ގަދީމީ ވާހަކަތަކުގެ ސިއްރުތައް
އިރުއޮއްސުނުއިރު، އެ ޚަބަރު މުޅި ރަށުތެރެއަށް ފެތުރިއްޖެއެވެ. ކުދިކުދި ރަށްރަށުގައި ވާހަކަތައް ފެތުރިގެންދަނީ ވަރަށް ހިމޭންކަމާއެކުގައެވެ. އެއީ ފޮތްތަކުން ކިޔައިދޭ ވާހަކަތަކެއް ނޫނެވެ. އެއީ މާމައިންނާއި، މަސްވެރިންނާއި، އަދި އިރުއޮއްސި ނަމާދުން ފައިބައިގެން އައިސް ގޭގެ ބޭރުގައި ހުންނަ ޖޯލިފަތިތަކުގައި ތިބޭ ދުވަސްވީ މީހުންގެ ދޫދޫމަތިން ކިޔައިދޭ ވާހަކަތަކެވެ.
ކުޑައިރުވެސް އެފަދަ ވާހަކަތައް އަޑުއިވެއެވެ. ކަނޑުގެ ވާހަކަތަކެވެ. ރާޅުތަކާއި ވައިގެ ތެރޭގައި ދިރިއުޅޭ، ލޮލަށް ނުފެންނަ މަޚްލޫގުންގެ ވާހަކަތަކެވެ. ފަރުފަރު މަތީގައި އުޅޭ ޖިންނީންނާއި، ވިލުތައް ބަލަހައްޓާ ފުރޭތަތަކުގެ ވާހަކަތަކެވެ. އަދި ހަމައެކަނި ރޭގަނޑު ފެނިފައި، އިރުއަރާއިރު ކަނޑުގެ ރާޅުތަކާއެކު ގެއްލިގެންދާ ލޯބިވެރިންގެ ވާހަކަތަކެވެ. އޭރު އެ ވާހަކަތަކަށް މަލާމާތްކޮށް ހީނ ހެދި ނަމަވެސް، މިއަދު އެ ހުރިހާ ވާހަކައެއްގެ ކޮންމެ ލަފުޒެއް ހިތަށް އަންނަނީ ވަރަށް ބޮޑަށެވެ. މުޅި ވާހަކަ އެކީ އެއްކޮށެއް ނޫނެވެ. ސާފުކޮށެއްވެސް ނޫނެވެ. ނަމަވެސް، އެކި މީހުން ދައްކަމުންދިޔަ ބިރުވެރި ވާހަކަތަކުންނާއި، ސިއްރުސިއްރުން ބަދަލުކުރަމުންދިޔަ ބަސްތަކުން، ކޮންމެ މީހަކު ކިޔައިދޭއިރު އެ ވާހަކައަށް އިތުރު ބިރުވެރިކަމެއް ދިޔައީ އަންނަމުންނެވެ.
އެމީހުން ދެއްކީ މެންދުރު ވަގުތު އިވުނު ހަޅޭކުގެ އަޑުގެ ވާހަކައެވެ.
އެއްވެސް މީހަކު ކައިރިވާން ނުކެރުނު އެ ގެއެއްގެ ވާހަކައެވެ.
ދުވާލުގެ އަލީގައި ފެނުނު ކަޅު ހިޔަނިތަކުގެ ވާހަކައެވެ. ޔަސްމީންގެ ވާހަކައެވެ… އަދި އޭނާ ފެނުނުއިރު ހުރި ހާލަތުގެ ވާހަކައެވެ. އެ ދުވަހު އެންމެ ފުރަތަމަ އެ ގެޔަށް މީހުން ވަނުމުން ފެނުނީ މާމައެވެ. އޭނާ އޮތީ ބިމުގައެވެ. ލޯ ހުޅުވިފައި ހުރި ނަމަވެސް، އެއްވެސް ހަރަކާތެއް ނެތެވެ. މަރުވެފައެއް ނޫނެވެ. އެކަމަކު އެ ހަށިގަނޑުން ރޫހު ފޭދި، ހުސްވެފައިވާ ކަހަލައެވެ. ނަޒަރު ހުއްޓިފައިވަނީ އެއްވެސް ދިމާއަކަށް ނޫނެވެ.
