“އިންތިޝާބް” (ހަދިޔާ)
“މި ވާހަކަ ހަދިޔާކުރަނީ، އެމީހެއްގެ ނަފްސުގެ ތެރޭގައި ‘ސަލްފައިޓް’ އެއް ފޮރުވިފައިވާ ކޮންމެ އިންސާނަކަށެވެ. އެ ސަލްފައިޓްގެ ސަބަބުން އޭނާ އަބަދު ނުތަނަވަސްކަމެއްގެ ތެރޭގައި ބަހައްޓައި، ފިކުރުތަކުގެ ވަލުތެރެއަށާއި ހަނަފަސް ސަހަރާތަކަށް އޭނާ މަގުއޮޅުވާލައެވެ. އެއީ ދުނިޔެއަށް އެ މީހަކު ފަހުމްނުވާ، އަދި އަމިއްލަ ވަކި ދުނިޔެއެއް ބިނާކޮށްގެން އުޅޭ މީހުންނަށެވެ.”
—
ޕޭޝް ލަފްޒް (މުސައްނިފުގެ ބަސް)
“ރޫހާން ޖަބީލް! ތިބާ ތިޔަ ދައްކަނީ ތިބާގެ ތަދުގެ ވާހަކަހެއްޔެވެ؟ އަހަރެން އުއްމުލް ހާނަމް ކަޅު އަނދިރި ރޭތަކުގައި ގަނޑުވެފައި ހުއްޓާ ދުށީމެވެ…”
“ސަލްފައިޓް” އަކީ އަހަރެން މިވަގުތު ލިޔަން ބޭނުންވި ނޮވެލްއެއް ނޫނެވެ. އަހަރެންނަށް ހީވެފައި އޮތީ “ސަލްފައިޓް” މި ލަފުޒުގެ މާނަ އެހާވެސް ފުންވެފައި ގިނަކަމުން، އެ މާނަ ބަޔާންކޮށްދިނުމަށް އަހަރެންނަށް އެތައް ޤަރުނެއް ބޭނުންވާނެ ކަމަށެވެ. ނަމަވެސް ކާއިނާތުގެ ޤާނޫނަކީ ކޮންމެ އެއްޗެއްވެސް އޭގެ ވަގުތު ޖެހުމުން އުފެދުމެވެ. އަދި ކޮންމެ ހާދިސާއެއްވެސް އޭގެ ވަގުތުގައި ހިނގުމެވެ. ކޮން އިރަކު، ކިހިނެއް، އަދި ކީއްވެގެންކަމެއް ނޭނގެއެވެ. ނަމަވެސް ހަ މަސް ދުވަހުގެ ބުރަ މަސައްކަތަށްފަހު “ސަލްފައިޓް” އުފަންވެއްޖެއެވެ. މިއީ ކީއްވެ ލިޔެވުނު އެއްޗެއް ހެއްޔެވެ؟ މި ސުވާލުގެ ޖަވާބު އޮތީ ޚުދު މި ނާވިލްގެ ތެރޭގައެވެ.
އެހެންނަމަވެސް، މި ވާހަކަ ލިޔުމުގެ އަސްލު ސަބަބަކީ މި އުންމަތުގެ ދެ އިއްޒަތްތެރި ޝަހުސިއްޔަތެކެވެ. އެއީ މާތްﷲ ގިނަގުނަ އިލްމު ދެއްވާފައިވާ އުސްތާޛު ޑރ. ޒާކިރު ނައިކް އަދި ހިދާޔަތުގެ މަގު އިޚްތިޔާރުކުރެއްވި ޖުނައިދު ޖަމްޝޭދެވެ.
ހަމައެފަދައިން، މި ނޮވެލްގެ ދެ މައިގަނޑު ކެރެކްޓަރަކީވެސް އަހަރެން ގަލަން ނަގަން މަޖުބޫރުކުރުވި ދެމީހުންނެވެ. އޭގެ ތެރެއިން އެކަކީ ސުވަރުގޭގެ މަގުމަތީގައި ހުރި އަނެކަކު ނަރަކައިގެ ފުން ވަޅުގަނޑަކަށް ވައްޓާލި މީހާއެވެ.
