އިންސާނާގެ ހިތަކީ ތަފާތު އިޙްސާސްތަކުން ފުރިގެންވާ އެއްޗެކެވެ. އުފާވުމާއި، ދެރަވުމާއި، ބިރުގަތުމަކީ އިންސާނީ ތަބީޢަތުގައި ހިމެނޭ ކަންކަމެވެ. ނަމަވެސް މިއަދުގެ މުޖުތަމަޢަށް ބަލާއިރު، ހިތާމަވެރި ފިލްމެއް ނުވަތަ ޑްރާމާއެއް ބަލައިލުމުން ލޮލުން ކަރުނަ ނުއޮހޮރޭ މީހަކު މަދެވެ. ފިލްމެއްގައި ދައްކުވައިދޭ ހަޤީޤަތެއް ނެތް ޚިޔާލީ މަންޒަރުތަކަކަށްޓަކައި އަހަރެމެންގެ ހިތްތައް މަޑުމޮޅިވެ، ރޮވޭއިރު، މިއަށްވުރެ މާ ބޮޑުވެގެންވާ ހަޤީޤަތްތަކަކާމެދު ވިސްނާލެވެނީ ކިތައް މީހުންނަށް ބާވައެވެ؟ ﷲ ތަޢާލާ ބާވައިލެއްވި ޢަޒާބުގެ އާޔަތްތައް ކިޔަވާއިރު، އެކަލާނގެ ކިބައިން ބިރުވެތިވެ، ކަރުނަ އޮހޮރަން މިއަދު އަހަރެމެން މިވަނީ ނުކުޅެދިފައެވެ. އެހެނަސް، ޙަޤީޤީ ބިރުވެތިކަމާއި ކަރުނައަކީ، މަރުވުމަށްފަހު އޮތް ބިރުވެރި ދުވަހާއި ﷲ ތަޢާލާގެ ގަދަފަދަ ޢަޒާބުގެ އާޔަތްތައް ކިޔަވާއިރު އޮހޮރެންޖެހޭ އެއްޗެކެވެ.
މަރުވުމަށްފަހު އިންސާނާއާ ކުރިމަތިވާނެ ކަންކަމަކީ ކޮންމެ މުއުމިނަކުވެސް ފުންކޮށް ވިސްނާލަންޖެހޭ ކަންކަމެވެ. ﷲ ސުބުޙާނަހޫ ވަތަޢާލާގެ ޢަޒާބުގެ ގަދަފަދަކަމަކީ އިންސާނާގެ ސިކުނޑިއަށް ތަސައްވުރުވެސް ނުކުރެވޭނެހާ ބިރުވެރި ކަމެކެވެ. ދުނިޔޭގެ ވަގުތީ އުފަލާއި މަޖަލުގައި މަސްއޫލުވެގެން އުޅޭއިރު، އަހަރެމެންނަށް މަރުގެ ހިތިކަމާއި އޭގެ ފަހުން އޮތް މަރުހަލާތައް ހަނދާން ނެތެނީއެވެ. ކީރިތި ޤުރުއާނުގައި ﷲ ވަނީ އެކަލާނގެ ޢަޒާބުގެ ގަދަފަދަކަމާ ބެހޭގޮތުން އެތައް އިންޒާރުތަކެއް ދެއްވާފައެވެ.