މީހުންތައް އިތުރަށް އެތެރެއަށް ވަނުމުން ފެނުނީ އެތެރޭގައި ހުރި ޔަސްމީން ކޮޓަރީގެ ދޮރު ހަލާކުވެފަހުރިކައެވެ.
ބޮޑު ލޯގަނޑު އޮތީ ތަޅައިގެން ގޮސް، ބިއްލޫރިތައް މުޅި ތަނަށް ބުރައިގެން ގޮސްފައެވެ. އެތަނުގެ ފިނިކަން އިންތިހާއަށް ގަދައެވެ.
އަމްޝަދު އޮތީ ކޮޓަރީގެ އެއްފަރާތަކަށް ވެއްޓިފައެވެ. އޭނާގެ ހަށިގަނޑު އޮތީ ގަދަ ބާރަކުން އެއްލާލާފައިވާ ކަހަލަ ގޮތަކަށެވެ. އޭނާ ހޭނެތިފައި އޮތް ނަމަވެސް، ލަސްލަހުން ނޭވާލައެވެ.
ދެން ފެނުނީ ޔަސްމީންއެވެ. އޭނާ އޮތީ ވަރަށް ހިމޭނުންނެވެ. އެއީ އަރާމު ނިންޖެއް ނޫނެވެ. އޭނާގެ ނޭވާލުން ހުރީ އާދަޔާ ހިލާފަށެވެ. އޭނާގެ މޫނުމަތިން ފެންނަނީ ކޮންމެވެސް ބޮޑު ތަދެއް ނުވަތަ ސަލާމަތް ނުވެވޭނެ ފަދަ އަރާމެއްގެ ތެރޭގައި އޮތް އަސަރެވެ. އެއީ ނުފެންނަ ބާރަކުން އޭނާގެ ހަށިގަނޑާ ކުޅެމުންދާ ކަހަލަ އަސަރެކެވެ. ހެދުމުގެ ގޮށްތައް އޮތީ ނެއްޓިފައެވެ. އަދި ފަސްބައި އުފުލި ހާމައައަށް ފައި ފެންނަންއޮތެވެ.
އެތަނަށް އެއްވި މީހުން ހުއްޓުން އެރިއެވެ. އެކަކަށްވެސް ވާހަކަދައްކާކަށް ނުކެރުނެވެ. ނަމަވެސް އިރުކޮޅަކުން، އެކަކު މަޑުމަޑުން ކިޔަވަން ފެށިއެވެ. ދެން އަނެކަކެވެ. އެންމެން އެކުގައި ކިޔަވަން ފެށުމުން، އެ އަޑުން މުޅި ކޮޓަރި ގުގުމާލިއެވެ. އެއަށްފަހު އަވަހަ ޔަސްމީން ގައިގާ އެނދުގައި އޮތް ފޮތިގަނޑު އަޅާ ނިވާކޮށްލިއެވެ.. .ޔަސްމީން ބާރަށް ހަޅޭލަވައިގަތެވެ. ދެން ހޭނެތުނެވެ.
އެވަގުތު، ކުއްލިއަކަށް ބާރު ވައިރޯޅިއެއް އެތެރޭގައި އެނބުރިގަތެވެ. ކޮޓަރީގެ އެއްވެސް ކުޑަދޮރެއް ނުވަތަ ދޮރެއް ހުޅުވިފައި ނެތް ނަމަވެސްމެއެވެ.
އަދި ކުޑަ ހިނދުކޮޅަކަށް ޖައްވު ބަދަލުވެ، އެ ނުފެންނަ ބާރު އެތަނުން ދުރަށް ދިޔަ ކަހަލަ އިހުސާސެއް އެންމެނަށް ކުރެވުނެވެ.
