ސްޕެއިންގެ ތަރި ލަމީން ޔަމާލް، އޭނާގެ ގައުމީ ޓީމު ވޯލްޑް ކަޕްގެ ފައިނަލަށް ދަތުރުކުރުމުގައި މުހިންމު ދައުރެއް އަދާކުރިތާ މާގިނަ އިރުތަކެއް ނުވަނީސް، ބާސެލޯނާގައި ހުންނަ އޭނާގެ ގެއަށް ވަގަށް ވަންނަން ބަޔަކު މަސައްކަތް ކޮށްފައިވާ ކަމަށް ފުލުހުންނާއި މީޑިއާތަކުން ރިޕޯޓްކޮށްފިއެވެ.
ކެޓަލޫނިއާގެ ސަރަހައްދީ ފުލުހުންގެ ތަރުޖަމާނަކު އޭއެފްޕީއަށް މައުލޫމާތު ދެއްވަމުން ވިދާޅުވީ، ބާސެލޯނާގެ އަވަށްޓެރި ސަރަހައްދެއް ކަމަށްވާ “އެސްޕްލޫގުއެސް ޑި ލޮބްރެގަޓް” ގައި ހުންނަ ގެއަކަށް ވަގަށް ވަނުމުގެ މައްސަލައެއް ހުށަހެޅިފައިވާ ކަމަށެވެ.
ޒާތީ މައުލޫމާތު ރައްކާތެރިކުރުމުގެ ގޮތުން ފުލުހުން އެއީ ކާކުގެ ގެއެއްކަން ހާމަކޮށްފައި ނުވިނަމަވެސް، ބާސެލޯނާގެ ދުވަހު ނޫހެއް ކަމަށްވާ “ލަ ވަންގާޑިއާ” އިން ރިޕޯޓްކޮށްފައިވާ ގޮތުގައި އެއީ ސްޕެއިންގެ އުމުރުން 19 އަހަރުގެ ފޯވާޑް ޔަމާލްގެ ގެއެވެ.
އެ ނޫހުން ބުނި ގޮތުގައި، މޫނު ނިވާކޮށްގެން ތިބި ދެ މީހަކު އެ ގޭގެ ފާރުމައްޗަށް އެރި ނަމަވެސް، އެ ގޭގެ ސެކިއުރިޓީ ބަލަހައްޓާ ގާޑުންނަށް އެ މީހުން ފެނުމުން ވަނީ ފިލާފައެވެ.
ޔަމާލް ދިރިއުޅޭ މި ގެއަކީ މީގެ ކުރިން ބާސެލޯނާގެ ކުރީގެ ތަރި ޖެރާޑް ޕީކޭ އާއި އޭނާގެ ކުރީގެ ބައިވެރިޔާ، ކޮލަމްބިއާގެ މަޝްހޫރު ލަވަކިޔުންތެރިޔާ ޝަކީރާ ދިރިއުޅުނު ގެ ކަމަށްވާތީ، މިއީ ގިނަ ބަޔަކަށް އެނގޭ މަޝްހޫރު ގެއެކެވެ.
މި ހާދިސާ ހިނގާފައިވަނީ ބުދަ ދުވަހުގެ ފަތިހުގެ ވަގުތެއްގައެވެ. އެއީ ޓެކްސަސްގައި ކުޅުނު މެޗުން ސްޕެއިން 2-0 އިން ފްރާންސް ބަލިކޮށް، ވޯލްޑް ކަޕް ފައިނަލަށް ދަތުރުކުރިތާ ކުޑަވަގުތުކޮޅެއްގެ ތެރޭގައެވެ. އެ މެޗުގައި ސްޕެއިންގެ ފުރަތަމަ ލަނޑު ޖެހުމަށް ލިބުނު ޕެނަލްޓީ ހޯދައިދިނީވެސް ޔަމާލްއެވެ.
ފަހަކަށް އައިސް ފުޓްބޯޅަ ތަރިންގެ ގެތަކަށް ވަގަށް ވަނުމުގެ ހާދިސާތައް ދަނީ އިތުރުވަމުންނެވެ. އެގޮތުން މެޑްރިޑްގައި ދިރިއުޅޭ ކަރީމް ބެންޒެމާ، ރޮޑްރީގޯ އަދި ޑެނީ ކަރްވަހާލް ފަދަ ކުޅުންތެރިންގެ ގެތަކަށްވެސް ފާއިތުވި އަހަރުތަކުގައި ވަގަށް ވަދެފައިވެއެވެ.