މިއީ ސޯޝަލް މީޑިއާގައި ލިޔެވުނު ނާވިލްއަކަށްވުމުން، މިއަށް ގިނަ ފާޑުކިޔުންތަކެއް އަމާޒުވިއެވެ. ބައެއް ފަހަރު މި ލިޔުން ހުއްޓާލަންވެސް ހިތަށް އެރިއެވެ. ނަމަވެސް ހަގީގަތަކީ “ސަލްފައިޓް” ލިޔަމުން ދިޔަ ދުވަސްވަރު އަހަރެން ލިޔަން ދަސްކުރި ކަމެވެ. މިއީ ﷲ ގެ އިރާދަފުޅެވެ. އެކަލާނގެއަށް ޝުކުރު ދަންނަވަނީ މި ވާހަކައަށް ލިބުނު ބޮޑު ތަރުހީބުގެ ސަބަބުންނެވެ.
މިއަދު އަހަރެންނަކީ “ސަލްފައިޓް” އެއްގެ ގޮތުގައި މަޝްހޫރުވެފައިވާ މީހެކެވެ. މިއީ މި ވާހަކަ ކިޔައި، މިއަށް ވިސްނި ކިޔުންތެރިންގެ ހިތްހެޔޮކަމެވެ. މި ނޮވެލްގައި ބަޔާންކޮށްފައިވާ ކަންކަމަކީ ގިނަ ބަޔަކަށް އެނގޭ ކަންކަމަށް ވެދާނެއެވެ. ނަމަވެސް އަހަރެން ފަދައިން ވަގުތާއެކު ކަންކަން ދަސްކުރާ މީހުންނަށް “ސަލްފައިޓް” އަކީ މުުޢުޖިޒާތަކަށްވުރެ ކުޑަ އެއްޗެއް ނޫނެވެ.
ތިޔަބޭފުޅުންގެ: ނޫރު ރާޖްޕުތު
ދުޢާގައި ހަނދާން ބަހައްޓަވާތި…
—
ސަލްފައިޓް – (ދިރިއުޅުމުގެ ހަތް މަރުހަލާގެ ވާހަކަ)
ލިޔުނީ: ނޫރު ރާޖްޕުތު
ވެހޭ ފޮދުތައް ބިމަށް އޮހިގަތުމުން ހިތަށް ބިރުވެރިކަން ވަދެއެވެ.
މޫސުމަށް އައި ބަދަލާއެކު މުޅި މާހައުލު ތަފާތުވެއްޖެއެވެ.
މި ވާރޭ ވިލާގަނޑަކީވެސް އަހަރެން ފަދަ ހިތާމަވެރި އެއްޗެކެވެ.
ކުޑަކޮށް އޮހިގަތުމާއެކު، ހުރިހާ ކަމެއް ބަދަލުކޮށްލައިފިއެވެ.
މަޑުމަޑުން ވެހެން ފެށި ވާރޭ ބޯކޮށްލުމުން، އޭލާ ސިހިފައި އެ “މޮޔަ” އަންހެން ކުއްޖާއާ ދިމާލަށް ބަލާލިއެވެ. އޭނާ ހުރީ ދެލޯ މަރާލައިގެން، ދެއަތް ދަމާލައިގެން، ލޯބީގެ ޝަހަރުގެ އެ އެންމެ ރީތި ބިނާގެ ކައިރީގައި ބިރުވެރިކަމެއް ނެތި އެނބުރި އެނބުރި އެވެ.
“މާހީ!”
އޭލާ ގޮވާލިއެވެ. އޭރު އޭނާ ދިޔައީ ދުނިޔޭގެ އެންމެ ރީތި ބިނާގެ ލަގަބު ލިބިފައިވާ އައިފަލް ޓަވަރުގެ ރީތިކަން އޭނާގެ ކެމެރާގެ ލެންސަށް ނަގަން މަސައްކަތް ކުރަމުންނެވެ.