އެންމެންވެސް އަވަސްވެގަތީ އެމީހުން އެތަނުން ނެރުމަށެވެ. އަމްޝަދު އުފުލާލިއެވެ. ޔަސްމީން ވަރަށް ރައްކާތެރިކަމާއެކު ނިވާކޮށްގެން ބޭރަށް ނެރުނެވެ. އެކަކަށްވެސް ބާރަށް ވާހަކަދައްކާކަށް ނުކެރުނެވެ. ފެނުނު ކަންތަކާ ބެހޭގޮތުން ސުވާލުކުރާކަށް ވެސް ނުކެރުނެވެ.
އެންމެނަށްވެސް އެނގެއެވެ. މިއީ އާދައިގެ ބުއްދިއަށް ވިސްނޭނެ ކަމެއް ނޫނެވެ. މިއީ ވަކި ގޮތަކަށް އަމަލުކުރަންޖެހޭ ކަމެކެވެ.
މިފަދަ ކަންކަމާ ކުރިމަތިލެވޭނެ ހަމައެކަނި މީހަކީ ރަށުގެ އެންމެ އަރިމަތީގައި، ކަނޑާވީ ފަރާތުގައި ދިރިއުޅޭ މުސްކުޅި އަންހެން މީހާއެވެ. އޭނާއަކީ މިފަދަ ކަންކަމުގެ އަސްލު ދަންނަ މީހެކެވެ.
އެމީހުންނަށް އެގެއަށް ދެވުނުއިރު އިރު މުޅިން އަރައިފިއެވެ. ނަމަވެސް އިރުގެ ހޫނުކަމެއް އެއިން އެކަކަށްވެސް އިހުސާސެއް ނުވެއެވެ. އެ ތިން މީހުންނަށް ޖެހުނު ކަމެއް އަދިވެސް ފިލައިގެން ނުދާކަން އެންމެނަށްވެސް އިހުސާސް ކުރެވެއެވެ.
އަދި އެންމެންގެ ހިތުގައިވެސް އޮތީ ބޮޑު ބިރުވެރިކަމެކެވެ. އެއީ، މިއީ ހަމައެކަނި ފެށުން ކަމުގައި ވެދާނެތީއެވެ.
ކަން ހިނގައިދިޔަ ގޮތާ މެދު އެކަކު އަނެކަކާ އެއްބަހެއް ނުވެވެއެވެ.
ނަމަވެސް، އެންމެންވެސް އެއްބަސްވި އެއް ކަމެއް އޮތެވެ. އެ ގެއަށް ކޮންމެވެސް ކަމެއް މެދުވެރިވެއްޖެއެވެ. މި އިންސާނީ ދުނިޔެއަށް ނިސްބަތްނުވާ ކޮންމެވެސް ބާރެއްގެ އަސަރު އެތަނަށް ފޯރައިފިއެވެ.
އެދުވަހު، މައިން އެމީހުންގެ ދަރިން ގާތަށް ދަމައިގަތެވެ. ބައެއް މަގުތަކުން ހިނގާފައި ދިޔައިރު ފިރިހެނުންވެސް އެމީހުންގެ އަޑުތައް މަޑުކުރިއެވެ. ހީވާގޮތުން، ކަނޑުގެ ރާޅުތައްވެސް އެ ބިރުވެރި އަޑުތަކަށް ކަންފަތްދީގެން އޮތް ކަހަލައެވެ.
ރަށުގެ އަނެއްކޮޅުގައި…
އެ މުސްކުޅި އަންހެންމީހާގެ ގޭގައި…
ހިމޭންކަމާއެކު ގޮތްތަކެއް ނިންމެމުންދިޔައެވެ.
އަމްޝަދު އެތަނުގައި ބެހެއްޓޭކަށް ނެތެވެ.
ކަންތައް ހިނގައިދިޔަ ގޮތަކުންނެވެ.
ފެނުނު މަންޒަރުތަކުގެ ސަބަބުންނެވެ.
