އަދުގެ ހަލަބޮލި ދުނިޔޭގައި އަޅުގަނޑުމެންގެ ވަށައިގެންވަނީ މާއްދީ ތަކެއްޗާއި، އިސްރާފާއި، އަދި ނުނިމޭ ފަދަ މަސައްކަތްތަކެވެ. މިފަދަ މާހައުލެއްގައި ގޭތެރޭގައި ބޭނުމެއްނެތް ތަކެތި ގިނަވުމަކީ ނޭނގި ނަމަވެސް އަޅުގަނޑުމެންގެ ނަފްސަށް ބޮޑު ބުރައަކަށް ވަނީ ވެފައެވެ. ގޭތެރޭގައި ހުންނަ ބޭނުމެއްނެތް ތަކެތި (ކުނިބުނި) މަދުކުރުމަކީ ނުވަތަ ‘ޑިކްލަޓަރ’ ކުރުމަކީ ހަމައެކަނި ގޭތެރެ ސާފުކުރުމެއް ނޫނެވެ. އެއީ އުފާވެރި އަދި ހަމަޖެހޭ ދިރިއުޅުމަކަށް ކޮންމެހެން ބޭނުންތެރި ކަމެކެވެ.
އަޅުގަނޑުމެން އަމިއްލަ ނަފްސާ ކޮށްލަންޖެހޭ ވަރަށް މުހިންމު ސުވާލުތަކެއް އެބަހުއްޓެވެ. ހަގީގަތުގައި ވެސް އަޅުގަނޑުމެންނަށް 8 ފެންފުޅި ބޭނުންވޭ ހެއްޔެވެ؟ 15 ބާވަތުގެ ފައިވާނާއި ބޫޓު ނުވަތަ 10 އަވިއައިނު ބޭނުންވޭ ހެއްޔެވެ؟ 18 މަގާއި، ވިހި އަތްދަބަސް އަޅުގަނޑުމެންގެ އަލަމާރިތަކުގައި ފުނިޖެހިފައި ހުންނައިރު، މިއީ ހަގީގީ ބޭނުމަކަށްވުރެ ބޮޑަށް، ބޭނުމެއްނެތް އިސްރާފަށް ނޫނީ ނުވެއެވެ.
މިއީ ބޭނުންޖެހިގެން ކުރާ ކަމެއް ނޫނެވެ. މިއީ މިންވަރަށްވުރެ އިތުރަށް ތަކެތި ގަތުމާއި އެއްކުރުމުގެ އާދައެވެ. އަޅުގަނޑުމެންގެ ގެދޮރު މިވަނީ އެއްވެސް ބޭނުމެއް ނެތި، އަލަމާރިތަކުގެ ކަންކަނުގައި ރައްކާކޮށްފައި ހުންނަ ތަކެތިން ފުރިފައެވެ. މި ތަކެތި ގަންނަ އިރު، އެއީ ފަސޭހައަކަށް ނުވަތަ އުފަލަކަށް ގަންނަ އެއްޗެއް ކަމަށް ހީވި ނަމަވެސް، ގިނަ ފަހަރަށް އެ ތަކެތިން ކުރާ ހަމައެކަނި ކަމަކީ ޖާގަ ހަނިކުރުމެވެ. މި ތަކެތީގެ ސަބަބުން އަޅުގަނޑުމެންގެ މާލީ ހާލަތަށާއި، ނަފްސާނީ ހަމަޖެހުމަށް އަދި ތިމާވެއްޓަށް ވެސް ނޭދެވޭ އަސަރުތައް ކުރެއެވެ.
ބޭނުން ނުކުރާ އެތައް އެއްޗެއް މިގޮތަށް ގެންގުޅުމުގެ މަގުސަދަކީ ކޮބައިހެއްޔެވެ؟ މި ތަކެތީގެ ސަބަބުން އަޅުގަނޑުމެންގެ ދިރިއުޅުމަށް އެއްވެސް ކުރިއެރުމެއް ލިބޭ ހެއްޔެވެ؟ ނުވަތަ މިއީ ހަމައެކަނި ވަގުތީ އުފަލަކަށްޓަކައި ކުރެވޭ އިސްރާފެއް ހެއްޔެވެ؟ ދުނިޔޭގެ ވަސީލަތްތަކަކީ މަދު އެއްޗަކަށް ވާއިރު، މިފަދަ ގޮތަކަށް މިންވަރަށްވުރެ އިތުރަށް ތަކެތި ބޭނުންކުރުމަކީ ތަނަވަސްކަމުގެ ނިޝާނެއް ނޫނެވެ. އެއީ ދިރިއުޅުމުގެ ހަމަހަމަކަން ގެއްލިފައިވާ ކަމުގެ ހެއްކެކެވެ.
އެހެންކަމުން، އަޅުގަނޑުމެން ވިސްނާލަންވީ ކިހާ ގިނަ އެއްޗެއް ހޯދިދާނެތޯއެއް ނޫނެވެ. އޭގެ ބަދަލުގައި، އުފާވެރި ދިރިއުޅުމަކަށް ހަގީގަތުގައި ވެސް ބޭނުންވަނީ ކިހާ މަދު މިންވަރެއްތޯއެވެ. މަދު އެއްޗަކުން ފުއްދާލައިގެން އުޅުމަކީ ދިރިއުޅުމަށް ލިބޭނެ އެންމެ ބޮޑު ތަނަވަސްކަމެވެ.