“މާހީ، ދެން ހުއްޓާލާބަލަ. ކިހާ އިރަކު އިންތިޒާރު ކުރާނީ؟ ބަލާބަލަ ވާރޭ ބޯކުރަނީ، ދެން ދާން ހިނގާ…”
އޭލާ ދިޔައީ ކުރިމަތިވެދާނެ ނުރައްކަލަކަށް މާހީއަށް އިންޒާރު ދެމުންނެވެ. ނަމަވެސް މާހީ ހުރީ ހުރިހާ ކަމަކަށް ފަރުވާކުޑަކޮށް، ބޯކޮށް ވެހެމުންދިޔަ ވާރޭގެ އުފާ ހާސިލުކުރުމުގައެވެ. އޭލާ ކައިރިއަށް ގޮސް މާހީގެ ބޯމަތީގައި ކުޑަ ނެގިއެވެ. މޫނަށް ވާރޭ ނުވެހޭކަން އެނގުމުން މާހީ ދެލޯ ހުޅުވާލައި، މައްޗަށް ބަލާލުމަށްފަހު ކުޑަ ފެނުމުން ފޫހިވެފައި މޫނު ހަދާލިއެވެ.
“ދެން ހުއްޓާލާ މާހީ! މޮޔަވުމުގައިވެސް ހައްދެއް އޮންނަންވާނެ!” އޭލާ އޭނާއާ ދިމާލަށް އެއްޗެހި ކިޔެވެ.
“އޭލާ، މިއަދަކީ ނޮވެމްބަރު ދެވަނަ ދުވަސްކަން އެނގޭތަ؟ މިއީ އަހަރެންނަށް ވަރަށް ހާއްސަ ދުވަހެއް. މިއީ އެމީހަކާ އަހަރެން ފުރަތަމަ ފަހަރަށް މިތަނުން ދިމާވި ދުވަސް،” މާހީ ވަރަށް އަސަރާއެކު ބުންޏެވެ.
“އަދި ތިބާ މިދިޔަ ތިން އަހަރު މެދުކެނޑުމެއް ނެތި މިތަނަށް އެބަ އަންނަން. އެމީހާ ދެން ފެނުނުތަ؟” އޭލާ މާހީގެ އަތުގައި ހިފައި ހިނގައިގަންނަމުން ނުރުހުން ފާޅުކުރިއެވެ.
“މަޑުކޮށްބަލަ އޭލާ، އަދި ކިރިޔާ ހަވީރު ހަތަރެއް ޖެހީ. އަހަރެން ބޭނުމެއް ނޫން އޭނާގެ ހަނދާންތަކާ ދުރުވާކަށް. އޭނާ ބުނި އަހަރެންނާ އަލުން މިތަނުން ބައްދަލުވާނެ ކަމަށް.”
“މޮޔަ ނުވޭ މާހީ! ތިޔަ ދައްކާ ބޭކާރު ވާހަކަތަކެއް އަހަރެންނަކަށް ދެން ކެތެއް ނުކުރެވޭނެ!” އޭލާ ހަރުކަށި ރާގަކަށް ބުންޏެވެ.
ފިނި ވާރޭގެ ތެރޭގައި ތެމުމުގެ ސަބަބުން މާހީގެ ރީތި ފިޔާތޮށި ކުލައިގެ ތުންފަތް ވަނީ ނޫވެފައެވެ. ފިނީގެ ސަބަބުން މާހީ ތުރުތުރުލާކަން އޭލާއަށް އިހުސާސް ކުރެވުނެވެ. ކޮންމެއަކަސް މާހީ އެއްޗެކޭ ބުނަން އުޅުނެވެ. ނަމަވެސް އޭލާ އޭނާ ހުއްޓުވައި، އަތުގައި ހިފައިގެން ބާރަށް ކާރާ ދިމާލަށް ހިނގައިގަތެވެ. މާހީ ފަސް އެނބުރި އެ ބިނާއަށް ބަލާލިއެވެ. އޭނާގެ ދެލޮލުން ފެންނަނީ ޝަކުވާއެވެ.
