ހިތުގެ ބަލިތަކަކީ މިއަދު މުޅި ދުނިޔޭގައިވެސް އެންމެ ގިނައިން މީހުން މަރުވާ އެއް ސަބަބެވެ. މިފަދަ ނުރައްކާތެރި ބަލިތަކުން ސަލާމަތްވުމަށްޓަކައި، ކެއުންބުއިމުގެ އާދަތަކަށް ބަދަލު ގެނައުމަކީ ކޮންމެހެން ކުރަންޖެހޭ ކަމެކެވެ. ހިތުގެ ބަލިތަކުން ރައްކާތެރިވުމަށް ކެއުމުގެ އާދަތައް ބަހައްޓަންވީ ގޮތާ ގުޅޭގޮތުން ދިރާސާކުރައްވާ ތަޖުރިބާކާރު ޑައިޓީޝަނެއް ކަމަށްވާ މެތިއު ލޭންޑްރީ ފާހަގަކުރައްވާ ގޮތުގައި، ދިރިއުޅުމުގެ ކުރީކޮޅު ކެއުމަށް ގެނެވޭ ކުދިކުދި ބަދަލުތަކަކީ ފަހުން ކުރިމަތިވެދާނެ ހިތުގެ މައްސަލަތަކުން ސަލާމަތްވުމަށް އެޅޭ ވަރުގަދަ ބިންގަލެކެވެ.
މެތިއު ލޭންޑްރީ އިރުޝާދު ދެއްވަނީ ހަށިގަނޑުގައި ހުންނަ ކޮލެސްޓްރޯލްގެ މިންވަރު ކޮންޓްރޯލް ކުރުމަށްޓަކައި ކެއުމުގެ ތެރޭގައި ހިމެނޭ ބައެއް ބާވަތްތައް ބަދަލުކޮށްލުމަށެވެ. އެމެރިކަން ހާޓް އެސޯސިއޭޝަނުން ހާމަކުރާ ގޮތުގައި، މެޑިޓަރޭނިއަން ސަރަހައްދުގެ މީހުން ކައިއުޅޭ ފަދަ ސިއްހީ ގޮތުން ފައިދާހުރި ކާނާ ބޭނުންކުރުމާއި، ގަވާއިދުން ކަސްރަތު ކުރުމަކީ ހިތުގެ ބަލިތަކުގެ ނުރައްކާ ވަރަށް ބޮޑަށް ކުޑަކޮށްދޭ ކަމެކެވެ. މިގޮތުން ތާޒާ މޭވާ އާއި ތަރުކާރީ، ހޯލް ގްރެއިން، އަދި މަހުގެ ބާވަތްތަކަށް އިސްކަންދީ، އާދަޔާ ހިލާފަށް ޕްރޮސެސްކޮށްފައި ހުންނަ ކާނާއާއި ހަކުރު ގިނަ ބާވަތްތައް މަދުކުރަން ޖެހެއެވެ.
ހިތުގެ ދުޅަހެޔޮކަމަށްޓަކައި މެތިއު ލޭންޑްރީ ހުށަހަޅުއްވާ މުހިންމު ތިން ބަދަލަކީ:
1- ކެއްކުމުގައި ބަޓަރުގެ ބަދަލުގައި ޒައިތޫނި ތެޔޮ ބޭނުންކުރުން: ބަޓަރަކީ އޭގައި ސެޗުރޭޓެޑް ފެޓް ގިނަ އެއްޗަކަށް ވުމުން، އެއީ ކޮލެސްޓްރޯލް މަތިވުމަށް މެދުވެރިވާ ކަމެކެވެ. އޭގެ ބަދަލުގައި ޒައިތޫނި ތެޔޮ (އޮލިވް އޮއިލް) ބޭނުންކުރުމަކީ ހިތަށް ފައިދާހުރި މާއްދާތަކެއް ހަށިގަނޑަށް ލިއްބައިދޭނެ ކަމެކެވެ.
2- ރަތްކޮށް ހުންނަ މަހުގެ ބަދަލުގައި ކުކުޅު ނުވަތަ ދޫނީގެ މަސް ބޭނުންކުރުން: ގެރިމަސް ފަދަ ރަތްކޮށް ހުންނަ މަހުގެ ބާވަތްތަކަކީ ހިތުގެ ބަލިތަކަށް މަގުފަހިވާ މާއްދާތައް ގިނަ ބާވަތްތަކެކެވެ. އެހެންކަމުން، ރަތްކޮށް ހުންނަ މަސް ކެއުން މަދުކޮށް، އޭގެ ބަދަލުގައި ކުކުޅު ނުވަތަ ފަރުމަހުގެ ބާވަތްތައް ބޭނުންކުރުމަކީ ސިއްހަތަށް ފައިދާހުރި ގޮތެކެވެ.
2- ހުދު ފުށުގެ ބާވަތްތަކުގެ ބަދަލުގައި އާޓާ ފުށުގެ ބާވަތްތައް ބޭނުންކުރުން: ހުދު ހަނޑުލާއި ހުދު ފުށުން ތައްޔާރުކޮށްފައި ހުންނަ ތަކެތީގެ ބަދަލުގައި، ފައިބަރުން މުއްސަނދިވެފައިވާ “ހޯލް-ވީޓް” ނުވަތަ އާޓާ ފުށުގެ ބާވަތްތައް ބޭނުންކުރުމަށް އާދަކުރަންޖެހެއެވެ.
މިދެންނެވި ފަދަ ކުދިކުދި ބަދަލުތަކަކީ ފެންނަ ފެނުމަށް އާދައިގެ ކަންތައްތަކެއް ކަމުގައި ހީވިޔަސް، މިއީ ދިގު މުއްދަތެއްގައި ހިތުގެ ދުޅަހެޔޮކަން ދެމެހެއްޓުމަށާއި، އެކަށީގެންވާ މިންވަރެއްގައި ކޮލެސްޓްރޯލް ހިފެހެއްޓުމަށް ލިބޭ ވަރަށް ބޮޑު އެހީއެކެވެ. ދުޅަހެޔޮ ދިރިއުޅުމަކަށްޓަކައި ކެއުމުގެ އާދަތަކަށް ސަމާލުކަން ދިނުމަކީ ކޮންމެ މީހެއްގެވެސް ފަރުދީ ޒިންމާއެކެވެ.
މަޢުލޫމާތު: އެމްއެސްއެން ހެލްތު
