެ ހިތް ކުދިކުދިވިއެވެ. އޭނާގެ ހުވަފެންތަކުގެ ރާޖާ އޭނާގެ ގާތުގައި ހުރިއިރުވެސް، އޭނާއާ ދެމެދުގައި ވަނީ އުޑާއި ބިމާ ދެމެދު ވާފަދަ ދުރުމިނެކެވެ.
މަސްތަކެއް ފާއިތުވެގެން ދިޔައެވެ. އަރްމާން ހުންނަނީ ގިނަ ވަގުތު އޮފީހުގައެވެ. ގެއަށް އައުމުންވެސް އޭނާ ވަންނަނީ ނާޔާގެ ހަނދާންތައް ހުރި ކޮޓަރިއަށެވެ. މައިރާ ދިޔައީ ކެތްތެރިކަމާއެކު އަރްމާނަށް ޚިދުމަތް ކުރަމުންނެވެ. އޭނާ އުންމީދު ކުރީ ކޮންމެވެސް ދުވަހަކުން އަރްމާންގެ ހިތް އޭނާއަށްޓަކައި ހުޅުވޭނެ ކަމަށެވެ.
އެއްދުވަހަކު، މައިރާ އަރްމާންގެ ކޮޓަރި ސާފުކުރަން އުޅެނިކޮށް، އަރްމާންގެ ޑައިރީ ފެނުނެވެ. އޭގައި ލިޔެފައިވަނީ ނާޔާއަށްޓަކައި އޭނާގެ ހިތުގައިވާ މިންވަރެއް ނެތް ލޯތްބެވެ. އަދި މައިރާއާމެދު އޭނާ ދެކޭ ގޮތެވެ.
“މައިރާއަކީ އަހަރެންގެ ކޮއްކޮއެއް ފަދަ ކުއްޖެއް. އޭނާއާ ކައިވެނިކުރުމަކީ އަހަރެން ނާޔާއަށް ވީ ޚިޔާނާތެއް ކަމަށް އަހަރެން ދެކެން.”
މި ލިޔުން ކިޔާފައި މައިރާއަށް ބާރަށް ރޮއިގަނެވުނެވެ. އޭނާގެ ކެތްތެރިކަން ކޮޅުންލީއެވެ. އެ ވަގުތު އަރްމާން ކޮޓަރިއަށް ވަނެވެ.
“ކީއްވެ ތި ރޮނީ؟” އަރްމާން ހައިރާންވެފައި އެހިއެވެ.
މައިރާ ކޮޅަށް ތެދުވިއެވެ. އޭނާގެ ދެލޮލުން އަލިފާން ކަނި ބުރާ ކަހަލައެވެ.
“އަހަރެން މި ރޮނީ އަހަރެންގެ ތަޤުދީރާމެދު! އަރްމާންއަށް ހީވަނީ ހިތާމައިގަ ވާ މީހަކީ ހަމައެކަނި ތީ ކަމަށްތަ؟ އަހަރެން އަރްމާންދެކެ ލޯބިވީ ކޮން އިރަކުކަން އެނގޭތަ؟ އަހަރެންގެ މުޅި އުމުރު މި ހޭދަކުރީ އަރްމާންގެ އިންތިޒާރުގައި! އެކަމަކު އަރްމާންއަށް ފެނުނީ ހަމައެކަނި ނާޔާ ދައްތަ!”
މައިރާގެ ހިތުގައި ފޮރުވިފައިވާ ހުރިހާ ޝަކުވާއެއް ބޭރުކޮށްލިއެވެ.
“އަހަރެން ދައްތަ މަރުވާން އެދުނިން! އާނ. އެއީ އަހަންނަށް ކުރެވުނު ކުށެއް! އެކަމުގެ އަދަބު އަހަންނަށް މި ލިބެނީ! އަރްމާންގެ މި ދުރުކަމަކީ އަހަރެންގެ މަރު!”
އަރްމާން ހުރީ ބުނާނެ އެއްޗެއް ނޭނގިފައެވެ. އޭނާއަށް ދުވަހަކުވެސް މައިރާގެ ހިތުގައި މިފަދަ ފުން އިޙުސާސްތަކެއް ހުރިކަމެއް ނޭނގެއެވެ.
އެރެއަށްފަހު، އަރްމާންގެ އުޅުމަށް ބަދަލުތަކެއް އަންނަން ފެށިއެވެ. އޭނާ މައިރާއާމެދު ވިސްނަން ފެށިއެވެ. މައިރާގެ ލޯތްބާއި، އޭނާގެ ޤުރުބާނީއާއި، އަދި އޭނާގެ ހިތުގައިވާ ކުށްވެރިކަމުގެ އިޙުސާސް އަރްމާނަށް އޮޅުންފިލިއެވެ.
އެއްދުވަހަކު، އަރްމާން މައިރާ ގޮވައިގެން މާލޭގެ އަތިރިމައްޗަށް ދިޔައެވެ. އިރުއޮއްސޭ ވަގުތު، އުޑުމަތީގައި ރީތި ކުލަވަރުތައް ޖެހިފައި ހުއްޓެވެ.
“މައިރާ.” އަރްމާން މަޑުމައިތިރިކަމާއެކު ގޮވާލިއެވެ.
“އަހަރެން މައާފަށް އެދެން، އަހަންނަށް މައިރާގެ ހިތުގެ އަޑު ނީވުނީތީ. ނާޔާއަކީ އަހަރެންގެ މާޒީ. އެ ހަނދާންތައް ދުވަހަކުވެސް ފިލައިގެނެއް ނުދާނެ. އެކަމަކު މައިރާއަކީ އަހަރެންގެ މިއަދު އަދި މާދަމާ.”
މައިރާ ހައިރާންވެފައި އަރްމާނަށް ބަލާލިއެވެ.
“އަހަރެމެންނަށް އާ ފެށުމަކުން ފެށިދާނެތަ؟” އަރްމާން މައިރާގެ އަތުގައި ހިފާލިއެވެ.
“މިފަހަރު ހަމައެކަނި އާއިލާގެ އެދުމަކަށް ނޫން. އަހަރެންގެ އަމިއްލަ އިޚްތިޔާރުގައި. އަހަރެން ބޭނުން މައިރާއަށް އެ އުފާވެރިކަން ދޭން. މައިރާގެ މުޅި އުމުރުގައި އިންތިޒާރުކުރި އުފާވެރިކަން.”
މައިރާގެ ދެލޮލުން އުފާވެރިކަމުގެ ކަރުނަ ފޭދުނެވެ. އޭނާ އަރްމާންގެ ކޮނޑުގައި ބޯ އަޅާލިއެވެ. އެތައް އަހަރެއްގެ ހިތާމައާއި، ކަރުނައާއި، އިންތިޒާރަށްފަހު، އޭނާގެ ހިތަށް ހަމަޖެހުން ލިބުނެވެ.
(ނިމުނީ)
