އެމީހުންގެ ދަރިންނަށް ދޭންޖެހޭ ޚަރަދު (ޗައިލްޑް ސަޕޯޓް) ނުދީ ތިބި 13،000 އަށްވުރެ ގިނަ ބަފައިންގެ ލިސްޓެއް، އާޖެންޓީނާގެ ސަރުކާރުން، އެމެރިކާގެ ކަމާބެހޭ އިދާރާތަކާ ވަނީ ހަވާލުކޮށްފައެވެ. މީގެ ބޭނުމަކީ މިހާރު އެމެރިކާ، މެކްސިކޯ އަދި ކެނެޑާގައި ކުރިއަށްދާ ފީފާ ވޯލްޑް ކަޕް ބަލަން އެމީހުންނަށް އެމެރިކާއަށް ނުވަދެވޭ ގޮތް ހެދުމެވެ.
އާޖެންޓީނާގެ ޖަސްޓިސް މިނިސްޓްރީން ހާމަކޮށްފައިވާ ގޮތުގައި، މި ލިސްޓުގައި ހިމެނެނީ ކޯޓުން އަމުރުކޮށްފައިވާ ގޮތަށް ދަރިންނަށް ދޭންޖެހޭ މާލީ އެހީތެރިކަން ދިނުމުގައި ގަސްދުގައި އިހުމާލުވަމުންދާ މީހުންނެވެ. މި ފިޔަވަޅަކީ ދަރިންގެ ޙައްޤުތައް ހިމާޔަތްކުރުމަށާއި، ޒިންމާދާރުކަން އިތުރުކުރުމުގެ ގޮތުން އެޅި ހަރުކަށި ފިޔަވަޅެކެވެ.
މި ލިސްޓު އެމެރިކާގެ ސަރުކާރާ ހަވާލުކުރުމުން، އެ ޤައުމުން އެމީހުންނަށް ވިސާ ދޫކުރުމުގައި ހަރުކަށި އުސޫލުތަކެއް ގެންގުޅޭނެއެވެ. އަދި ވޯލްޑް ކަޕް ބަލަން ދިއުމަށް ވިސާއަށް އެދޭ ހިނދު، ދަރިންނަށް ދޭންޖެހޭ ޚަރަދު ނުދައްކާހާ ހިނދަކު އެމީހުންނަށް އެމެރިކާއަށް އެތެރެވުމުގެ ހުއްދަ ނުލިބޭނެއެވެ.
އާޖެންޓީނާއަކީ ފުޓްބޯޅައަށް ވަރަށް ބޮޑު ލޯތްބެއް އޮންނަ ޤައުމަކަށް ވުމާއެކު، މިއީ އެފަދަ މީހުންނަށް ދެވޭ ވަރަށް ވަރުގަދަ އިންޒާރެއް ކަމަށް މަސްދަރުތަކުން ބުނެއެވެ. އާޖެންޓީނާގެ އޮފިޝަލުން ވިދާޅުވާ ގޮތުގައި، ދަރިންގެ ޚަރަދު ހޯދުމަށް ކުރާ މަސައްކަތުގައި މިފަދަ ބައިނަލްއަޤްވާމީ އެއްބާރުލުން ލިބުމަކީ ލިބޭ ވަރަށް ބޮޑު ކުރިއެރުމެކެވެ.
މީގެ ކުރިންވެސް އާޖެންޓީނާގައި މިފަދަ މީހުންނަށް ފުޓްބޯޅަ ދަނޑުތަކަށް ވަނުން މަނާކުރުން ފަދަ ފިޔަވަޅުތައް އަޅާފައިވެއެވެ. ނަމަވެސް، މިއީ ދުނިޔޭގެ ފެންވަރުގެ ބޮޑު މުބާރާތަކާ ގުޅުވައިގެން އެމެރިކާއާ ގުޅިގެން މިފަދަ ފިޔަވަޅެއް އެޅި ފުރަތަމަ ފަހަރެވެ.
