ބޮލީވުޑްގެ މަޝްހޫރު ތަރި ސާރާ އަލީ ޚާން އާއި ހޮލީވުޑްގެ މަޤުބޫލު އެކްޓަރު ހެންރީ ކެވިލް، ޝަރަފުވެރި “ރޯޔަލް އެސްކޮޓް 2026” ގެ ތެރެއިން ކުއްލި ގޮތަކަށް އެކުގައި ފެނިގެން ދިއުމުން ސޯޝަލް މީޑިއާގައި ބޮޑު ސަމާލުކަމެއް ލިބިއްޖެއެވެ.
މި ތާރީޚީ ހަފުލާގެ ތެރެއިން ނަގާފައިވާ ހިތްގައިމު ފޮޓޯތަކެއް ސާރާ ހިއްސާކޮށްފައިވަނީ “ލޮންޖީންސްއާ އެކު ޝާހީ ބައްދަލުވުމެއް” މި ސުރުޚީގެ ދަށުންނެވެ. އައިވަރީ ކުލައިގެ ފުރިހަމަ ހެދުމެއްގައި ސާރާ ފެނިގެންދިޔައިރު، އިނގިރޭސިވިލާތުގެ ރަސްގެފާނު ޗާލްސް ތިންވަނަ އާއި ޕްރިންސް ވިލިއަމް ވެސް ބައިވެރިވެވަޑައިގެންނެވި މި ހަފުލާއަކީ ފެޝަނާއި، ޝާހީ އާއިލާ އަދި ކުޅިވަރުގެ ފޯރި އެކުލެވިގެންވާ ބައިނަލްއަޤުވާމީ ފެންވަރުގެ ބޮޑު ހަރަކާތެކެވެ.
ނަމަވެސް، މުޅި ސޯޝަލް މީޑިއާ ގުގުމާލީ ހެންރީ ކެވިލް ފެނުމާ ގުޅިގެންނެވެ. ސަޕޯޓަރުން ވަނީ މި ބައްދަލުވުމަށް “ޕަޓޯޑީގެ އަމީރާ ސުޕަމޭންއާ ބައްދަލުވުން” މި ނަމުން މުޚާތަބުކޮށްފައެވެ. ފުރަތަމަ ގިނަ ބަޔަކަށް ހީވީ އެއީ ހެންރީއާ ވައްތަރު މީހެއް ކަމަށެވެ. އެކަމަކު ފަހުން އެއީ ހަމަ ސީދާ ހެންރީކަން ކަށަވަރުވުމުން ފޭނުންނަށް ބޮޑު ހައިރާންކަމެއް ލިބުނެވެ.
މަޝްހޫރު ގަޑި އުފައްދާ ބްރޭންޑް “ލޮންޖީންސް” އިން ވެސް ހިއްސާކޮށްފައިވާ މި ފޮޓޯތަކުން ފެނިގެންދިޔައީ ބޮލީވުޑްގެ ރީތިކަމާއި ހޮލީވުޑްގެ ފުރިހަމަކަން އެކުވެގެންދިޔަ ރީތި މަންޒަރެކެވެ. މިއީ ރޯޔަލް އެސްކޮޓް 2026 ގެ ތެރެއިން އެންމެ ގިނަ ބަޔަކު ދެއްކި އެއް ވާހަކައަށް ވަނީ ވެފައެވެ.