“މިއަދުވެސް އޭނާ އެއް ނައި…” ދުރަށް ދާ ވަރަކަށް އޭނާއަށް ހީވަނީ ފަހަތަށް އެތައް ކަމެއް ދޫކޮށްލެވެނީ ހެންނެވެ. އޭނާގެ ހިތް ވަނީ މާޔޫސްވެފައެވެ. އެހާ ގިނަ އިރު އިންތިޒާރު ކުރުމަށްފަހުވެސް އެމީހަކު ފެންނަގޮތެއް ނުވިއެވެ.
ކާރަށް އެރުމަށްފަހު މާހީގެ ދެލޯ ކަރުނުން ފުރުނެވެ. “އެހެންވީމާ މިއީ ނިމުމަކީ، އަހަރެން އޭނާއަށްޓަކައި ދިގު އިންތިޒާރެއް ކުރަން ޖެހިއްޖެ،” އޭނާ ހިތާހިތުން ބުންޏެވެ. ކާރު ދުއްވާލުމުގެ ކުރިން އޭނާ ފަހު ފަހަރަށް ވާރޭގެ ތެރޭގައި ތެމެމުންދިޔަ އައިފަލް ޓަވަރަށް ބަލާލިއެވެ.
—
އެއީ ރޭގަނޑުގެ ދަންވަރުގެ ވަގުތެވެ. ފިނިހޫނުމިން ވަނީ ވަރަށް ދަށްވެފައެވެ. އަރާމު އެނދެއްގައި ނިދާފައި އޮތް މީހަކު ކުއްލިއަކަށް ސިހިފައި ހޭލެވުނެވެ. ދިރިއުޅުމުގައި ބައެއް ހާދިސާތަކަކީ އިންސާނާ ހައްޔަރުކޮށްލާ، ނަމަވެސް މަރުނުވެ ދިރިހުންނަ ހާދިސާތަކެވެ.
ލޭމްޕުގެ ފަނޑު އަލީގައި އޭނާގެ މޫނުމަތިން ދާތިކިތައް ފެންނަން ހުއްޓެވެ.
އޭނާގެ މޫނުމަތިން ފެންނަމުންދިޔައީ އިންތިހާ ދަރަޖައިގެ ވޭނާއި ތަދެވެ. ހަށިގަނޑަށް ހަމަޖެހުމެއް ލިބުމުގެ ބަދަލުގައި، އޭނާ ކުއްލިއަކަށް ކައިރީގައި ހުރި މޭޒުމަތީގައި ހުރި ލޭމްޕް ނަގައި ބިމަށް ޖަހާ ފުނޑުފުނޑުކޮށްލިއެވެ.
މުޅި ކޮޓަރިތެރޭގައި ގިސްލުމުގެ އަޑު ގުގުމަމުންދިޔައެވެ. އެ އަޑަކީ އޭނާގެ ރޫހު ކަނޑިއަކުން ކޮށާލާ ފަދަ ތަދެއް ދެމުންދިޔަ އަޑެކެވެ. އެންމެ ފަހުން އޭނާއަށް ކެތްނުކުރެވިގެން ހަޅޭއްލަވައިގަނތެވެ.
“ހުއްޓާލާ! ދެން ހުއްޓާލާ!”
އޭނާ ދެއަތުން ކަންފަތް ނިވާކޮށްލީ އެ އަޑުން ސަލާމަތްވުމަށެވެ. ނަމަވެސް އެ މީހަކު ހުރީ ހުއްޓާލާ ގޮތަކަށް ނޫނެވެ. މިއީ މިފަދަ ކަމެއް ހިނގި ފުރަތަމަ ފަހަރެއް ނޫނެވެ. ވޭތުވެދިޔަ ތިން އަހަރުގެ ތެރޭގައި އެންމެ ރެއެއްވެސް އެ އަޑާ ނުލައި ފާއިތުވެގެން ނުދެއެވެ. އޭނާއަށް ހަމަނިދި ލިބުމަކީ މުސްތަހީލު ކަމަކަށް ވެއްޖެއެވެ.
