ގޯލްޑަން މިލްކަކީ (ރީނދޫ ކިރަކީ) ސިއްހީ ގޮތުން ފައިދާހުރި، ހަށިގަނޑުގެ ދުޅަހެޔޮކަން އިތުރުކޮށްދޭ އަދި އިންފްލެމޭޝަން ނުވަތަ ދުޅަވުން ކުޑަކޮށްދޭ ވަރަށް މުހިންމު ބުއިމެކެވެ. މިއީ ތައްޔާރުކޮށްލަން ވަރަށް ފަސޭހަ ބުއިމެކެވެ. ރީނދޫ، ކިރު، މޭޕަލް ސިރަޕް، ފޮނިތޮށި އަދި ކުޑަ އަސޭމިރުސްކޮޅެއް އެއްކޮށްލުމަށްފަހު އުދުންމަތީގައި މަޑުގިނީގައި ކައްކާލުމުން މި ބުއިން ތައްޔާރުކުރެވޭނެއެވެ.

ގޯލްޑަން މިލްކަކީ ހަށިގަނޑުގެ ދުޅަވުން ކުޑަކޮށް، ހިތްހަމަޖެހުން ހޯދުމަށް ނިދުމުގެ ކުރިން ބޯލަން ވަރަށް ފުރިހަމަ ބުއިމެކެވެ. އަދި މީގެ ރަހަވެސް އެހާމެ މީރެވެ.

ގޯލްޑަން މިލްކް ތައްޔާރުކުރުމަށް ބޭނުންވާ ތަކެތި:

މި ބުއިމަކީ އިންޑިއާއަށް ކުރި ދަތުރެއްގައި އަޅުގަނޑަށް ފުރަތަމަ ފެނުނު، ތައްޔާރުކުރަން ފަސޭހަ އަދި ސިއްހީ ގޮތުން ގިނަގުނަ ފައިދާ އެކުލެވޭ ބުއިމެކެވެ. މިއީ ބޭނުންވާނެ ތަކެއްޗެވެ:

🥥 ކިރު: އަޅުގަނޑު ބޭނުންކުރަނީ ކާށިކިރެވެ. އޭގައި އެކުލެވޭ ފެޓްގެ ސަބަބުން ރީނދޫގައި ހުންނަ ސިއްހީ މާއްދާތައް ހަށިގަނޑަށް ނެގުމަށް އެހީތެރިވެދެއެވެ. އެހެންނަމަވެސް އާދައިގެ ކިރު، ބަދަން ކިރު (އާމަންޑް މިލްކް) ނުވަތަ އޯޓް މިލްކް ފަދަ ކޮންމެ ކިރެއްވެސް ބޭނުންކުރެވިދާނެއެވެ.

🌙 ރީނދޫ: ގިނަ ގޭގޭގައި ފަސޭހައިން ލިބެން ހުންނަ މުގުރި ރީނދޫ މި ރެސިޕީގައި ބޭނުންކުރެވިދާނެއެވެ.

🍛 މަސާލާ: ކުޑަ ފޮނިތޮށިކޮޅަކާއި އަސޭމިރުސް ކޮޅެއް ބޭނުންކުރާށެވެ. އަސޭމިރުހުގެ ސަބަބުން ރީނދޫގައި ހުންނަ “ކާކިއުމިން” މާއްދާގެ ބާރު އިތުރުކޮށްދެއެވެ. ބޭނުންނަމަ އިނގުރު ނުވަތަ ކާފޫރުތޮޅިވެސް ބޭނުންކުރެވިދާނެއެވެ.

🍯 ފޮނިކުރަން: މޭޕަލް ސިރަޕް ނުވަތަ މާމުއި ބޭނުންކުރެވިދާނެއެވެ.

އިތުރު އިރުޝާދެއް: ބަދަން ކިރު ބޭނުންކުރާނަމަ، ކުޑަ ކާށިތެޔޮ ފޮދެއް އެއްކޮށްލުމުން ރީނދޫގެ މާއްދާތައް ހަށިގަނޑަށް ދަމައިގަތުމަށް ފަސޭހަވެ، ބުއިން އިތުރަށް ފޮނުއަރުވައިދޭނެއެވެ.

ގޯލްޑަން މިލްކުން ލިބޭ ފައިދާތައް:

ރީނދުލަކީ އޭގެ ގުދުރަތީ ފަރުވާގެ ސަބަބުން މަގުބޫލު އެއްޗެކެވެ. ހާއްސަކޮށް “އޮޓޯއިމިއުން” ބަލިތައް ހުންނަ މީހުންނަށް، ރީނދޫގައި ހުންނަ އިންފްލެމޭޝަން ކުޑަކޮށްދޭ މާއްދާތަކުގެ ސަބަބުން ވަރަށް ބޮޑު ލުޔެއް ލިބެއެވެ. ރީނދޫގައި ހިމެނޭ “ކާކިއުމިން” އަކީ ހަށިގަނޑުގެ ދުޅަވުން ކޮންޓްރޯލްކޮށްދޭ މުހިންމު މާއްދާއެކެވެ.

މީގެ އިތުރުން ރީނދުލަކީ ވަރުގަދަ އެންޓިއޮކްސިޑެންޓެކެވެ. މިއީ މުސްކުޅިވުމުން ދުރުކޮށްދީ، ހަށިގަނޑުގެ ދިފާއީ ނިޒާމު ވަރުގަދަކޮށްދީ، އަރިދަފުސް ރޯގާ ފަދަ ބަލިތަކުން ރައްކާތެރިކޮށްދޭ އެއްޗެކެވެ.

ހަކީމީ އަދި ޗައިނާގެ ބޭސްވެރިކަމުގައި އެތައް ޒަމާނެއް ވަންދެން މި ބުއިން ބޭނުންކުރަމުން އައިސްފައިވެއެވެ. ނިދުމުގެ ކުރިން މި ބުއިން ބޭނުންކުރުމަކީ ހަށިގަނޑަށް އަރާމުލިބި، ރަނގަޅަށް ނިދުމަށް އެހީތެރިވެދޭނެ ކަމެކެވެ.

ތައްޔާރުކުރާނެ ގޮތް:

1- ތަވައަކަށް ހުރިހާ އެއްޗެއް އެޅުމަށްފަހު މެދުގިނީގައި ކައްކާށެވެ.

2- ރަނގަޅަށް އެއްކުރަމުން މަޑުގިނީގައި 10 މިނެޓު ވަންދެން ކައްކާށެވެ.

3- ކައްކާއިރު ރީނދޫ އަދި ފޮނިތޮށި ގަނޑުނުވާނެހެން ދޭތެރެދޭތެރެއިން ހަލުވަމުން ގެންދާށެވެ.

ރައްކާކުރާނެ ގޮތް:

މި ރެސިޕީން 2 ތަށި ތައްޔާރުކުރެވޭނެއެވެ. ގިނައިން ހަދައިގެން ބޭނުންކުރަން ބޭނުންނަމަ، ބަންދުކުރި ފުޅިއެއްގައި ފްރިޖްގައި 5 ދުވަސް ވަންދެން ބެހެއްޓޭނެއެވެ. ބޯން ބޭނުންވުމުން އުދުންމަތީގައި ނުވަތަ މައިކްރޯވޭވްގައި ހޫނުކޮށްލެވިދާނެއެވެ.