ފީފާ ވޯލްޑް ކަޕް 2026 ގެ ގުރޫޕް ސްޓޭޖުގެ ފަހު މެޗުގައި ގަތަރު ބަލިކޮށް، ބޮސްނިއާ މުބާރާތުގެ ދެވަނަ ބުރަށް ދަތުރުކޮށްފިއެވެ. ވޮޝިންޓަންގެ ލޫމެން ސްޓޭޑިއަމްގައި ކުޅުނު މި ފޯރިގަދަ މެޗު ބޮސްނިއާއިން ކާމިޔާބުކުރީ 3-1 ގެ ނަތީޖާއަކުންނެވެ.
މެޗު ފެށިގެން ބޮސްނިއާއިން ވަނީ ގަތަރުގެ ހާފަށް ބާރުބޮޑުކޮށް، ވަރުގަދަ ހަމަލާތަކެއް އުފައްދާފައެވެ. އެގޮތުން އެޑިން ޖެކޯއަށް ލަނޑު ޖަހާނެ ރަނގަޅު ފުރުސަތުތަކެއް ލިބުނުއިރު، ކެރިމް އަލަޖްބެގޯވިޗް ވަނީ ދުރުން ފޮނުވާލި ހަމަލާތަކަކުން ގަތަރުގެ ޑިފެންސަށް ނުރައްކާކޮށްފައެވެ. ނަމަވެސް، ގަތަރުން މަޑުމަޑުން މެޗުގެ ތެރެއަށް ވަދެ، އެޑްމިލްސަން ޖޫނިއަރ އާއި އަކްރަމް އަފީފްގެ އެހީގައި ކައުންޓަރ އެޓޭކްތަކުގައި ނުރައްކާ ކުރަން ފެށިއެވެ.
މެޗުގެ 29 ވަނަ މިނެޓުގައި އަލަޖްބެގޯވިޗް ޖަހައިދިން ލަނޑުން ބޮސްނިއާއަށް ލީޑް ލިބުނުއިރު، މިއީ އޭނާ އޭރިއާ ބޭރުން ފޮނުވާލި ހިތްގައިމު ބޯޅައަކުން ކާމިޔާބުކޮށްދިން ލަނޑެކެވެ. މި ލަނޑަށްފަހު ބޮސްނިއާއިން ކުޅުން އިތުރަށް ވަރުގަދަކޮށްފައިވާއިރު، އޭގެ ކުޑައިރުކޮޅެއް ފަހުން ގަތަރުގެ ޑިފެންޑަރު ސުލްތާން އަލް ބްރޭކް އަތުން ބައިކޮށް ވަން ލަނޑާއެކު ލީޑް ފުޅާވެ ބޮސްނިއާއިން މެޗުގެ ކޮންޓްރޯލް ހޯދިއެވެ.
ފުރަތަމަ ހާފުގެ 42 ވަނަ މިނެޓުގައި ގަތަރުގެ ކެޕްޓަން ހަސަން އަލް ހައިދޯސް ވަނީ ލަނޑެއް ޖަހައި ފަރަގު ކުޑަކޮށްދީފައެވެ. ވަރަށް ރީތިކޮށް ޕާސް ޖެހުމަށްފަހު އޭނާ ކާމިޔާބުކުރި މި ލަނޑާއެކު، 2-1 ގެ ނަތީޖާއަކުން ގަތަރަށް އުންމީދު އާވިއެވެ.
ދެވަނަ ހާފުގައި ގަތަރުން އިސްކަންދިނީ ގިނައިރު ބޯޅަ ހިފަހައްޓައިގެން ކުޅެ، ނަތީޖާ ހަމަހަމަކުރުމަށެވެ. އެގޮތުން ޕެޑްރޯ މިގޭލްއަށް ލަނޑު ޖަހާނެ ރަނގަޅު ފުރުސަތެއް ލިބުނެވެ. އަދި އަލް ހައިދޯސް މެދުތެރެއިން ގިނަ ފުރުސަތުތަކެއް ތަނަވަސްކޮށްދިން ނަމަވެސް ބޮސްނިއާގެ ގޯލު ފޫއަޅުވާލުމުގައި ގަތަރަށް ކާމިޔާބެއް ނުހޯދުނެވެ..
ގަތަރުން ކުރިއަށް އަރައި ކުޅެމުންދަނިކޮށް، މެޗުގެ 80 ވަނަ މިނެޓުގައި ބޮސްނިއާއިން އުފެއްދި ކައުންޓަރ އެޓޭކެއްގައި މަހްމިޗް ވަނީ ބޮސްނިއާގެ ތިންވަނަ ލަނޑު ކާމިޔާބުކޮށްދީފައެވެ. މި ލަނޑަށްފަހު ބޮސްނިއާއިން ވަނީ ވަރަށް ރޭވުންތެރިކަމާއެކު ކުޅެ، ގަތަރަށް އިތުރު ފުރުސަތެއް ނުދީ 3-1 ގެ މުހިންމު މޮޅަކާއެކު މެޗު ނިންމާލާފައެވެ.
މި ނަތީޖާއާއެކު ގްރޫޕް ބީ އިން ދެވަނަ ބުރަށް ބޮސްނިއާ ދަތުރުކޮށްފައިވާއިރު، މުބާރާތުގައި ކުޅުނު ތިން މެޗުގެ ތެރެއިން ދެ މެޗުން ބަލިވުމާއެކު ގަތަރު ވަނީ މުބާރާތުން ކަޓާފައެވެ.
