ވ. އަތޮޅު ކަނޑުއަޑީގެ ހޮހަޅައެއްގައި މަރުވި އިޓަލީގެ ޑައިވަރުން ފެނުނުއިރު، އެމީހުން ބޭނުންކޮށްފައިވަނީ އެފަދަ ނުރައްކާތެރި ތަނަކަށް ފީނުމަށް އެކަށީގެންވާ ސާމާނެއް ނޫން ކަމަށް، އެމީހުންގެ ހަށިގަނޑުތައް ނެގުމުގައި ބައިވެރިވި ޑައިވަރަކު ހާމަކޮށްފިއެވެ.
ހަތަރު އިޓަލީ މީހުން ފެނުނު ހޮހަޅައިގެ އެތެރޭގެ ފޮޓޯތައް ނަގާފައިވަނީ ފިންލޭންޑްގެ ޑައިވަރެއް ކަމަށްވާ ސާމީ ޕަކަރިނެންއެވެ. އޭނާ އިޓަލީގެ މީޑިއާތަކަށް މައުލޫމާތު ދެމުން ބުނި ގޮތުގައި، ހުރިހާ ހަށިގަނޑުތަކެއް ފެނިފައިވަނީ ހޮހަޅައިގެ ވަރަށް ފުން ހިސާބަކުން އެއް ތަނަކުންނެވެ. އޭނާ ސިފަކުރި ގޮތުގައި އެއީ ވަރަށް ބޮޑެތި ގޮންޖެހުންތަކެއް ހުރި، ނުރައްކާތެރި ސަރަހައްދެކެވެ.
މި ހާދިސާގައި ގެއްލުނު ފަސް މީހުންގެ ތެރެއިން ފުރަތަމަ މީހާގެ ހަށިގަނޑު ފެނުނީ، 60 މީޓަރު (197 ފޫޓު) ފުން މި ހޮހަޅައިގައި ހިނގި މި ހިތާމަވެރި ހާދިސާއަށް ފަހު މާގިނަ އިރުތަކެއް ނުވަނީހެވެ. ނަމަވެސް، ބާކީ ތިބި މީހުންގެ ހަށިގަނޑުތައް ހޮހަޅައިގެ މާ ފުން ހިސާބަކުން ފެނުނީ ފިންލޭންޑާއި ރާއްޖޭގެ ހާއްސަ ޑައިވަރުންގެ ޓީމަކުން އެތައް ދުވަހެއް ވަންދެން ކުރި މަސައްކަތުންނެވެ.
މި ހަށިގަނޑުތައް ހޯދުމުގެ މަސައްކަތުގައި އުޅުނު ދިވެހި ސަލާމަތީ ބާރުގެ ޑައިވަރަކުވެސް ނިޔާވެފައިވާކަން ފާހަގަކުރެވެއެވެ. ރާއްޖޭގެ ފަތުރުވެރިކަމުގެ ތާރީޚުގައި ހިނގި ޑައިވިންގްގެ އެންމެ ނުރައްކާތެރި އެއް ހާދިސާގެ ގޮތުގައި ބެލެވޭ މި ހާދިސާގައި މަރުވި ހަތަރު މީހުންގެ ހަށިގަނޑު ހޮނިހިރު ދުވަހު އިޓަލީއަށް ފޮނުވާލުމަށް ވަނީ ހަމަޖެހިފައެވެ. އަދި ކުރިއަށް އޮތް ދުވަސްތަކުގައި އެ ގައުމުގައި ޕޯސްޓްމޯޓަމް ހެދުމަށްވެސް ވަނީ ނިންމާފައެވެ.
ޕަކަރިނެން ‘ލާ ރިޕަބްލިކާ’ ނޫހަށް މައުލޫމާތު ދެމުން ބުނީ، ހަށިގަނޑުތައް ފެނުނު ހާލަތަށް ބަލާއިރު މިއީ އިންސާނީ ގޯހެއްގެ ސަބަބުން ހިނގި ހާދިސާއެއް ކަމަށް ބެލެވޭ ކަމަށެވެ. ނަމަވެސް، ހަގީގީ ސަބަބު ކަށަވަރުކުރާނީ ތަހުގީގަށް ފަހުގައެވެ. އޭނާ އިތުރަށް ފާހަގަކުރި ގޮތުގައި، ހޮހަޅަތަކަށް ޑައިވް ކުރާއިރު ބޭނުންކުރާ ސަލާމަތީ ވަސީލަތްތަކެއް ނެތި އެފަދަ ތަނަކަށް އެމީހުން ވަނީ ކީއްވެގެންތޯ ސުވާލު އުފެދެއެވެ. ސަލާމަތީ ގޮތުން ބޭނުންކުރާ “ގައިޑް ރޯޕް” ނުވަތަ “ޑައިވިންގ ރީލް” ފަދަ ތަކެތި ނެތި އޭނާވެސް އަދި އޭނާގެ ޓީމުގެ އެއްވެސް މެންބަރަކުވެސް އެފަދަ ނުރައްކާތެރި މާހައުލަކަށް ނުވަންނާނެ ކަމަށް އޭނާ ބުންޏެވެ.
