އިންޑިއާގެ ޓީވީ ޑްރާމާތަކުން ބޮޑު މަޤުބޫލުކަމެއް ހޯދާފައިވާ ބަތަލާ ޖެނިފާ ވިންގެޓް، އޭނާގެ ދިރިއުޅުމުގެ އައު ބާބެއް ފެށުމަށް ތައްޔާރުވަމުންދާ ކަމަށް މީޑިއާ ރިޕޯޓްތައް ބުނެފިއެވެ. މުނިފޫހިފިލުވުމުގެ ދާއިރާގެ އެކި މަސްދަރުތަކުން ބުނާ ގޮތުގައި، ޖެނިފާ މިހާރު ވަނީ ސިންގަޕޫރުގެ ވިޔަފާރިވެރިއެއް ކަމަށްވާ އިޝްމާއީލް ވިލިއަމްއާ އެންގޭޖްވެފައެވެ.
މަޢުލޫމާތު ލިބޭ ގޮތުގައި، މި ދެމީހުން އެންގޭޖްވީ ދާދިފަހުން އެކުގައި ކުރި އަމިއްލަ ދަތުރެއްގެ ތެރެއިންނެވެ. މި ދެމީހުން ރައްޓެހިވެގެން އުޅޭތާ ދުވަސްތަކެއް ވެފައިވާ ކަމަށް އަޑުތައް ފެތުރިފައިވާއިރު، މިހާރު އަންނަނީ ކައިވެނީގެ ތައްޔާރީތައް ވަމުންނެވެ. މިކަމާ ގުޅޭގޮތުން ޖެނިފާ ނުވަތަ އޭނާގެ ޓީމުން ރަސްމީކޮށް އެއްޗެއް ބުނެފައި ނުވިނަމަވެސް، ކައިވެނީގެ ކަންކަމުގައި ބޭނުންވާ ތަކެތި ހޯދުމާއި ފަރުމާކުރުމުގެ މަސައްކަތުގައި އޭނާ ވަރަށް އިސްކޮށް އުޅެމުންދާކަމަށް އެތެރޭގެ މަސްދަރުތަކުން ބުނެއެވެ.
ޚަބަރުތައް ބުނާ ގޮތުގައި، މި ދެމީހުން ނިންމާފައިވަނީ ކްރިސްޓިއަން ސަގާފަތާ އެއްގޮތަށް ކައިވެނީގެ ރަސްމިއްޔާތު ބޭއްވުމަށެވެ. އަދި ކައިވެނި ބާއްވާނެ ތަނަކާއި ތާރީޚަކާމެދު މިހާރު ދަނީ މަޝްވަރާ ކުރެވެމުންނެވެ. ބޮޑަށް ބެލެވޭ ގޮތުގައި މި ކައިވެނީގެ ހަފުލާތައް އިންޑިއާ އަދި ސިންގަޕޫރުގައި ކުރިއަށްދާނެއެވެ.
މި އަޑުތައް އިތުރަށް ގަދަވެގެން ދިޔައީ، ޖެނިފާ ސޯޝަލް މީޑިއާގައި ކައިވެންޏާ ގުޅޭ ޕޯސްޓްތަކަށް ސަމާލުކަންދޭން ފެށުމުން، ފޭނުންގެ މެދުގައި އެކަމާ މެދު ބަހުސްތަކެއް އުފެދުމާ ގުޅިގެންނެވެ.
ގިނަ ބައެއްގެ މަޤުބޫލުކަން ހޯދާފައިވާ ޖެނިފާ ވިންގެޓަކީ އޭނާގެ އަމިއްލަ ދިރިއުޅުމުގެ ކަންކަން ސިއްރުކޮށްގެން އުޅޭ މީހެކެވެ. މި އެންގޭޖްމަންޓްގެ ޚަބަރު އަދި ރަސްމީކޮށް ކަށަވަރު ނުވި ނަމަވެސް، ފެތުރެމުންދާ އަޑުތަކަށް ބަލާއިރު ވަރަށް އަވަހަށް މިކަމާ ގުޅޭ ރަސްމީ އިއުލާނެއް ކުރާނެ ކަމަށް ބެލެވެއެވެ.