ރޭގަނޑުގެ އަނދިރިކަން މުޅި ރަށަށް ވެރިވެ، މީހުން ނިދައި، ވަޔާއި ރޯޅިވެސް މައިތިރިވި ވަގުތު، އޭނާ ސިއްރުސިއްރުން ގޭގެ ފުރަގަހުން ނެރެގެން ގެންދެވުނެވެ. އެއްވެސް ބައްތިއެއް ނެތެވެ. އެއްވެސް އަޑެއް ނެތެވެ. ހަމައެކަނި އިވެނީ ފިޔަވަޅުތަކުގެ މަޑު އަޑެވެ. ކޮންމެ މީހަކުވެސް ދިޔައީ ވަރަށް ފަރުވާތެރިކަމާއެކު ފަސް އެނބުރި ބަލަމުންނެވެ.
އޭނާ އެކަމާ ދެކޮޅެއް ނުހަދައެވެ.
ނަމަވެސް، ވާނުވާއެއް އޭނާއަކަށް ނޭނގެއެވެ. ހަށިގަނޑުގައި އަދިވެސް ކޮންމެވެސް ވަރެއްގެ ރިހުމެއް ހުއްޓެވެ. ސިކުނޑި ވަނީ ބަޔާންކުރަން ނޭނގޭ ފަދަ ބަރުހެލިކަމެއްގެ ތެރޭގައެވެ. ހީވަނީ ކޮންމެވެސް ބިރުވެރި އެއްޗެއް އޭނާގެ ގައިގައި ބީހިލާފައި، އޭގެ ނިޝާންތަކެއް ދޫކޮށްލާފައި ދިޔަ ހެންނެވެ.
އޭނާ ފޮނުވާލުމުގެ ކުރިން، އެ މުސްކުޅި އަންހެންމީހާ އޭނާގެ ކުރިމަތީގައި މަޑުކޮށްލިއެވެ. އެ މޫނުމަތިން ފެންނަނީ ސާބިތުކަމެވެ. ޖެހިލުންވުމެއް ނެތް ނަޒަރެކެވެ.
“ދެން ދުވަހަކުވެސް އޭނާގެ ގާތަށް ގޮސްގެން ނުވާނެ،”
މަޑުމައިތިރި ނަމަވެސް ބާރުގަދަ ރާގަކަށް އޭނާ ބުންޏެވެ. “އޭނާގެ ގެޔަކަށް ނޫން. އޭނާ ހިނގާ މަގަކަށް ނޫން. އަދި ޚިޔާލަށްވެސް އޭނާ ގެނެސްގެން ނުވާނެ.”
އަމްޝަދުގެ ނިތްކުރިއަށް ރޫއެރިއެވެ. ހައިރާންކަމާއެކު އޭނާގެ ހިތުގައި ބިރުވެރިކަން އުފެދުނެވެ. “އެއީ ކީއްވެ؟” އޭނާ އެހިއެވެ. ނަމަވެސް އޭގެ ޖަވާބު އޭނާއަށް މިހާރުވެސް ކޮންމެވެސް ވަރަކަށް އިހުސާސް ކުރެވެއެވެ.
އެ މުސްކުޅި އަންހެންމީހާގެ މޫނުމަތީގެ ކުލަވަރަކަށް ބަދަލެއް ނާދެއެވެ.
“އޭނާއަށް ކުރިމަތިވެފައިވާ ކަންތައްތަކަށް… ކަލެއަށްވެސް މިހާރު ފެނިއްޖެ.”
އެ ބަސްތަކުން އަމްޝަދުގެ ހިތަށް ބަރުވެގެން ދިޔައެވެ.
“އަނބުރާ ގޮސްފިނަމަ،”
އޭނާ ކުރިއަށް ގެންދިޔައެވެ. “ކަލޭ އަންނާނީ ކުރިން ހުރި ގޮތަކަށް ނޫން.”
ކުޑަ ހިނދުކޮޅެއްގެ ހިމޭންކަމަށްފަހު، ކުރިއަށްވުރެ މަޑުމައިތިރި އަޑަކުން ބުންޏެވެ. “ނޫނީ، އެއްކޮށް ނައިސްވެސް ހިނގައިދާނެ.”
އޭގެ ފަހުން އަމްޝަދު އެއްވެސް އެއްޗެކޭ ނުބުނެއެވެ. އޭނާގެ ހިތުގެ ކޮންމެވެސް ކަނެއްގައި އެ ހަގީގަތް މިހާރުވެސް ގަބޫލުކުރެވިފައިވާތީއެވެ.