ކަނޑުއަޑީގެ އޮޅުންބޮޅުން ބޮޑު ނުވަތަ ނުރައްކާތެރި ސަރަހައްދުތަކުގައި ޑައިވަރުންނަށް މަގު ދެއްކުމަށް “ޑައިވިންގ ރީލް” ބޭނުންކުރެއެވެ. ޕަކަރިނެން ބުނި ގޮތުގައި، ހޮހަޅަތަކަށް ވަންނަ މީހުންނަށް ސަލާމަތީ ވަަދު ނުވަތަ ލައިންއެއް ނެތި އެކަން ކުރުމަކީ ބުއްދިވެރި ކަމެއް ނޫންކަން އެނގޭނެއެވެ. ހިތާމައަކީ، ހޮހަޅަތަކުގައި ހިނގާ ގިނަ ހާދިސާތަކުގެ މައިގަނޑު ސަބަބަކީ އިންސާނީ ގޯސްތަކަށް ވުމެވެ.
އިތުރު ތަފުސީލު ދިނުމުގައި ޕަކަރިނެން ސަމާލުކަން ދިން ނަމަވެސް، އޭނާ ބުނީ އެމީހުންގެ އަތުގައި ހުރި ސާމާނަކީ އެންމެ އެކަށީގެންވާ ތަކެތި ނޫން ކަމަށާއި، އެމީހުން ބޭނުންކޮށްފައިވަނީ ހޮހަޅައަށް ޑައިވްކުރަން ހާއްސަ ގިއަރު ނޫން ކަމަށެވެ.
މި ހާދިސާގައި މަރުވި އިޓަލީގެ ދެ ޑައިވަރުން ކަމަށްވާ ޔުނިވަރސިޓީ އޮފް ޖެނޯއާގެ ޕްރޮފެސަރ މޮނިކާ މޮންޓެފަލްކޯން އާއި ރިސާޗް ފެލޯ މުރިއެލް އޮޑެނީނޯ ރާއްޖެ އައީ މޫސުމަށް އަންނަ ބަދަލުތަކުގެ ސަބަބުން ދިރޭތަކެތީގެ ނަސްލުތަކަށް ކުރާ އަސަރުތައް ދިރާސާކުރުމަށެވެ. މީގެ އިތުރުން ޕްރޮފެސަރ މޮންޓެފަލްކޯންގެ ދަރިފުޅު ޖޯޖިއާ ސޮމަކާލް އާއި ދާދި ފަހުން ގްރެޖުއޭޓްވި ފެޑެރީކޯ ގުއަލްޓިއޭރީ ވެސް މި ޓީމުގައި ހިމެނެއެވެ.
މި ހާދިސާގައި އެންމެ ފުރަތަމަ ފެނުނީ އުޅަނދު އޮޕަރޭޓްކުރުމުގައި އިސްކޮށް އުޅުނު ޑައިވިންގ އިންސްޓްރަކްޓަރ ޖިއަންލޫކާ ބެނެޑެޓީގެ ހަށިގަނޑެވެ.
މި މީހުން ވ. އަތޮޅަށް ޑައިވިނަށް ފޭބީ މެއި މަހުގެ 14 ވަނަ ދުވަހުއެވެ. އެމީހުން ގެއްލުނު ކަމަށް ރިޕޯޓްކުރީ ޑައިވް ނިންމާފައި އަނބުރާ މައްޗަށް ނޭރުމުންނެވެ. ފުލުހުން ބުނި ގޮތުގައި، މާލެއާ 100 ކިލޯމީޓަރު ދުރުގައި އޮތް އެ ސަރަހައްދުން އެމީހުން ގެއްލުނުއިރު މޫސުން ވަރަށް ގޯހެވެ. އަދި އެ ދުވަސްވަރު ދަތުރުވެރިންނަށާއި މަސްވެރިންނަށް މޫސުމާ ބެހޭ ރީނދުލުގެ ސަމާލުވެސް އޮތީ ނެރެފައެވެ.
ހަށިގަނޑުތައް ހޯދުމުގެ މަސައްކަތުގައި އުޅެނިކޮށް ނިޔާވި ދިވެހި ޑައިވަރަކީ ސްޓާފް ސާޖަންޓް މުހައްމަދު މަހުދީއެވެ. މަހުދީއަކީ ހޮނިހިރު ދުވަހު ހަށިގަނޑުތައް ހޯދުމަށް މަސައްކަތް ކުރި އަށް ޑައިވަރުންގެ ޓީމުގައި ހިމެނޭ މެންބަރެކެވެ. މަހުދީގެ ހަށިގަނޑު ފެނުނީ އޭނާއާއެކު އުޅުނު އެހެން ޑައިވަރުން އަލުން މޫދަށް ފައިބައިގެން ކުރި މަސައްކަތުންނެވެ. އޭރު އޭނާ އޮތީ ހަބަރު ހުސްވެފައެވެ.
މި ހިތާމަވެރި ހާދިސާ ހިނގަން މެދުވެރިވި ސަބަބު ދެނެގަތުމަށް ތަހުގީގު އަދިވެސް ދަނީ ކުރިއަށެވެ.
