ފުޓްބޯޅައިގެ ލެޖެންޑް ލިއޮނަލް މެސީ، “ސްޕައިޑަރ-މޭން: ބްރޭންޑް ނިއު ޑޭ” އިޝްތިހާރު ކުރުމަށް ތައްޔާރުކޮށްފައިވާ ވީޑިއޯއަކުން އެކްޓަރު ޓޮމް ހޮލެންޑާ އެކު ފެނިލުމުން، ދުނިޔޭގެ އެކި ކަންކޮޅުތަކުގެ ސަމާލުކަން އެކަމަށް ހުއްޓިއްޖެއެވެ. 40 ސިކުންތުގެ މި ކުރު ވީޑިއޯ ސޯޝަލް މީޑިއާގައި ވަރަށް ބާރަށް ފެތުރިގެން ގޮސްފައިވަނީ، ހަމައެކަނި މެސީ އޭގައި ފެންނާތީއެއް ނޫނެވެ. އެ ވީޑިއޯއަށް އޭނާއަށް ލިބުނު ކަމަށް ބުނާ ބޮޑު އުޖޫރައިގެ ސަބަބުންވެސް މެއެވެ.
މީޑިއާ ރިޕޯޓްތައް ބުނާ ގޮތުގައި މި އިޝްތިހާރުން މެސީއަށް ގާތްގަނޑަކަށް 15 މިލިއަން އެމެރިކާ ޑޮލަރު ލިބިފައިވެއެވެ. މި ވީޑިއޯގައި އޭނާ ބުނެފައިވަނީ އެންމެ ފަސް ބަސް ކަމަށް ވާއިރު، އޭގެ މާނައަކީ އޭނާ ބުނި ކޮންމެ ބަހަކަށް ގާތްގަނޑަކަށް 28 ކްރޯޑް ރުޕީސް (45,332,000 ދިވެހި ރުފިޔާ) ޖެހޭ ކަމަށެވެ. މި ތަފާސްހިސާބުތަކާއެކު އިންޓަނެޓްގައި މިހާރު ދަނީ މިކަމާ ބެހޭގޮތުން ވަރުގަދަ ބަހުސްތަކެއް ކުރެވެމުންނެވެ.
މި އުޖޫރައާ ގުޅޭގޮތުން މާވެލް ސްޓޫޑިއޯސް އިން ނުވަތަ މެސީގެ މަންދޫބުންވެސް އަދި ރަސްމީ އެއްޗެއް ބުނެފައެއް ނުވެއެވެ. ނަމަވެސް، މި ފެނިލުމުގެ ސަބަބުން އަންނަ ޖުލައި މަހުގެ 31 ވަނަ ދުވަހު މުޅި ދުނިޔެއަށް މި ފިލްމު ރިލީޒްކުރާއިރު، ފިލްމަށް އޮތް އިންތިޒާރާއި ފޯރި ވަނީ އެތައް ގުނައަކަށް އިތުރުވެފައެވެ.
މެސީ ފަދަ ދުނިޔޭގެ މަޝްހޫރު ޝަހުސިއްޔަތުން މިފަދަ ބޮޑެތި ފިލްމުތަކުގެ އިޝްތިހާރުތަކުން ފެނުމަކީ، ކުޅިވަރާއި މުނިފޫހިފިލުވުމުގެ ދާއިރާ އެކުވެ، އެކަކު އަނެކަކަށް އެހީތެރިވެދޭ މިންވަރު އިތުރުވަމުންދާކަމުގެ ހެއްކެކެވެ.