ގޭތެރެ ތަރުތީބުނުވެ، ތަކެތި ގިނަވުމަކީ އިންސާނާގެ ސިކުނޑިއަށް ވަރަށް ބޮޑަށް ބާރުބޮޑުވާ ކަމެކެވެ. މީގެ ސަބަބުން ކަންކަމަށް ސަމާލުކަން ދޭން އުނދަގޫވުމާއި، ހާސްކަން އިތުރުވުމާއި، އަދި ނަފްސާނީ ގޮތުން ވަރުބަލިކަން އިހުސާސް ކުރަންޖެހެއެވެ. ނަމަވެސް، ވަށައިގެންވާ މާހައުލަކީ ސާފުތާހިރު، ތަރުތީބު ތަނަކަށް ވުމުން ސިކުނޑިއަށް ހަމަޖެހުން ލިބި، މަސައްކަތްތަކަށް ދޭ ސަމާލުކަން އިތުރުވެއެވެ. ގެއަކީ ހާސްކަމުގެ މައިދާނަކަށް ވުމުގެ ބަދަލުގައި، ވަރުބަލިކަން ފިލުވައިދޭ އަމާން ބަނދަރަކަށް ބަދަލުވެގެންދަނީ މިފަދަ ތަރުތީބުކަމެއް ގޭތެރޭގައި އޮތުމުންނެވެ.
ޖިސްމާނީ ދުޅަހެޔޮކަމަށް ބަލާއިރުވެސް، ބޭނުމެއްނެތް ތަކެތި މަދުކުރުމުގެ ފައިދާ ވަރަށް ބޮޑެވެ. ގޭތެރޭގައި ތަކެތި މަދުވުމުން ސާފުކުރަން ފަސޭހަވެ، ހިރަފުހާއި ޖަރާސީމުން ސަލާމަތްވުމަށް މަގުފަހިވެއެވެ. މީގެ އިތުރުން، ތަރުތީބުވެފައިވާ ކޮޓަރިއެއްގައި ނިދުމަކީ އަރާމު ނިދި ލިބުމަށް އެހީތެރިވެދޭ ކަމެކެވެ. އަދި ގޭތެރޭގައި ހިނގާބިނގާވެ އުޅުމަށް ފަސޭހަވެ، އެކި ކަހަލަ ނުރައްކާތެރި ހާދިސާތަކުން (މިސާލަކަށް އެއްޗެއްގައި އަޅައިގަނެގެން ވެއްޓުމުން) ސަލާމަތްވުމަށް އެހީތެރިވެދެއެވެ.
ނަފްސާނީ ގޮތުން ބަލާއިރު، ބޭނުމެއްނެތް ތަކެތި ދޫކޮށްލުމަކީ މާޒީގެ ބަރުތަކުން މިންޖުވުމަށް އެޅޭ ފިޔަވަޅެކެވެ. އަޅުގަނޑުމެންގެ ތެރެއިން ބައެއް މީހުންނަކީ މާޒީގެ ހަނދާންތަކާ ގުޅިފައިވާ އެކި ތަކެތި، އޭގެ ބޭނުމެއް ނެތް ނަމަވެސް ރައްކާކޮށްގެން އުޅޭ މީހުންނެވެ. މިފަދަ ތަކެތި ދޫކޮށްލުމަކީ އާ ފުރުސަތުތަކަށާއި، އާ އުއްމީދުތަކަށް ޖާގަ ހުޅުވާލުމެވެ. އިސްލާމީ ރީތި އުސޫލުތަކުގައިވެސް އިސްރާފު ކުރުމަކީ ނަހީކުރައްވާފައިވާ ކަމެކެވެ. އެހެންކަމުން، ބޭނުމެއް ނެތް ތަކެތި އެއްކުރުމުގެ ބަދަލުގައި، އެހެން މީހަކަށް ބޭނުންތެރި އެއްޗެއް ނަމަ ހަދިޔާކުރުމަކީ ދީނީ ގޮތުންނާއި އިޖުތިމާއީ ގޮތުންވެސް ރަނގަޅު ކަމެކެވެ.
‘ލެސް އިޒް މޯ’ ނުވަތަ މަދުވުމަކީ ފުރިހަމަވުން ކަމަށް ބުނާ ބުނުމަކީ މިއަދުގެ ދުނިޔޭގައި ވަރަށް މުހިންމު ފަލްސަފާއެކެވެ. ގެދޮރު ތަރުތީބުކޮށް، ކުނިބުނި މަދުކުރުމުން އަޅުގަނޑުމެންގެ ހަކަތައާއި، ވަގުތާއި، އަދި ނަފްސާނީ ހަމަޖެހުން އަނބުރާ ލިބިގެންދާނެއެވެ. މިއަދު އަޅުގަނޑުމެންގެ ދިރިއުޅުން އާ ފެށުމަކުން ފަށައި، ގޭތެރެއަކީ އުފާވެރި މަންޒިލަކަށް ހަދަމާ ހިނގާށެވެ.