އިންސާނާގެ ފުރަތަމަ މަންޒިލަކީ ކަށްވަޅެވެ. ކަށްވަޅުގެ ޢަޒާބަކީ ޙައްޤު އެއްޗެކެވެ. މީހަކު މަރުވެ ކަށްވަޅަށް ލެވުމާއެކު، އޭނާގެ ޢަމަލުތައް ނުބައިނަމަ، ކަށްވަޅު އޭނާގެ މައްޗަށް ބާރުވެ، ދެފަރާތުގެ މޭކަށިގަނޑު އަރާހަމަވާ މިންވަރަށް ފިތިގެންދާނެއެވެ. މުންކަރާއި ނަކީރުގެ ސުވާލުތަކަށް ޖަވާބު ނުދެވޭ މީހާއަށް ހުރި ވޭނާއި ކަކުލު ހުޅުން ބިންދައިގެންދާފަދަ ތަޅާލުންތަކަކީ ހިތަށް އެރުވި ނަމަވެސް ގައިން ހީބިހި ނަގާފަދަ ކަންކަމެވެ. މި ބިރުވެރި ވަގުތުތަކުގެ ވާހަކަ އިވުމުން ނުއޮހޮރޭ ކަރުނައެއް، ފިލްމެއްގެ ކޮންމެވެސް މަންޒަރަކަށް އޮހޮރުވުމަކީ ހިތުގެ ހަރުކަމާއި ޣާފިލުކަމުގެ ހެއްކެކެވެ.
ކަށްވަޅުގެ ޢަޒާބަށްފަހު ދެން އޮތީ ނަރަކައިގެ ބިރުވެރި ޢަޒާބެވެ. ނަރަކައިގެ އަލިފާނަކީ ދުނިޔޭގެ އަލިފާނަށްވުރެ ހަތްދިހަ ގުނަ ހޫނުގަދަ އެއްޗެކެވެ. އެތަނުގެ ކާނާއަކީ ކެއުމުން ކަރުގައި ތާށިވާ ކޮލިގަހެވެ. ބޯފެނަކީ ބަނޑުގެ ގޮހޮރުތައް ފިހިގެން ފައިބާފަދަ ހޫނުގަދަ އަލިފާނެވެ. ﷲ ތަޢާލާ ވަނީ ނަރަކައިގެ ވަޞްފު ބަޔާންކުރައްވައި، އޭގެ ޢަޒާބުން ސަލާމަތްވުމަށް އަހަރެމެންނަށް އަމުރުކުރައްވާފައެވެ. “އޭ އީމާންވެއްޖެ މީސްތަކުންނޭވެ! ތިޔަބައިމީހުންގެ އަމިއްލަ ނަފްސުތަކާއި، ތިޔަބައިމީހުންގެ އަހުލުވެރިން ނަރަކައިގެ އަލިފާނުން ސަލާމަތްކުރާށެވެ!” މި އާޔަތްތަކާމެދު ވިސްނާލާ ކޮންމެ މީހަކަށް ކަރުނަ ނުއޮހޮރުވައެއް ނުހުރެވޭނެއެވެ.
އެހެންކަމުން، އަހަރެމެންގެ ވަގުތުތައް ބޭކާރު ކަންކަމުގައި ހޭދަކުރުން ހުއްޓާލަން ޖެހެއެވެ. ފިލްމުތަކުގެ ޚިޔާލީ ދުނިޔެއިން ނުކުމެ، ޙަޤީޤީ ދުނިޔެއާ ކުރިމަތިލާން ޖެހެއެވެ. ހިތަށް މަޑުމޮޅިކަން ގެނެސްދޭނީ ﷲގެ ފޮތް ކިޔަވައިގެންނެވެ. އެކަލާނގެ ޢަޒާބުގެ އާޔަތްތައް ކިޔަވާއިރު، އެކަލާނގެއަށް ބިރުވެތިވެ ކަރުނަ އޮހޮރުވުމަކީ އީމާންކަން ވަރުގަދަވެ، ނަރަކައިން ސަލާމަތްވުމަށް މަގުފަހިވާނެ ކަމެކެވެ. ﷲގެ ޢަޒާބަށް ބިރުން އޮހޮރޭ ކަރުނަ ތިއްކަކީ ޤިޔާމަތް ދުވަހުން ނަރަކައިގެ އަލިފާން ނިއްވައިލާނެ އެއްޗަކަށް ވެދާނެއެވެ. އަހަރެމެންނީ ﷲއަށް ބިރުވެތިވާ، އެކަލާނގެ ޢަޒާބުން ސަލާމަތްވުމަށް އެދި ދަންނަވާ ބަޔަކު ކަމުގައި ލައްވާށިއެވެ. އާމީން!
