ބޮލީވުޑްގެ މަޝްހޫރު އެކްޓަރު ވިކީ ކޯޝަލް، ސަންޖޭ ލީލާ ބަންސާލީގެ ކުރިއަށް އޮތް ފިލްމު ”ލަވް އެންޑް ވޯ“ އަށްޓަކައި އޭނާގެ ހަށިގަނޑަށް ގެނައި ފާހަގަކޮށްލެވޭ ބޮޑު ބަދަލާއެކު ގިނަ ބައެއްގެ ސަމާލުކަން ހޯދައިފިއެވެ. ރަންބީރު ކަޕޫރާއި އާލިއާ ބަޓް ވެސް މުހިންމު ރޯލުތަކުން ފެނިގެންދާ މި ފިލްމަށް ވިކީ ވަނީ ވަރަށް ބޮޑަށް ތައްޔާރުވެފައެވެ.
2026 ވަނަ އަހަރުގެ ޖުލައި މަހުގެ ކުރީކޮޅު ފެތުރުނު ރިޕޯޓްތަށް ބުނާ ގޮތުގައި، ފިލްމުގައި އޭނާ ކުޅޭ ކެރެކްޓާގެ އެކި މަރުހަލާތައް ދައްކުވައިދިނުމަށްޓަކައި ވިކީ ވަނީ ދެ މަރުހަލާއަކަށް ބެހިގެންވާ ހަރުކަށި ތަމްރީނުތަކެއް ފުރިހަމަކޮށްފައެވެ. އެގޮތުން، ފުރަތަމަ މަރުހަލާގައި ހަނގުރާމަވެރި ވަރުގަދަ ސިފައެއް ގެނައުމަށްޓަކައި އޭނާގެ ބަރުދަނަށް ގާތްގަނޑަކަށް 12 ކިލޯ އިތުރުކުރިއެވެ. އޭގެ ފަހުން، ހިކިކޮށް ހަށިގަނޑު ދައްކުވައިދިނުމަށްޓަކައި ކުރި މަސައްކަތުން ގާތްގަނޑަކަށް 15 ކިލޯ ލުއިކޮށްފައިވާ ކަމަށްވެއެވެ.
މި ބަދަލުތައް ގެނައުމަށްޓަކައި ކާނާގެ ކޮންޓްރޯލް ހިފެހެއްޓުމާއި، ހާއްސަ ތަމްރީނުތަކެއްގެ އިތުރުން ކަމާބެހޭ މާހިރުންގެ އިރުޝާދުގެ ދަށުން އެތައް މަހެއް ވަންދެން ވިކީ ވަނީ ބުރަ މަސައްކަތްތަކެއް ކޮށްފައެވެ. ”އުރީ: ދަ ސާޖިކަލް ސްޓްރައިކް“ އަދި ”ސަރުދާރު އުދަމް“ ފަދަ ފިލްމުތަކުން ފެނިގެންދިޔަ ފަދައިން، ވިކީއަކީ އޭނާ ކުޅޭ ކެރެކްޓާގެ ހަގީގީ ސިފަ ގެނައުމަށްޓަކައި ފަސްނުޖެހޭނެ އެކްޓަރެއްކަން މިފަހަރުވެސް އޭނާ ވަނީ ސާބިތުކޮށްދީފައެވެ.
މި ފިލްމަށް ވިކީއަށް 12 ކްރޯޑް ރުޕީސްގެ ފީއެއް ލިބޭ ކަމަށް ދެކެވޭ ވާހަކަތަކާ ގުޅިގެން ސޯޝަލް މީޑިއާގައި ގިނަ ބަޔަކު އަންނަނީ ބަހުސްކުރަމުންނެވެ. ގިނަ ބަޔަކު ބުނާ ގޮތުގައި އޭނާގެ މި ބުރަ މަސައްކަތާއި ކެރެކްޓާއަށް ބަހައްޓާ ފަރުވާތެރިކަމަށް ބަލާއިރު، މިއީ އޭނާއަށް ހައްގު މިންވަރެކެވެ.
ބަންސާލީގެ އާދަޔާ ހިލާފު ފުރިހަމަ އުފެއްދުންތެރިކަމާއި، ވަރުގަދަ ކާސްޓަކާއެކު އުފައްދާ ”ލަވް އެންޑް ވޯ“ އަކީ މިހާރުވެސް ބެލުންތެރިން އެންމެ އިންތިޒާރު ކުރަމުންދާ އެއް ފިލްމެވެ. ވިކީގެ މި ފާހަގަކޮށްލެވޭ ބަދަލާއެކު، ފިލްމަށް އޮތް ޝައުގުވެރިކަން ވަނީ އިތުރަށް ބޮޑުވެފައެވެ.