އެހެނަސް…
އޭނާ އެތަނުން ދިޔައެވެ.
ނިދާފައި އޮތް ރަށުގެ ތެރެއިން ސިއްރުވެރިކަމާއެކު އޭނާ ގެންގޮސް، އޭނާގެ ގެޔާ ހަމައަށް ފޯރުކޮށްދެވުނެވެ.
އޭނާގެ މައިންބަފައިން ދޮރު ހުޅުވީ ސިހުމާއެކުގައެވެ. އެމީހުންގެ މޫނުމަތިން ހައިރާންކަމާއި، ހިތްހަމަޖެހުމާއި، ބިރުވެރިކަން އެސްފިޔަޖަހާލާ ހިނދުކޮޅެއްގެ ތެރޭގައި ފެނިގެންދިޔައެވެ.
އެމީހުންގެ ދަރިފުޅެވެ.
އަނބުރާ އަތުވެއްޖެއެވެ.
ނަމަވެސް، އޭނާއަށް ކޮންމެވެސް ބަދަލުތަކެއް އައިސްފައިވާކަން ޔަގީނެވެ.
އެމީހުންނަށް ދިން އިންޒާރުތައް ވަރަށް ކަނުލާ އަޑުއެހިއެވެ. އެއީ ސާފު، އަވަސް އަދި އެންމެ ފަހުގެ ނިންމުމެވެ.
އޭނާ އެ އަންހެންކުއްޖާއާ ދުރުގައި ބަހައްޓާށެވެ. އެ ބިރުވެރި ތަނާ އޭނާ ކައިރިވިޔަ ނުދޭށެވެ. އެހެން ނޫނީ، ލޮލަށް ނުފެންނަ އަދި ކުރިމަތިނުލެވޭނެ ބާރެއްގެ ސަބަބުން އޭނާ ތާއަބަދަށް ގެއްލިދާނެއެވެ.
އަމްޝަދުގެ މަންމަ އޭނާގެ ގައިގައި އަތްލިއިރު، އެ އަތް ދިޔައީ ތުރުތުރުލަމުންނެވެ. ބައްޕަ ހުރީ އެއްޗެކޭ ބުނަން ނޭނގި ހިމޭންވެފައެވެ. އެކަމުގެ ނުރައްކާތެރިކަން އޭނާއަށް އިހުސާސް ކުރެވެއެވެ.
އެމީހުން އެތަނުން ދިއުމުގެ ކުރިން، އެންމެ ފަހު ފަހަރަށް އެ މެސެޖު ތަކުރާރުކުރިއެވެ. “އޭނާ އިމާމު ކައިރިއަށް ގެންދޭ. ލަސްނުކުރާތި.”
ދޮރު ލެޕިއްޖެއެވެ.
ރޭގަނޑުގެ އަނދިރިކަން އިތުރަށް ބޯވެއްޖެއެވެ.
އެ ކުޑަކުޑަ ގޭގެ ތެރޭގައި…
ކުރިން ހުރި އެއްވެސް އުފާވެރިކަމެއް ނެތެވެ. އަމްޝަދު އަނބުރާ ގެނެވުނު ކަމުގައި ވިޔަސް އޭނާގެ ރޫހުގެ ކޮންމެވެސް ބައެއް އަދިވެސް ވަނީ އެހެން ތަނެއްގައެވެ.
އަމްޝަދަށް ރޭގަނޑު ނިދިިޖެހުނީ މަދު ވަގުތުކޮޅަކަށެވެ…
އަމްޝަދުގެ ކިބައިން ފެންނަމުންދިޔަ ހަމަހިމޭންކަން އޭނާގެ މަންމައަށް ފާހަގަކުރެވުނެވެ. އޭނާގެ ހަރަކާތްތަކުން އަމިއްލަވަންތަކަން ގެއްލިފައިވާ ފަދައެވެ. އެއްވެސް އެއްޗެއް ނެތް ހުސް ތަނަކަށް އޭނާގެ ނަޒަރު ހުއްޓިފައި ހުންނަގޮތުން ހީވަނީ އެހެން ދުނިޔެއެއްގައި އުޅޭހެންނެވެ.
