– ސައި އަދި ކެޕްސޫލް ހިމެނޭހެން

ޗާޔާ (ނައިޑޮސްކޮލަސް އެކޮނިޓިފޯލިއަސް) އަކީ މެކްސިކޯ އާއި މެދުތެރޭ އެމެރިކާގެ ގައުމުތަކުގައި ކެއުމަށާއި ބޭސްވެރިކަމަށް ޒަމާނުއްސުރެ ބޭނުންކުރަމުން އަންނަ ފަތްޕިލާވެއްޔެކެވެ. “ގަހުގެ ފަތްޕިލާވެލި” (ޓްރީ ސްޕިނޭޗް) ގެ ނަމުން މަޝްހޫރުވެފައިވާ މި ގަހުގެ ފަތަކީ ކާނާގެ މުއްސަނދިކަމާއި، ސިއްހީ ގޮތުން ލިބޭ ގިނަގުނަ ފައިދާތަކުގެ ސަބަބުން ފާހަގަކޮށްލެވޭ އެއްޗެކެވެ. ހާއްސަކޮށް ހަކުރުބަލި ކޮންޓްރޯލްކުރުމަށާއި، ހަށިގަނޑުން ވިހަ މާއްދާތައް ބޭރުކުރުމަށާއި (އެންޓިއޮކްސިޑެންޓް)، ހަށިގަނޑުގެ ދުޅަހެޔޮކަން އިތުރުކުރުމަށް މިއީ ވަރަށް ފައިދާހުރި އެއްޗެކެވެ.

މި ފަތުން ސިއްހީ ފައިދާތައް ލިބުނު ނަމަވެސް، އޭގައި ހިމެނޭ “ސިއަނޯޖެނިކް ގްލައިކޯސައިޑްސް” ކިޔާ ވިހަ މާއްދާތައް ނައްތާލުމަށްޓަކައި، ކެއުމުގެ ކުރިން ރަނގަޅަށް ކައްކަން ޖެހެއެވެ. މި ފަތް ކައްކައިގެން ބޭނުންކުރުމަކީ އޭގެން ލިބޭ ކާނާގެ ފައިދާ އެންމެ ފުރިހަމައަށް ހަށިގަނޑަށް ލިބިދޭނެ ކަމެކެވެ.

ސިއްހީ ފައިދާތައް

ޗާޔާ ބޭނުންކުރުމުން ލިބޭ ސިއްހީ ފައިދާތަކުގެ ތެރޭގައި ހިމެނެނީ:

1- މުއްސަނދި ކާނާގެ މާއްދާތައް: ޗާޔާ ފަތަކީ ޕްރޮޓީން (18-25 އިންސައްތަ)، ކެލްސިއަމް، ދަގަނޑު އަދި ވިޓަމިން އޭ އިން މުއްސަނދި ފަތެކެވެ. މިއީ ލޮލުގެ ފެނުމާއި ދިފާއީ ނިޒާމު ވަރުގަދަކޮށްދޭ މާއްދާތަކެކެވެ.

2- ލޭގެ ހަކުރު ކޮންޓްރޯލްކުރުން: ހަކުރުބަލި މެނޭޖުކުރުމުގައި ޗާޔާގެ ބޭނުންތެރިކަން ދިރާސާތަކުން ވަނީ ދައްކާފައެވެ. މި ފަތުގެ އެކްސްޓްރެކްޓް ބޭނުންކުރުމުން ލޭގައި ހުންނަ ހަކުރާއި ކޮލެސްޓްރޯލްގެ މިންވަރު ބޮޑުތަނުން ދަށްކޮށްދެއެވެ.

3- އެންޓިއޮކްސިޑެންޓްގެ ސިފަތައް: މި ފަތުގައި ހިމެނޭ ފިނޮލިކް އަދި ފްލޭވަނޮއިޑް ފަދަ މާއްދާތަކުގެ ސަބަބުން ހަށިގަނޑުގެ ސެލްތައް ހަލާކުވުމުން ރައްކާތެރިކޮށްދީ، ބަލިތަކާ ދެކޮޅަށް މަސައްކަތް ކުރުމުގެ ބާރު އިތުރުކޮށްދެއެވެ.

4- ކޮލެސްޓްރޯލް ދަށްކުރުން: ލޭގެ ޖުމްލަ ކޮލެސްޓްރޯލް އާއި ނުރައްކާތެރި އެލް.ޑީ.އެލް ކޮލެސްޓްރޯލް ދަށްކުރުމަށް އެހީތެރިވެދޭތީ، ހިތުގެ ބަލިތަކުން ރައްކާތެރިވުމަށް މަގުފަހިވެއެވެ.

