ޕާކިސްތާނުގެ މަޝްހޫރު ޓީވީ ޗެނަލް، ހަމް ޓީވީއިން އުފައްދާ އާ ޑްރާމާ ސިލްސިލާ “މަރްގޭ ވަފާ” ދައްކަން ފެށުމަށް ތައްޔާރުވެއްޖެއެވެ.
މި ސިލްސިލާގެ މައިގަނޑު ރޯލުތަކުން ފެނިގެންދާނީ މަޝްހޫރު ތަރިން ކަމަށްވާ ސަބީނާ ފާރޫޤް، އުސާމާ ޚާން އަދި މިރްޒާ ޒައިން ބެއިގްއެވެ. އާމްނާ ރިޔާޒްގެ ވާހަކައަކަށް ތައްޔާރުކޮށްފައިވާ މި ޑްރާމާ ޑައިރެކްޓްކޮށްފައިވަނީ އިލްޔާސް ކަޝްމީރީއެވެ. އަދި މި ސިލްސިލާއަކީ މޫމިނާ ދުރައިދު ޕްރޮޑަކްޝަންސްގެ އުފެއްދުމެކެވެ.
“މަރްގޭ ވަފާ” އަކީ ލޯތްބާއި، ހިތްދަތިކަމާއި އަދި އިންސާނާގެ ތަޤުދީރާ ގުޅިފައިވާ ފުން އަސަރުތަކެއް އެކުލެވޭ ވާހަކައެކެވެ. މި ޑްރާމާގައި މައިގަނޑު ގޮތެއްގައި އަލިއަޅުވާލާފައިވަނީ މުޖުތަމަޢުގައި ކަނޑައެޅިފައިވާ ބައެއް ހަރުކަށި އުސޫލުތަކުގެ ސަބަބުން، ޒުވާން ފިރިހެނުންނާއި އަންހެނުންގެ މެދުގައި އޮންނަ އެކުވެރިކަމަށް ޝައްކުގެ ނަޒަރުން ބަލާ ގޮތުގެ މައްޗަށެވެ. ވާހަކައިގެ ބަތަލުންނަށް ކުރިމަތިވާ ނަފުސާނީ ދަތިތަކާއި، ދިރިއުޅުމުގައި ނިންމަންޖެހޭ އުނދަގޫ ނިންމުންތަކުގެ ސަބަބުން މުޅި ދިރިއުޅުން ބަދަލުވެގެންދާ ގޮތް މި ސިލްސިލާއިން ފެނިގެންދާނެއެވެ. މީގެ އިތުރުން ވަފާތެރިކަމާމެދު ސުވާލު އުފެދޭ ހިސާބުން ގުޅުންތަކަށް ކުރިމަތިވާ ގޮންޖެހުންތައް ވެސް މި ވާހަކައިގައި ހިމެނެއެވެ.
މި ހިނގާ ޖޫން މަހުގެ 15 ވަނަ ދުވަހުން ހަމް ޓީވީއިން “މަރްގޭ ވަފާ” ދައްކަން ފަށާއިރު، ކޮންމެ ހަފުތާއެއްގެ ހޯމަ ދުވަހުން ފެށިގެން ބުރާސްފަތި ދުވަހުގެ ނިޔަލަށް، ރޭގަނޑު 9:00 ގައި މި ސިލްސިލާ ދައްކާ ގޮތަށް ވަނީ ހަމަޖެހިފައެވެ.
