ރާއްޖޭގެ އަތޮޅުތެރޭގައި ބާއްވާ އެންމެ އަގުބޮޑު ފުޓްބޯޅަ މުބާރާތްތަކުގެ ތެރޭގައި ހިމެނޭ “ދި މެންގްރޫވް އައިލެންޑް ޗެންޕިއަންޝިޕް 2026” ފުޓްބޯޅަ މުބާރާތުގައި ބައިވެރިވުމުގެ ފުރުސަތު ވަނީ މިމަހުގެ 20 ވަނަ ދުވަހުގެރޭ 23:59 އާ ހަމައަށް ހުޅުވާލާފައެވެ.
ޗެންޕިއަން ޓީމަށް ތިން ލައްކަ ރުފިޔާ އަދި ރަނައަޕް ޓީމަށް އެއްލައްކަ ރުފިޔާ ދޭ މިމުބާރާތުގައި ބައިވެރިކުރުމަށް ހަމަޖެހިފައިވަނީ 10 ޓީމެވެ. ޓީމުތައް ބައިވެރިކުރުމަށް ހަމަޖެހިފައިވަނީ ރަޖިސްޓްރޭޝަންގެ ކަންކަން ފުރިހަމަކުރާ ތަރުތީބަށް ބަލައިގެންނެވެ.
2022 ވަނަ އަހަރު ބާއްވަންފެށި މިމުބާރާތުގެ އެންމެފަހުގެ ޗެންޕިއަން ވިންޑް ވޯރިއަރސް ސްޕޯރޓްސް ކުލަބާއި ރަނައަޕް ނައިފަރު ޗެލްސީ ސްޕޯރޓްސް ކުލަބަށް ވަނީ އޮޓޮމެޓިކް ޖާގައެއް ލިބިފައެވެ.
ފޮޓޯ: މެންގްރޫވް އައިލެންޑް ޗެންޕިއަންޝިޕް
ދިވެހިފުޓްބޯޅައަށް ލޯބިކުރާ ގިނަބައެއްގެ ސަމާލުކަން ހުއްޓިފައިވާ މިމުބާރާތަކީ ރާއްޖެތެރޭގައިވާ ބާއްވާ މުބާރާތްތަކުގެ ތެރެއިން، ޤައުމީޓީމުގެ އެންމެގިނަ ކުޅުންތެރިން ކުޅޭ އެއްމުބާރާތެވެ. ވޭތުވެދިޔަ އަހަރުގެ މުބާރާތުގައި ވެސް ޤައުމީޓީމުގެ ކުޅުންތެރިންނާއި ބިދޭސީ ކުޅުންތެރިންގެ އިތުރުން ފުރަތަމަ ޑިވިޝަންގައި ކުޅޭ އެތައް ކުޅުންތެރިންނެއް ކުޅުނެވެ.
ފޮޓޯ: މެންގްރޫވް އައިލެންޑް ޗެންޕިއަންޝިޕް
މިއަހަރުގެ މުބާރާތުގައި މިހާތަނަށް ބައިވެރިވެފައިވާ ޓީމުތަކަކީ ވޭތުވެދިޔަ އަހަރުގެ ރަނައަޕް ނައިފަރު ޗެލްސީ ސްޕޯރޓްސް ކުލަބް، މާފަރު ފުޓްބޯޅަ ކުލަބު، ށ. މިލަންދޫ ޑީ.އެސް.ކިޔު، އަލިފުށީ ރެކްރިއޭޝަން ކުލަބު، އދ. މަހިބަދޫ ޖިބިއްލީ ސްޕޯރޓސް ކުލަބް، މަނަދޫ ސްޕޯރޓްސް ކުލަބު އެވެ.
މިއަހަރުގެ މުބާރާތް ފެށުމަށް ހަމަޖެހިފައިވަނީ އޭޕްރީލް 20 ވަނަ ދުވަހުއެވެ
