މިއީ މިހާރަކަށް އައިސް ރާއްޖޭގެ ޖިމްތަކަށްދާ މީހުންނާއި ސިއްޙަތަށް ސަމާލުކަންދޭ މީހުންގެ މެދުގައި ވަރަށް ބޮޑަށް ކުރެވޭ ބަހުސެކެވެ. އަލުވި ނުވަތަ ކައްޓަލަ – މިއިން ހަށިގަނޑަށް އެންމެ ފައިދާ ހުރީ ކޮން ބާވަތެއް ބޭނުންކުރުމުން ބާވައެވެ؟ މި ދެ ބާވަތަކީވެސް އަގުހެޔޮ، އާންމުކޮށް ލިބޭ އަދި ތަފާތު ގޮތްގޮތަށް ތައްޔާރުކޮށްލެވޭ ދެ ބާވަތެވެ. ނަމަވެސް މި ދެ ބާވަތުން ލިބިދޭ ނިއުޓްރިޝަނަލް ފައިދާތަކުގައި ކޮންމެވެސް ވަރެއްގެ ތަފާތުތަކެއް ހުރެއެވެ.

ބަރުދަން ލުއިކުރުމަށް

ބަރުދަން ލުއިކުރުމަށް ބަލާއިރު، އަލުވި އަދި ކައްޓަލައިގައި ހުންނަ ކެލޮރީގެ މިންވަރު އުޅެނީ ދާދި އެއްވަރެއްގައެވެ. އެއީ ކޮންމެ 100 ގްރާމަކަށް ގާތްގަނޑަކަށް 90 ކެލޮރީއެވެ. ނަމަވެސް، އަލުވިއަށްވުރެ ކައްޓަލައިގައި ފައިބަރު ހުންނަ މިންވަރު ކުޑަކޮށް އިތުރެވެ. ފައިބަރުގެ ސަބަބުން ގިނައިރު ބަނޑު ފުރިފައި ހުރިކަމުގެ އިހުސާސްކޮށްދީ، މާ ގިނައިން ކެވޭ ކެވުން މަދުކޮށްދިނުމަށް އެހީތެރިވެދެއެވެ. އެހެންނަމަވެސް، ސިއްޙީ މާހިރުން ވިދާޅުވާ ގޮތުގައި، އަލުވިއާއި ކައްޓަލައިގެ ތެރެއިން ކެއުމަށް ބޮޑަށް ރަނގަޅީ ކޮން ބާވަތެއްތޯ ބެލުމަށްވުރެ ބޮޑަށް ބަލަންޖެހެނީ އެ ތައްޔާރުކުރާ ގޮތަށެވެ. ތެލުލާފައި ހުންނަ ތަކެއްޗަށްވުރެ، ފެނުކައްކައިގެން ނުވަތަ ފިހެގެން ބޭނުންކުރުމަކީ ސިއްޙީ ގޮތުން މާ ފައިދާހުރި ގޮތެކެވެ.

ވިޓަމިން އޭ ހޯދުމަށް

ވިޓަމިން އޭ އަށް ބަލާއިރު، މި ބަހުސުން ކުރި ހޯދަނީ ކައްޓަލައެވެ. ކައްޓަލައިގެ ގަދަ އޮރެންޖު ކުލަ އަންގައިދެނީ އޭގައި ‘ބީޓާ-ކެރޮޓީން’ ގިނަ އަދަދަކަށް އެކުލެވޭ ކަމެވެ. މިއީ ހަށިގަނޑުގެ ތެރޭގައި ވިޓަމިން އޭ އަށް ބަދަލުވާ މާއްދާއެކެވެ. މެދު ސައިޒުގެ ކައްޓަލައަކުން، ދުވާލަކަށް އިންސާނަކަށް ބޭނުންވާ ވިޓަމިން އޭގެ މިންވަރު ފުރިހަމަކޮށްދެއެވެ. ވިޓަމިން އޭ އަކީ ލޮލުގެ ފެނުމަށާއި، ދިފާއީ ނިޒާމު ވަރުގަދަކުރުމަށާއި އަދި ހަންގަނޑު ދުޅަހެޔޮކޮށް ބެހެއްޓުމަށް ކޮންމެހެން ބޭނުންތެރި މާއްދާއެކެވެ. އާދައިގެ އަލުވީގައި ވިޓަމިން އޭ ހުންނަނީ ވަރަށް މަދު މިންވަރަކަށެވެ.

ހަޖަމުކުރުމަށް

މި ދެ ބާވަތަކީވެސް ހަޖަމުކުރުމުގެ ނިޒާމަށް ފައިދާހުރި ދެ ބާވަތެވެ. ކައްޓަލައިގައި ހިމެނޭ ފައިބަރުގެ ސަބަބުން ބޮޑުކަމުދިއުމުގެ ނިޒާމު ފަސޭހަކޮށްދެއެވެ. އަދި އާދައިގެ އަލުވީގައި ‘ރެސިސްޓަންޓް ސްޓާޗް’ ހިމެނެއެވެ. މިއީ ބަނޑުގެ ދުޅަހެޔޮކަމަށް ބޭނުންވާ ފައިދާ ހުރި ބެކްޓީރިއާތަކަށް ކާނާ ފޯރުކޮށްދޭ، ފައިބަރާ އެއްގޮތް މަސައްކަތެއް ކުރާ ކާބޯހައިޑްރޭޓްގެ ބާވަތެކެވެ. ޚާއްޞަކޮށް އަލުވި ކައްކާފައި ހިލުމުން (cooled) މި މާއްދާ އިތުރުވެގެންދެއެވެ.

އަލުވި އަދި ކައްޓަލައަކީވެސް ސިއްޙީ ގޮތުން ބަލާއިރު ފައިދާ ހުރި ކެއުމެއްގައި ހިމެނިދާނެ ދެ ބާވަތެވެ. ކައްޓަލައިން ގިނަ އަދަދަކަށް ފައިބަރާއި ވިޓަމިން އޭ ލިބިދޭއިރު، އާދައިގެ އަލުވީގައި ޕޮޓޭސިއަމް އާއި ވިޓަމިން ސީ ފަދަ މުހިންމު މާއްދާތައް އެކުލެވިގެންވެއެވެ. އެހެންކަމުން، ސިއްޙަތަށް ސަމާލުކަންދޭ ފަރާތްތަކަށް އެންމެ ރަނގަޅު ގޮތަކީ، މި ދެ ބާވަތްވެސް އެކަށީގެންވާ މިންވަރަކަށް ބޭނުންކުރުމާއި، ސިއްޙީ ގޮތުން ރަނގަޅު ގޮތްގޮތަށް ކާނާ ތައްޔާރުކުރުމެވެ.