މެންދުރުވީއިރަށް، އޭނާ ގޮވައިގެން އެމީހުން މިސްކިތަށް ދިޔައެވެ.
މިސްކިތަށް ދިޔަ މަގުމަތީގައި، މުޅި ރަށް އޮތީ ބަދަލުވެފައިވާ ކަހަލަ އިހުސާސެއް ކުރެވެއެވެ. ކުރިއަށްވުރެ މާ ހަމަހިމޭނެވެ. ހީވަނީ ގޭގޭގެ ދޮރުތަކާއި ދޮރުފަތްތަކުގެ ފަހަތުން މީހުން އެމީހުންނަށް ފާރަލަމުންދާ ހެންނެވެ. އެމީހުން އެދަނީ ކޮންތާކަށްކަން އަދި ކީއްކުރަންކަން ކުރިންވެސް އެނގިފައިވާ ފަދައެވެ.
މިސްކިތުގެ އެތެރޭގައި، އަމާންކަމާއި ހަމަހިމޭންކަމާއެކު އިމާމު އިށީނދެގެން އިނެވެ. އެއީ އޭނާގެ ކެތްތެރިކަމާއި، އިލްމުވެރިކަމާއި، އަދި ބަސްމަގުގައި ހުންނަ މަޑުމައިތިރި ބާރުވެރިކަމަށްޓަކައި މަޝްހޫރުވެފައިވާ ދުވަސްވީ މީކެވެ. އެމީހުން އެތެރެއަށް ވަނުމުން ވަގުތުން ވާހަކައެއް ނުދައްކަވައެވެ. ހަމައެކަނި އަމްޝަދާ ދިމާލަށް ބަލަހައްޓަވައިގެން އިނީއެވެ. ވަރަށް ގިނައިރު ވަންދެންނެވެ. ވަރަށް ފަރުވާތެރިކަމާއެކުގައެވެ. ހީވަނީ އެހެން މީހުންނަށް ނުފެންނަ ކަމެއް އޭނާގެ ފަރާތުން ފެންނަނީހެންނެވެ.
“އިށީނދޭ،” އެންމެ ފަހުން އޭނާ ބުންޏެވެ.
އަމްޝަދު ބޯލެނބިއެވެ. ނަމަވެސް އޭނާގެ އެތެރެހަށިން ކޮންމެވެސް ކަމެއް އެކަމަށް އިންކާރު ކުރަމުންދިޔައެވެ. ބޭރުފުށުން ފެންނާކަށް ނެތެވެ. ނަމަވެސް އެތެރެހަށީގައި، އައްސޭރިފަށަށް ބޮޑު ރާޅެއް ބިންދާލާ ފަދަ ބާރެއް ހުއްޓެވެ.
ފުރަތަމަ ވާހަކަދެއްކީ އޭނާގެ މައިންބަފައިންނެވެ. ވަރަށް މަޑުމައިތިރިކަމާއެކުގައެވެ. އަދަބުވެރިކަމާއެކުގައެވެ. އެމީހުންނަށް އިވުނު ވާހަކަތަކާއި، ފެނުނު ކަންތައްތަކާއި، އަދި އެމީހުން ބިރުގަންނަ ސަބަބުތައް ކިޔައިދިނެވެ. އެއްވެސް މެދުކެނޑުމެއް ނެތި އިމާމު އެ ވާހަކަތައް އަޑުއެއްސެވިއެވެ.
ދެން އޭނާގެ ފުރިހަމަ ސަމާލުކަން އަމްޝަދަށް ހުއްޓާލެއްވިއެވެ.
“ކަލޭ ތިޔަ ދިޔައީ ދާންނުޖެހޭ ތަނަކަށް،” އިމާމު ބުނިއެވެ. އެއީ ސުވާލެއް ނޫނެވެ. އަމްޝަދު އިސްދަށަށް ޖެހިއެވެ. “އާދެ.”
