ހަކުރުބަލީގެ ދެވަނަ ބާވަތް (ޓައިޕް 2 ޑައިބެޓީޒް) ތަހައްމަލު ކުރަމުންދާ މީހުންނަށް އުފާވެރި ޚަބަރެއް ސައިންސްވެރިން ހާމަކޮށްފިއެވެ. ބައިނަލްއަޤްވާމީ ފެންވަރުގައި ކުރިއަށްގެންދިޔަ ބޮޑު ދިރާސާއަކުން ދައްކާގޮތުގައި، އަލަށް ތައާރަފުކުރާ މި ބޭސްގުޅައަކީ ލޭގައި ހަކުރު ހުންނަ މިންވަރު ދަށްކޮށްދިނުމުގެ އިތުރުން، ހަށިގަނޑުގެ ބަރުދަން ލުއިކުރުމަށްވެސް އާދަޔާޚިލާފު އެހީތެރިކަމެއް ފޯރުކޮށްދޭ ބޭހެކެވެ.
“އެމެރިކަން ޑައިބިޓީސް އެސޯސިއޭޝަން”ގެ ސައިންޓިފިކް ސެޝަންތަކުގައި ހުށަހެޅި މި ދިރާސާގެ ނަތީޖާތަކުން ދައްކާގޮތުގައި، “އެލެކޯގްލިޕްރޮން” ނަމަކަށް ކިޔާ މި ބޭހަކީ ދުވާލަކު އެއްފަހަރު ކާންޖެހޭ ގުޅައެކެވެ. މިއީ މިހާރު ހަކުރުބައްޔަށް ބޭނުންކުރާ އިންޖެކްޝަންތަކަށް ލިބުނު ވަރަށް ބޮޑު ކުރިއެރުމެކެވެ. މި ބޭހުގެ ސަބަބުން ގުދުރަތީ ހޯރމޯންތަކަށް ބާރުދީ، ބަނޑުހައިވުން ކުޑަކޮށްދީ، ލޭގެ ހަކުރު ކޮންޓްރޯލްކޮށްދެއެވެ.
“ސޮލްސްޓައިސް”ގެ ނަމުގައި އެސްޓްރާޒެނެކާ ކުންފުނިން އިސްނަގައިގެން ކުރިއަށްގެންދިޔަ މި ކްލިނިކަލް ޓްރަޔަލްގައި އެމެރިކާ ހިމެނޭހެން 9 ޤައުމަކުން 406 މީހުން ބައިވެރިވިއެވެ. 26 ހަފުތާގެ މުއްދަތަށް ކުރިއަށްގެންދިޔަ މި ދިރާސާއިން އެނގުނު ގޮތުގައި، ބޭސް ބޭނުންކުރި މީހުންގެ ތެރެއިން 89.6 އިންސައްތަ މީހުން ވަނީ ހަކުރުބަލީގެ މިންގަނޑު ކަމަށްވާ އެޗް.ބީ.އޭ.1.ސީ، 7 އިންސައްތައަށްވުރެ ދަށްކޮށްފައެވެ. އަދި މި ބޭސް ބޭނުންކުރި 72.3 އިންސައްތަ މީހުންގެ ބަރުދަނުން 5 އިންސައްތައަށްވުރެ ގިނައިން ލުއިވެފައިވާކަންވެސް ފާހަގަކުރެވުނެވެ.
މާސް ޖެނެރަލް ބްރިގަމްގެ ޑިރެކްޓަރ އޮފް ޑައިބިޓީސް ކްލިނިކަލް ރިސާޗް، ޑރ. އަރޯޑާ ވިދާޅުވި ގޮތުގައި، މި އާ ބޭހުގެ ސަބަބުން ހަކުރުބަލީގެ ފަރުވާއަށް ބޮޑު ބަދަލެއް އަންނާނެއެވެ. މިހާރު ބޭނުންކުރާ ގިނަ ބޭސްތަކަކީ އިންޖެކްޝަންގެ ގޮތުގައި ޖަހަންޖެހޭ ބޭސްތަކަކަށް ވުމުން، ބައެއް ބަލިމީހުންނަށް އެކަމުގައި ދަތިތަކާ ކުރިމަތިވެއެވެ. ނަމަވެސް، މި އާ ބޭސްގުޅައަކީ ފަސޭހައިން ބޭނުންކުރެވޭނެ، އެހާމެ ނަތީޖާ ރަނގަޅު ފަރުވާއެކެވެ.
މި ދިރާސާގެ ހޯދުންތައް މިހާރު ވަނީ މަޝްހޫރު ސައިންސް މަޖައްލާ “ދަ ލާންސެޓް” ގައި ޝާއިއުކޮށްފައެވެ. ކުރިއަށް އޮތް ތަނުގައި މި ބޭހާ ގުޅޭ އިތުރު ދިރާސާތައް ކާމިޔާބުވެއްޖެނަމަ، މިއީ މުޅި ދުނިޔޭގައި ހަކުރުބަލީގެ ފަރުވާ ހޯދާ މިލިއަނުން ގުނާލެވޭ މީހުންނަށް ލިބޭނެ ވަރަށް ބޮޑު ލުޔަކަށް ވެގެންދާނެއެވެ.