އޭނާ ކުއްލިއަކަށް ތެދުވެގެން ހިނގައިގަތީ، އޭނާގެ ހިތަށް ކުޑަވެސް ތަސައްލީއެއް ލިބޭނެ ހަމައެކަނި މީހާ ހުރި ކޮޓަރިއާ ދިމާލަށެވެ. އެ ކޮޓަރީގެ ދޮރުގައި ޓަކިޖަހާލިއެވެ. އޭނާއަށް އެނގެއެވެ، އެ ކޮޓަރީގައި އިންނެވި ބީބީޖާން (މާމަ ނުވަތަ މައިމީހާ) އިންނަވާނީ ހޭލައްވައެވެ.
“ވަދޭ.” އެތެރެއިން ޖަވާބު އައެވެ.
އޭނާ އަވަސްއަވަހަށް ދޮރު ހުޅުވާފައި ވަދެ، އެނދުމަތީގައި ސޫރަތުލް ޔާސީން ކިޔަވަން އިންނެވި ބީބީޖާންގެ އުނގުމަތީގައި ބޯއަޅާލިއެވެ. ބީބީޖާން ކިޔަވަން އިން ފޮތް ލައްޕަވާލެއްވުމަށްފަހު، އޭނާގެ ބޮލުގައި ފިރުމާލެއްވިއެވެ.
“ޝާހް ދަރިފުޅާ… ކިހިނެއްވީ؟ ހުރިހާ ކަމެއް ރަނގަޅުތަ؟” ބީބީޖާން ކަންބޮޑުވުމާއެކު އެއްސެވިއެވެ.
“ބީބީޖާން… އަހަރެން…” އޭނާގެ އަރުތެރޭގައި ބަސްތައް ތާށިވިއެވެ. އޭނާގެ ލޮލުން ކަރުނަ ފައިބަން ފެށިއެވެ.
“އަނެއްކާވެސް ބިރުވެރި ހުވަފެނެއް ފެނުނީތަ؟” ބީބީޖާން ލޯތްބާއެކު އެއްސެވިއެވެ.
“މީހަކު އެހާވަރަށް ރޮނީ ކީއްވެގެންތަ ބީބީޖާން؟ ކިހިނެއް އެހާ ގިނަ ކަރުނަ އަންނަނީ؟” އޭނާ ވޭނީ އަޑަކުން އެއްސެވިއެވެ. “ތިން އަހަރު ވެއްޖެ، އެންމެ ރެއަކުވެސް އެ އަޑު ކެނޑިގެން ނުދޭ. އޭނާ ވަރުބަލި ނުވަނީ ކީއްވެތަ؟”
ބީބީޖާން ފުން ނޭވާއެއް ދޫކޮށްލެއްވިއެވެ. “ދަރިފުޅާ، ތިބާ ދީފައިވާ ޒަޚަމް އެހާވެސް ފުންވެފައި ބޮޑީ. އެއީ ތިބާއަށް އިހުސާސްވެސް ނުކުރެވޭނެ ފަދަ ފުން ޒަޚަމެއް.”
އޭނާ އާދޭސްކުރިއެވެ. “އޭނާގެ ކައިރީގައި ބުނެދީބަލަ ބީބީޖާން، ހަނުހުންނަން. ﷲ އަށްޓަކައި ބުނެދީބަލަ ހުއްޓާލަން.”
ގިނައިރުތަކެއް ވަންދެން އެފަދަ ވާހަކަތައް ދެއްކުމަށްފަހު، ބީބީޖާންގެ އުނގުމަތީގައި އޮވެ އޭނާއަށް ނިދިއްޖެއެވެ.
