އިންޑިއާގެ މަޝްހޫރު ޑްރާމާ ސިލްސިލާ “އަނޫޕަމާ”ގެ ބަތަލާ ރުޕާލީ ގަންގޫލީ، އޭނާގެ ކެރިއަރުގެ ކުރީކޮޅު އެ ސިލްސިލާގެ ޕްރޮޑިއުސަރު ރާޖަން ޝާހީއާ އެކު ކުރެވުނު ތަޖުރިބާއެއް ހިއްސާކޮށްފިއެވެ.
ޕިންކްވިލާގައި ރިޕޯޓްކޮށްފައިވާ ގޮތުގައި، ރުޕާލީ ވަނީ މީގެ އަހަރުތަކެއް ކުރިން ރާޖަން ޝާހީގެ ޕްރޮޖެކްޓަކަށް އޮޑިޝަން ދޭން ދިޔަ ދުވަހެއްގެ ހަނދާންތައް އައުކޮށްފައެވެ. ރުޕާލީ ބުނި ގޮތުގައި، އޭނާ ފުރަތަމަ ފަހަރަށް ރާޖަންގެ ކުރިމަތީގައި އޮޑިޝަން ދޭން ފެށުމާއެކު، ރާޖަން ޝާހީ ވަނީ އޭނާ ހުއްޓުވާފައެވެ.
ރުޕާލީ ކިޔައިދިން ގޮތުގައި، އޭނާ ޑައިލޮގްތައް ކިޔަން ފެށިތާ މަދު ސިކުންތުކޮޅެއްގެ ތެރޭގައި ރާޖަން އޭނާ ހުއްޓުވިއެވެ. އެވަގުތު އޭނާއަށް ހީވީ އޭނާގެ އެކްޓިން ކަމުނުދިޔައީ ކަމަށެވެ. ނަމަވެސް، ރާޖަން އޭނާ ހުއްޓުވީ އޭނާގެ ހުނަރާ މެދު ޝައްކެއް އޮވެގެން ނޫން ކަމަށާއި، އޭނާގެ ހުނަރު ފެނިފައި އެ ރޯލަށް އޭނާ ފިޓްވާނެކަން ވަގުތުން ޔަގީންވުމުން ކަމަށް ރުޕާލީ ބުންޏެވެ.
މި ހާދިސާއަކީ މީގެ ދަހަރެއްހާ ދުވަސް ކުރިން، ރާޖަން ޝާހީ ޑައިރެކްޓަރެއްގެ ގޮތުގައި މަސައްކަތް ކުރި ދުވަސްވަރު ހިނގި ކަމެކެވެ. ރުޕާލީ ބުނީ އެ ދުވަހު ރާޖަން އޭނާ ހުއްޓުވުމަށްފަހު، “ކަލޭ ތިއީ ވަރަށް މޮޅު އެކްޓަރެއް” ކަމަށް ބުނެ ތައުރީފު ކުރި ކަމަށެވެ.
މިއަދު ރުޕާލީ އަކީ ރާޖަން ޝާހީ ޕްރޮޑިއުސްކުރާ، އިންޑިއާގެ އެންމެ މަގުބޫލު އެއް ޝޯ ކަމަށްވާ “އަނޫޕަމާ”ގެ މައި ބަތަލާއެވެ. މި ޝޯގެ ސަބަބުން ރުޕާލީއަށް ބޮޑު މަގުބޫލުކަމެއް ލިބިފައިވާއިރު، އޭނާ އާއި ރާޖަންއާ ދެމެދު އޮތް ގުޅުން ވަނީ ވަރަށް ބޮޑަށް ބަދަހިވެފައެވެ. ރުޕާލީ މި ވާހަކަތައް ހިއްސާކޮށްފައިވަނީ އޭނާގެ ކެރިއަރުގެ ކާމިޔާބީގައި ރާޖަންގެ ދައުރު ފާހަގަކުރަމުންނެވެ.
