“އިމޭޖިން ނޭޕާލް” އެކްސްޕެޑިޝަންގެ ހުރިހާ މެންބަރުންނާއި ޝާޕާ ގައިޑުން މި ފަރުބަދައިގެ ކޮޅަށް ވާސިލްވީ ޖުލައި 21 ވީ އަންގާރަ ދުވަހު، ޕާކިސްތާން ގަޑިން ހެނދުނު 10:00 ގައެވެ. މި ދަތުރުގައި ބައިވެރިވި ސިންގަޕޫރުގެ ފަރުބަދައަށް އަރާ މީހަކު ވަނީ، އެ ޤައުމުގެ މީހުންގެ ތެރެއިން މި ފަރުބަދައިގެ ކޮޅަށް ވާސިލްވި ފުރަތަމަ މީހާގެ ޝަރަފު ހޯދާފައެވެ.
އިމޭޖިން ނޭޕާލްގެ މެނޭޖިންގ ޑިރެކްޓަރ މިންގްމާ ޖީ މަޢުލޫމާތު ދެއްވި ގޮތުގައި، ސިމް ޕެއި ސަން އަކީ ދުނިޔޭގެ 13 ވަނައަށް އެންމެ އުސް މި ފަރުބަދައަށް އެރި ފުރަތަމަ ސިންގަޕޫރު މީހާއެވެ.
މީގެ އިތުރުން، މި ދަތުރުގައި ބައިވެރިވި އެހެން ބައެއް މެންބަރުން ވެސް ވަނީ ފާހަގަކޮށްލެވޭ ކާމިޔާބީތަކެއް ހޯދާފައެވެ. އެގޮތުން ފުރް ގަލްޖެން ޝާޕާ ވަނީ 8،000 މީޓަރަށްވުރެ އުސް 14 ފަރުބަދައިގެ ތެރެއިން 13 ވަނަ ފަރުބަދަ ފަތަހަކޮށްފައެވެ. އޭނާ ދެން މަސައްކަތް ކުރާނީ ގޭޝަރބްރަމް-1 އަށް އެރުމަށެވެ. މީގެ ކުރިން އޭނާ ވަނީ ޔަލުންގް ކަންގް (8،505 މީޓަރު) އަށް ވެސް އަރާފައެވެ.
ޗައިނާގެ ފަރުބަދައަށް އަރާ މީހެއް ކަމަށްވާ ވަންގް ޖޮންގް މިހާރު ވަނީ 8،000 މީޓަރަށްވުރެ އުސް 14 ފަރުބަދައިގެ ތެރެއިން 12 ފަރުބަދަ ފަތަހަކޮށްފައެވެ. އޭނާގެ މި ލިސްޓު ފުރިހަމަކުރުމަށް ދެން ބާކީ އޮތީ ބްރޯޑް ޕީކް އަދި ޝިޝަޕަންގްމާ އެވެ.
ޔޫކްރޭންގެ ވެލެންޓިން ސިޕަވިން ވަނީ މި އަހަރުގެ ބަހާރު މޫސުމުގައި އެވަރެސްޓަށް އެރުމަށްފަހު، މި ސީޒަނުގައި އެކަނިވެސް 8،000 މީޓަރަށްވުރެ އުސް ހަވަނަ ފަރުބަދަ ފަތަހަކޮށް، އާދަޔާ ޚިލާފު ހަލުވި މިނެއްގައި ކާމިޔާބީތައް ހޯދާފައެވެ.
އާންގްދޫ ޝާޕާ ތިންވަނަ ފަހަރަށް ގޭޝަރބްރަމް-2 އަށް އެރިއިރު، މީގެ ކުރިން ކޭ-2 އަށް ދެ ފަހަރު އަދި ބްރޯޑް ޕީކަށް އެރި ލަކްޕާ ނޫރޫ ޝާޕާ ވަނީ ޕާކިސްތާނުގައި ހުރި 8،000 މީޓަރަށްވުރެ އުސް ތިންވަނަ ފަރުބަދަ މި ދަތުރުގައި ފަތަހަކޮށްފައެވެ.
މިންގްމާ ޖީ ވިދާޅުވި ގޮތުގައި، މި ކާމިޔާބީއަކީ އެ ޓީމުގެ ބަދަހި މަސައްކަތާއި، އުސް ފަރުބަދަތަކަށް އެރުމުގައި ހުރި ހުނަރުވެރިކަން ހާމަކޮށްދޭ ކަމެކެވެ.