ކުޑަ ހިނދުކޮޅެއްގެ ހަމަހިމޭންކަމަކަށްފަހު، “އަދި ކަލެއަށް ފެނުނީ ފެންނަން ނުޖެހޭ މަންޒަރެއް،” އިމާމު ބުނިއެވެ.
އަމްޝަދުގެ އަރުތެރެ ބެދޭގޮތްވިއެވެ. “އާދެ.”
އިމާމު މަޑުމަޑުން ބޯޖަހާލެއްވިއެވެ. “މިއީ ހަމައެކަނި އޮތް ގޮތް،” އޭނާ ބުންޏެވެ. “އަދި މިއީ މި ވަގުތު މުޅި ރަށާއި ދެން ތިބި މީހުންގެ ރައްކަލަވެސް ކޮންމެހެން އަޅަންޖެހޭ ފިޔަވަޅެއް.” އެ ބަސްތައް އަމްޝަދަށް އިހުސާސްވީ ވަރަށް ބަރު އެއްޗެއްގެ ގޮތުގައެވެ. “މިއީ ބަނދެވުމެއް.”
އަމްޝަދުގެ ބުމަ ކުޑަކޮށް ގާތްވެލިއެވެ. “ޔަސްމީންއާ ހެއްޔެވެ؟” އޭނާ އެހިއެވެ.
އިމާމުގެ ނަޒަރު ކުރިއަށްވުރެ ތޫނުވިއެވެ. “ހަމައެކަނި އޭނާ އަކާ ނޫން.”
އަނެއްކާވެސް ހަމަހިމޭންކަން ވެރިވިއެވެ.
“އޭނާގެ ކައިރީގައިވާ އެތި،” އޭނާ ކުރިއަށް ގެންދެވިއެވެ. “ކަލެއަށް ސަމާލުވާން ފަށައިފި. އަދި ސަމާލުކަން ދޭ އެއްޗަކަށް ފަހަތުން އާދެވިދާނެ.”
އަމްޝަދުގެ މުޅި ހަށިގަނޑުން ފިނި ތުރުތުރެއް ދުވެލިއެވެ. އެ ވާހަކަ ހުރި ގޮތަކުން އޭނާއަށް އުނދަގޫވިއެވެ.
“އެކަމަކު އަހަރެން އެއްވެސް ކަމެއް ނުކުރަން،” އޭނާ ބުންޏެވެ. އޭނާގެ އަޑުގައި ކޮންމެވެސް ވަރެއްގެ ނުތަނަވަސްކަމެއް ހުއްޓެވެ. “އަހަރެން ހަމައެކަނި-”
“ކަލޭ އެތަނުގައި މަޑުކުރީ،” އިމާމު އޯގާތެރިކަމާއެކު ވާހަކަ މެދުކަނޑާލެއްވިއެވެ. އެވަރުން ފުދެއެވެ.
އަމްޝަދު ހިމޭންވިއެވެ. އިމާމު ކުޑަކޮށް ކުރިއަށް ޖެހިލެއްވިއެވެ.
“މި ދުނިޔޭގައި ބައެއް ކަންތައްތައް ހުރޭ،” އޭނާ މަޑުމަޑުން ވިދާޅުވިއެވެ. “ފުރަތަމަ ފެންނައިރު އެއިން އެއްވެސް ގެއްލުމެއް ނުލިބޭނެ. އެތަކެތި ކަލޭގެ ހިތް ދަމައިގަންނާނެ. ހިތްހަމަޖައްސައިދޭނެ. ކަލެއަށް އިހުސާސްކޮށްދޭނީ ކަލެއަކީ މުހިންމު މީހެއް ކަމަށް… ކަލެއަށްޓަކައި މީހަކު ހުރި ކަމަށް… އަދި ކަލޭގެ ބޭނުން ޖެހިފައިވާ ކަމަށް.”
އަމްޝަދުގެ މޭ ތެޅެން ފެށިއެވެ. ސަބަބަކީ އެއީ ތެދެއްކަން އޭނާއަށް އިހުސާސްވީތީއެވެ.