5- ދުޅަތަކާއި ތަދު ކަނޑުވައިދިނުން: ހަށިގަނޑުގެ އެކި ތަންތަން ދުޅަވުމާއި ތަދުވުމަށް ބޭނުންކުރާ ބައެއް ބޭސްތަކާ އެއްވަރުގެ ފައިދާއެއް ޗާޔާ ފަތުން ލިބޭކަން ވަނީ ހާމަވެފައެވެ.

6- ފުރަމޭގެ ދުޅަހެޔޮކަން: ފުރަމޭ (ލިވަރ) އަށް ލިބޭ ގެއްލުންތަކުން ރައްކާތެރިކޮށްދީ، ފުރަމޭގެ މަސައްކަތްތައް ރަނގަޅުކުރުމަށް އެހީތެރިވެދެއެވެ.

7- ގާތުންދޭ މައިންގެ ކިރު އިތުރުކޮށްދިނުން: ބައެއް ދިރާސާތަކުން ދައްކާގޮތުގައި ރަނގަޅަށް ކައްކައިގެން ޗާޔާ ބޭނުންކުރުމުން ގާތުންދޭ މައިންގެ ކިރު އިތުރުކޮށްދެއެވެ. ނަމަވެސް މާބަނޑު ދުވަސްވަރު މިއީ ކިހާ ރައްކާތެރި އެއްޗެއްކަން ކަށަވަރުކުރުމަށް އިތުރު ދިރާސާތައް ބޭނުންވެއެވެ.

ބޭނުންކުރާނެ ގޮތް

ވިހަ މާއްދާތައް ނައްތާލުމަށްޓަކައި ރަނގަޅަށް ތައްޔާރުކުރުމަށްފަހު، ތިރީގައިވާ ގޮތްތަކަށް ޗާޔާ ބޭނުންކުރެވިދާނެއެވެ:

1- ޗާޔާ ސައި: ތާޒާ ފަތް މަދުވެގެން 20 މިނެޓް ވަންދެން ކައްކައިގެން ސައި ތައްޔާރުކުރެވިދާނެއެވެ. ގަވާއިދުން މި ސައި ބުއިމަކީ ލޭގެ ހަކުރާއި ކޮލެސްޓްރޯލް ކޮންޓްރޯލްކުރުމަށް އެހީތެރިވެދޭނެ ކަމެކެވެ.

2- ކައްކައިގެން ކެއުން: ސްޕިނޭޗް ފަތް ކައްކާ ގޮތަށް، ޗާޔާ ފަތް މަދުވެގެން 20 މިނެޓް ވަންދެން ފެނުކައްކައިގެން ކެއުމުގައި ބޭނުންކުރެވިދާނެއެވެ.

3- ކެޕްސޫލް އަދި ސަޕްލިމަންޓް: ހިއްކާފައިވާ ފަތުން ތައްޔާރުކޮށްފައިވާ ކެޕްސޫލްގެ ގޮތުގައި ވެސް ޗާޔާ ލިބެން ހުރެއެވެ. މި ބޭނުންކުރާއިރު އޭގެ ފުޅީގައިވާ އިރުޝާދުތަކަށް ބަލައިގެން ބޭނުންކުރުން މުހިންމެވެ.

ސަމާލުކަންދޭންޖެހޭ ކަންތައްތައް

ޗާޔާ ފަތް ނުކައްކައި ނުވަތަ ރޮލާ ކެއުމަކީ ނުރައްކާތެރި ކަމެކެވެ. އޭގައި ހިމެނޭ “ސައިނައިޑް” ވިހަ މާއްދާ ނައްތާލުމަށްޓަކައި މަދުވެގެން 20 މިނެޓް ވަންދެން ކައްކަން ޖެހޭނެއެވެ. މާބަނޑު މީހުން ޗާޔާ ބޭނުންކުރުމުގެ ކުރިން ޑޮކްޓަރެއްގެ ލަފާ ހޯދުމަކީ މުހިންމު ކަމެކެވެ.

ނޯޓް: މިއީ ހަމައެކަނި މަޢުލޫމާތު ފޯރުކޮށްދިނުމަށް ލިޔެފައިވާ ލިޔުމެކެވެ. ސިއްހީ އެއްވެސް މައްސަލައެއްގައި ޑޮކްޓަރެއްގެ މަޝްވަރާ ހޯދުމަށް ސަމާލުކަން ދެއްވާށެވެ. އަދި މިހާރު ކުރަމުންދާ އެއްވެސް ފަރުވާއެއް ޑޮކްޓަރުގެ ލަފައާ ނުލައި މެދުކަނޑާނުލައްވާށެވެ.