ދުނިޔޭގެ ކަނޑުގެ ސަތަހައަށް ބަލާއިރު އެންމެ އުސް ހިސާބަކީ މައުންޓް އެވަރެސްޓް ކަމަށް ވީނަމަވެސް، ދުނިޔޭގެ މަރުކަޒުން ފެށިގެން ބަލާއިރު ފަޒާއާ އެންމެ ކައިރީގައި ވަނީ އެކުއެޑޯގައި ހުންނަ ފަރުބަދައެއް ކަމަށް ދިރާސާތަކުން ދައްކައިފިއެވެ.
ދާދިފަހުން ނެރުނު ރިޕޯޓުތަކުން ހާމަވާގޮތުގައި، ދުނިޔެއަކީ މުޅިން ބޯޅައެއް ފަދަ އެއްވަރަކަށް ގުރު ބުރަކަށް އޮންނަ އެއްޗެއް ނޫނެވެ. ދުނިޔޭގެ މެދުތެރެ ނުވަތަ އިކުއޭޓަރާ ހިސާބުން ދުނިޔެ ބޭރަށް ފުފިފައި އޮތުމުގެ ސަބަބުން، އެ ސަރަހައްދުގައި ހުންނަ އުސް ތަންތަން ދުނިޔޭގެ މަރުކަޒާ މާ ދުރެވެ. މިގޮތުން ބަލާއިރު، އެކުއެޑޯގައި ހުންނަ “މައުންޓް ޗިމްބޮރާޒޯ” ނަމަކަށް ކިޔާ އަލިފާން ފަރުބަދައިގެ އެންމެ މަތީ ހިސާބު ވަނީ މައުންޓް އެވަރެސްޓަށްވުރެ ބޮޑަށް ފަޒާއާ ގާތްވެފައެވެ.
ސައިންސްވެރިން ހާމަކުރާ ގޮތުގައި، މައުންޓް އެވަރެސްޓަކީ ކަނޑުގެ ސަތަހައިން ފެށިގެން ބަލާއިރު އެންމެ އުސް (8,848 މީޓަރު) ފަރުބަދައެވެ. ނަމަވެސް، ދުނިޔޭގެ މަރުކަޒުން ފެށިގެން ބޭރަށް ހުންނަ ދުރުމިނަށް ބަލާއިރު، ޗިމްބޮރާޒޯ ފަރުބަދަ ހުންނަނީ އެވަރެސްޓަށްވުރެ ގާތްގަނޑަކަށް 2،168 މީޓަރު އިތުރަށް ބޭރަށް ނުކުމެފައެވެ. މިއީ ދުނިޔޭގެ ބައްޓަން “އޮބްލޭޓް ސްފީރޮއިޑް” އެއްގެ ގޮތުގައި ހުރުމުގެ ސަބަބުން ދިމާވާ ކަމެކެވެ.
މި ހޯދުމުގެ ސަބަބުން ފަރުބަދަތަކުގެ އުސްމިން މިނުމުގައި ބޭނުންކުރާ މިންގަނޑުތަކަށް އާންމުންގެ ސަމާލުކަން ވަނީ ހުއްޓިފައެވެ. ކަނޑުގެ ސަތަހައިން ބަލާއިރު އެވަރެސްޓަކީ އެންމެ އުސް ތަން ކަމުގައި ވިޔަސް، ދުނިޔޭގެ މަރުކަޒުން ފެށިގެން ބަލާއިރު ނުވަތަ ފަޒާއާ އެންމެ ގާތް ބިމުގެ ގޮތުގައި ބަލާއިރު، އެ ޝަރަފު ލިބެނީ އެކުއެޑޯގެ މި ފަރުބަދައަށެވެ.
މިކަމުގެ ސަބަބުން ދުނިޔޭގެ އެކި ކަންކޮޅުތަކުން ފަރުބަދައަށް އަރާ މީހުންނާއި ސައިންސްވެރިންގެ މެދުގައި ޗިމްބޮރާޒޯ ފަރުބަދައަށް އޮތް ޝައުޤުވެރިކަން ވަނީ އިތުރުވެފައެވެ. އެއީ މިއީ ދުނިޔޭގެ ބިމުން ފަޒާއާ އެންމެ ކައިރިވެވޭނެ ހިސާބަށް ވާތީއެވެ.
