ސާފް ފުޓްސެލް ޗެމްޕިއަންސިޕްގައި ދިވެހިރާއްޖެ ކުޅުނު ފަހު މެޗުން ވެސް ދިވެހިރާއްޖެ މޮޅުވެއްޖެއެވެ.

ސްރީލަންކާއާ ދެކޮޅަށް ދިވެހިރާއްޖެ މިއަދު ކުޅުނު މެޗުން މޮޅުވީ 2-5 އިންނެވެ. ކުރިން ކުޅުނު މެޗުތައް ފަދައިން މިއަދުގެ މެޗުގައި ވެސް ދިވެހިރާއްޖެއިން ވަނީ މޮޅު ކުޅުމެއް ދައްކާފައެވެ.

މި މެޗަށް ނުކުތްއިރު ވެސް ޗެމްޕިއަންކަން ކަށަވަރުވެފައިވާ ދިވެހިރާއްޖެއިން މި މެޗުގެ ފުރަތަމަ ލަނޑު ޖެހީ ފުރަތަމަ ހާފުގެ 12 ވަނަ މިނިޓްގައި މުހައްމަދު އިމްރާންއެވެ. 17 ވަނަ މިނިޓްގައި ސްރީލަންކާއިން މެޗު އެއްވަރުކުރި ނަމަވެސް ފުރަތަމަ ހާފު ނިމުމުގެ ކުރިން ދިވެހިރާއްޖެއިން ވަނީ ދެވަނަ ފަހަރަށް ލީޑު ނަގާފައެވެ. މި ލަނޑު ދިވެހިރާއްޖެއަށް ޖަހައިދިނީ ހުޒައިފަތު ރަޝީދުއެވެ.

ދެވަނަ ހާފުގެ 6 ވަނަ މިނިޓްގައި ސްރީލަންކާއިން މެޗުގެ ނަތީޖާ ހަމަހަމަކުރިއިރު، އޭގެ ތިން މިނިޓް ފަހުން ދިވެހިރާއްޖެއިން ވަނީ ތިންވަނަ ފަހަރަށް ލީޑު ނަގާފައެވެ. މި ލަނޑަކީ އަހްމަދު ހަމީދު ގޯލް ކުރިމައްޗަށް ނަގައިދިން ބޯޅަ ސަލާމަތްކުރަން މަސައްކަތްކުރި ސްރީލަންކާ ކުޅުންތެރިއެއް ގައިގައި ޖެހިފައި ބައިކޮޅަށް ވަތް ލަނޑެކެވެ. 14 ވަނަ މިނިޓްގައި ހުސެއިން ޝުހައިލް އަދި 16 ވަނަ މިނިޓްގައި މުހައްމަދު އިމްރާން ޖަހައިދިން ގޯލްތަކުން ދިވެހިރާއްޖެ ލީޑު ފުޅާކުރިއެވެ.

މި މުބާރާތުގެ ޗެމްޕިއަންކަން ހޯދި ދިވެހިރާއްޖެ ވަނީ ކުޅުނު ހުރިހާ މެޗަކުން މޮޅުވެފައެވެ.

މުބާރާތުގެ ޗެމްޕިއަން ޓްރޮފީއާއެކު ދިވެހިރާއްޖެ ޓީމު ދިވެހިރާއްޖެ އައުމަށް ހަމަޖެހިފައިވަނީ މާދަމާ ރެއެވެ. ޓީމަށް މަރުހަބާ ކިޔުމުގެ ގޮތުން ޚާއްސަ ހަރަކާތްތަކެއް އެއާޕޯޓާއި މާލޭގައި ކުރިޔަށް ގެންދިއުމަށް ވަނީ ހަމަޖެހިފައެވެ.