—
ގެލެޓް ބާރޖެސް ދުނިޔޭގެ އިންސާނުން ދެ ބަޔަކަށް ބަހާލައެވެ. އެއީ “ބްރޯމައިޑް” އަދި “ސަލްފައިޓް” (ކައްސަނދުވާނި) އެވެ. ބްރޯމައިޑް އަކީ އާދައިގެ މީހުންނެވެ. އެމީހުންގެ ވިސްނުން ހުންނަނީ އެއްގޮތަކަށެވެ. ނަމަވެސް ސަލްފައިޓް އަކީ ހާއްސަ މީހުންނެވެ. އެއީ މަދުން ނޫނީ ނުފެންނަ ފަދަ ތަފާތު މީހުންނެވެ.
ކުލާސްރޫމް ތެރޭގައި ޓީޗަރުގެ އަޑު ގުގުމަމުންދިޔައެވެ. އެއީ ބީ.އެސް.ސީ ކުލާހެއްގެ އިނގިރޭސި ގަޑިއެވެ. އުއްމުލް ހާނަމް އިނީ ދެވަނަ ސަފުގައެވެ. އޭނާގެ ނަޒަރު ހުރީ ކުލާސްރޫމުން ބޭރަށް، އުޑުމަތީގައިވާ ބޯ ވިލާތަކަށެވެ.
އޭނާ ވިސްނަމުން ދިޔައީ ގޭގެ ފުރާޅާ ބެހޭގޮތުންނެވެ. “މަންމަ އިއްޔެ ބުނި ފުރާޅުގައި ޕެޗްއަޅަން ޖަހަން… އަހަރެން ހަނދާން ނެތުނީ. ވާރޭ ވެހެން ފަށައިފިއްޔާ މަންމައަށް ވަރަށް އުނދަގޫވާނެ…”
“މިސް އުއްމުލް ހާނަމް!” ޓީޗަރުގެ ހަރުކަށި އަޑާއެކު އޭނާ ސިހިފައި ތެދުވިއެވެ.
“ކޮބައިތަ ތިބާގެ ސަމާލުކަން؟” ޓީޗަރު ރުޅިއައިސްފައި އެއްސެވިއެވެ.
އޭނާއަށް ބުނާނެ އެއްޗެއް ނޭނގިފައި އިސްޖަހާލައިގެން ހުއްޓެވެ. ކުލާހުގެ އެހެން ކުދިންގެ މަލާމާތުގެ ހިނިތުންވުންތައް އޭނާއަށް އިހުސާސްވަމުންދިޔައެވެ. ޓީޗަރު އޭނާއަށް އިށީނުމަށް އެންގުމުން، މަޑުމަޑުން އިށީނެވެ. ސަލްފައިޓް އަކީ ކޮބައިކަމެއް އޭނާއަކަށް ނޭނގުނެވެ. އޭނާގެ މުޅި ފިކުރު ހުރީ ފުރާޅުން ލީކުވާ ފެންތިކިތައް ތަށިތަކަށް ވެއްޓޭއިރު އިވޭ އަޑަށެވެ.
—
ރެސްޓޯރެންޓެއްގެ މޭޒުމަތީގައި ހުރި ކޮފީތަށި ވަނީ ފިނިވެފައެވެ. އެތަނުގައި އިން އަންހެން ކުއްޖާ މޯބައިލުން ގަޑި ބަލާލުމަށްފަހު އަވަސްއަވަހަށް ތެދުވިއެވެ. މިއީ އޭނާގެ އާދައެވެ. ގަޑި އަތުގައި އޮތަސް، ވަގުތު ބަލާނީ ފޯނުންނެވެ.