“ނަމަވެސް އެއީ އެތަކެތި ވަންނަ ގޮތް،” އިމާމު ކުރިއަށް ގެންދެވިއެވެ. “ބާރުގެ ބޭނުންކޮށްގެނެއް ނޫން. ދައުވަތަކުން.”
އެތަނުގެ ތެރެ ކުރިއަށްވުރެ ކުޑަވެ، ފިތޭހެން ހީވިއެވެ.
“އޭނާ ރައްކާތެރިކުރަން އެބަޖެހޭ،” އޭނާގެ މަންމަ މަޑުމަޑުން ބުންޏެވެ. އޭނާގެ އަޑުގައި ތުރުތުރެއް ހުއްޓެވެ.
އިމާމު ބޯޖަހާލެއްވިއެވެ. “ރައްކާތެރި ކުރެވޭނެ،” އޭނާ ބުންޏެވެ. “އެކަމަކު ރައްކާތެރިކަން ލިބޭނީ ބަސްއެހުމުން.”
އޭނާގެ ނަޒަރު އަނެއްކާވެސް އަމްޝަދަށް ހުއްޓުނެވެ. “ކަލޭ ދެން ދުވަހަކުވެސް ޔަސްމީންގެ ކައިރިއަށް ގޮސްގެން ނުވާނެ.”
ހަމަ އެ ބަސްތަކެވެ.
ނަމަވެސް މިފަހަރު އެ ބަސްތައް މާ ބަރެވެ.
މިއީ އެންމެ ފަހުގެ ނިންމުމެވެ.
“އަދި އަޅުގަނޑު ގޮސްފިއްޔާ؟” އޭނާ މަޑުމަޑުން އެހިއެވެ.
އިމާމު އޭނާގެ ލޮލަށް ބަލަހައްޓަވައިގެން އިނެވެ. “އެހެންވެއްޖެނަމަ، ކަލޭގެ އަމިއްލަ އިޚްތިޔާރު ނިމި، އެހެން ކަމެއް ފެށޭ ހިސާބެއް ކަލެއަކަށް ނޭނގޭނެ.”
ވަރަށް ގިނައިރު ވަންދެން ހަމަހިމޭންކަން ދެމިއޮތެވެ. އެއަށްފަހު އިމާމު ކުޑަ ފުޅިއެއް ނެގިއެވެ. އަދި މަޑުމަޑުން ކިޔަވަމުން ގެންދިއުމަށްފަހު އެމީހުންނަށް ދިނެވެ.
“އޭނާ ގާތުގައި ބަހައްޓާ،” އޭނާ އިރުޝާދު ދިނެވެ. “ރޭގަނޑު އެކަނި ބޭރަށް ދިޔަ ނުދީ. އަދި ކިތަންމެ ބޮޑު ކަމެއް އިހުސާސް ކުރެވުނަސް، އެކަމަށް އިޖާބަ ނުދީ.”
އެ ބަސްތައް އެންމެންގެ ހިތުގައި ބަދަލުވިއެވެ. ސަބަބަކީ އެއީ އެންމެ އުނދަގޫވާނެ ކަންތައްކަން އެންމެންނަށްވެސް އެނގޭތީއެވެ.
މިސްކިތުން ނުކުތްއިރު އިރު އޮތީ މެދުޖެހިފައެވެ. ރަށުގެ ދިރިއުޅުން ކުރިއެކޭވެސް އެއްގޮތަށް ކުރިއަށްދެއެވެ. ނަމަވެސް އަމްޝަދަށް އެއްވެސް ކަމެއް ކުރިއަކާ އެއްގޮތެއް ނޫނެވެ.
ސަބަބަކީ މިހާރުވެސް… އެ އިންޒާރުތަކާއި ބިރުވެރިކަމުގެ ތެރެއިންވެސް… އޭނާއަށް އެކަން އިހުސާސް ކުރެވެއެވެ. އެ ދަމައިގަތުމެވެ. ވަރަށް ފަނޑުކޮށް، ދުރުންނެވެ. ނަމަވެސް އެއީ އޭނާގެ އިންތިޒާރުގައެވެ.
( ނުނިމޭ )