އޭނާ ނުކުމެގެން ދިޔައިރު، ދުރުގައި އިން މީހަކު އޭނާއަށް ބަލަހައްޓައިގެން އިނެވެ. އެ މީހާގެ މޫނުގެ އެއްބައި އޮތީ ނިވާކުރެވިފައެވެ. އެ އަންހެން ކުއްޖާ ނުކުތުމާއެކު، އެ މީހާވެސް ތެދުވެ އޭނާގެ ފަހަތުން ހިނގައިގަތެވެ.
ގެއަށް ދެވުނުއިރު އުއްމުލް ހާނަމް ހުރީ މުޅިން ތެމިފައެވެ. އޭނާގެ މަންމަ އާސިޔާ ބޭގަމް ކަންބޮޑުވެފައި އެއްޗެހި ކިޔަން ފެށިއެވެ. “ދަރިފުޅާ، ކިތައް ފަހަރު ބުނެފިން ރިކްޝާ (ކްރޮޅި) އެއްގައި ގެއަށް އަންނަން؟”
“މަންމާ، ރިކްޝާ މީހާ މާ ގިނަ ފައިސާ ނަގާނެ. ފަސް މިނެޓުގެ މަގަކަށް އެހާ ގިނަ ލާރި ދޭކަށް އަހަރެން ބޭނުމެއް ނޫން،” އޭނާ ޖަވާބުދިނެވެ.
އޭނާގެ ކޮއްކޮމެން ކޮބައިތޯ އެހުމުން، މަންމަ ބުނީ އެކުދިން ތިބީ ފުރާޅުގައި ސިމެންތި އަޅަން ކަމަށެވެ. ބައްޕަގެ މުދަލުން ލިބެންޖެހޭ ފައިސާ ލިބުނުނަމަ ގެ މަރާމާތު ކުރެވުނީސް ކަމަށް މަންމަ ބުންޏެވެ.
އުއްމުލް ހާނަމްގެ ހިތަށް ޤުރުއާނުގެ އާޔަތެއް ސިފަވިއެވެ. ޔަތީމުންގެ މުދަލާ ބެހޭގޮތުން ސޫރަތުއް ނިސާގެ 2 ވަނަ އާޔަތެވެ.
وَآتُوا الْيَتَامَىٰ أَمْوَالَهُمْ ۖ وَلَا تَتَبَدَّلُوا الْخَبِيثَ بِالطَّيِّبِ ۖ وَلَا تَأْكُلُوا أَمْوَالَهُمْ إِلَىٰ أَمْوَالِكُمْ ۚ إِنَّهُ كَانَ حُوبًا كَبِيرًا
މާނައީ: “ޔަތީމުންނަށް (އެކުދިން ތަޞައްރަފު ފުދިއްޖެނަމަ) އެކުދިންގެ މުދާތައް ތިޔަބައިމީހުން ދޭށެވެ! އަދި، އޭގެތެރެއިން މޮޅުތަކެއްޗަށް ދެރަތަކެތި ބަދަލުކޮށް ނަހަދާށެވެ! އަދި، އެކުދިންގެ މުދާތައް، ތިޔަބައިމީހުންގެ މުދަލާއެކު ބޭނުންކޮށް، ކައި ނޫޅޭށެވެ! ހަމަކަށަވަރުން، ބޮޑުވެގެންވާ ފާފައެއް ކަމުގައި އެކަންތައްވިއެވެ.”
މީހުން ޤުރުއާން ކިޔެވި ނަމަވެސް އޭގެ މާނައަށް ނުވިސްނަނީ ކީއްވެބާއޭ އޭނާގެ ހިތަށް އެރިއެވެ. މުޖުތަމައުގެ ތެރޭގައި ޔަތީމުންގެ ހައްގުތަކަށް އަރައިގަތުމަކީ ވަރަށް ބޮޑު ފާފައެކެވެ.
އޭނާ ފިކުރުތަކުގެ ތެރޭގައި އިނދެ ކާން ފެށިއެވެ. ނަމަވެސް އޭނާގެ ހިތާއި ސިކުނޑި ވަނީ ނުތަނަވަސްކަމެއްގެ ތެރޭގައެވެ.
— ނުނިމޭ —
