އިހުގެ ދިވެހީންގެ ކާނާގެ ބާވަތްތަކަށް ބަލާއިރު، ފިހުނު ބަނބުކޭލަކީދިވެހި ކެއުންތަކުގައި ވަރަށް މުހިންމު ދައުރެއް އަދާކުރާ އެއްޗެކެވެ. އޭގެ މީރު ރަހަޔާއި، ހަށިގަނޑަށް ފައިދާހުރި މާއްދާތަކުގެ ސަބަބުން މިއީ ދިވެހީންނާއި ޒިޔާރަތްކުރާ މެހެމާނުންގެ މެދުގައިވެސް ވަރަށް މަގުބޫލު ކެއުމެކެވެ. ނަމަވެސް، ފިހުނު ބަނބުކޭލަކީ ހަގީގަތުގައިވެސް ސިއްހަތަށް ފައިދާހުރި އެއްޗެއް ހެއްޔެވެ؟ މި އާރޓިކަލްގައި މި ބަލާލަނީ މި މީރު “ސުޕަރ ފުޑް” އިން ލިބިދޭ ސިއްހީ ފައިދާތަކަށެވެ.

ބަނބުކޭލަކީ ކޮބާ؟
ބަނބުކޭލަކީ (ސައިންޓިފިކް ނަމުން ނަމަ ‘އާރޓޯކާރޕަސް އަލްޓިލިސް’) ދެކުނު ޕެސިފިކް ސަރަހައްދަށް ނިސްބަތްވާ، ނަމަވެސް ދިވެހިރާއްޖޭގެ ރަށްތަކުގައި ވަރަށް ބޮޑަށް ހެދޭ މޭވާއެކެވެ. މިއަށް އިނގިރޭސިބަހުން “ބްރެޑްފްުރުޓް” ކިޔަނީ، މިއީ ރޯފިލުވައިގެން ކާއިރު އަލަށް ފިހެފައި ހުންނަ ފާރޮށި ނުވަތަ ޕާނާ އެއްގޮތް ރަހައެއް އަދި މަޑުކަމެއް ހުންނާތީއެވެ. ބަނބުކޭލަކީ ތަފާތު ގޮތްގޮތަށް ތައްޔާރުކުރެވޭ އެއްޗެކެވެ. އެގޮތުން ފިހެގެންނާއި، ތެލުލައިގެންނާއި، ކައްކައިގެން އަދި ފުށަށް ހަދައިގެންވެސް ބޭނުންކުރެއެވެ. މީގެ ތެރެއިންވެސް ފިހުނު ބަނބުކޭލަކީ އިހުގެ ދިވެހީންގެ މެދުގައި އެންމެ މަގުބޫލު އެއް ގޮތެވެ.

ބަނބުކޭލުގައި ހުންނަ ހަކަތައާއި ފައިދާ
ބަނބުކޭލަކީ ސިއްހަތަށް ފައިދާހުރި ކާނާއެއްގެ ގޮތުގައި ބެލެވެނީ އޭގައި ހިމެނޭ މުހިންމު މާއްދާތަކުގެ ސަބަބުންނެވެ. ފިހުނު ބަނބުކޭލުން ލިބޭ ބައެއް ފައިދާތަކަކީ:

🍈 ކާބޯހައިޑްރޭޓްސް: ހަށިގަނޑަށް ބޭނުންވާ ހަކަތަ ފޯރުކޮށްދެއެވެ.

🍈 ފައިބަރު: ހަޖަމުކުރުމުގެ ނިޒާމު ދުޅަހެޔޮކޮށްދީ ބަނޑުގެ މައްސަލަތަކުން ދުރުކޮށްދެއެވެ.

🍈 ވިޓަމިންސް އަދި މިނަރަލްސް: މީގައި ވިޓަމިން ސީ، ޕޮޓޭސިއަމް އަދި މެގްނީޒިއަމް ހިމެނެއެވެ. މިއީ ދިފާއީ ނިޒާމު ވަރުގަދަކުރުމަށާއި، ހިތުގެ ދުޅަހެޔޮކަމަށާއި ކަށިތައް ވަރުގަދަކުރުމަށް އެހީތެރިވެދޭ މާއްދާތަކެކެވެ.

🍈 ފެޓް މަދުވުން: މިއީ ތެލުލި ކާނާއާ އަޅާބަލާއިރު ސިއްހަތަށް ފައިދާހުރި ހޮވުމެކެވެ.

🍈 ގްލޫޓަން-ފްރީ: މިއީ ގްލޫޓަންއާ ނުގުޅޭ މީހުންނަށް ކެއުމަށް ވަރަށް ރަނގަޅު އެއްޗެކެވެ.

ފިހުނު ބަނބުކޭލުން ލިބޭ ސިއްހީ ފައިދާތައް

1- ހަޖަމުކުރުމުގެ ނިޒާމަށް އެހީތެރިވުން
ބަނބުކޭލުގައި ގިނަ އަދަދަކަށް ފައިބަރު ހިމެނޭތީ، މިއީ ހަޖަމުކުރުމުގެ ނިޒާމު ރަނގަޅުކޮށްދީ، ބަނޑު ފުއްޕުމާއި ބަނޑުހަރުވުން ފަދަ މައްސަލަތަކުން ރައްކާތެރިކޮށްދޭ އެއްޗެކެވެ.

2- ހަކަތަ އިތުރުކޮށްދިނުން
މީގައި ހިމެނޭ ކޮމްޕްލެކްސް ކާބޯހައިޑްރޭޓްސްގެ ސަބަބުން، ދުވަހުގެ މަސައްކަތްތަކަށް ބޭނުންވާ ހަކަތަ މެދުނުކެނޑި ހަށިގަނޑަށް ލިބިދެއެވެ.

3- ހިތުގެ ދުޅަހެޔޮކަން
ބަނބުކޭލުގައި ހުންނަ ޕޮޓޭސިއަމްއަކީ ލޭގެ ޕްރެޝަރު ކޮންޓްރޯލްކޮށް، ހިތުގެ މަސައްކަތްތައް ތަރުތީބުކުރުމަށް އެހީވާ މާއްދާއެކެވެ. އަދި އޭގައި ފެޓް މަދުވުމަކީ ކޮލެސްޓްރޯލް ދަށްކުރުމަށް އެހީވާ ކަމެކެވެ.

4- ބަރުދަން ކޮންޓްރޯލްކުރުން
ބަނބުކޭލަކީ ކެއުމުން ބަނޑު ފުރޭ އިހުސާސްކޮށްދޭ، އަދި ކެލޮަރީ މަދު އެއްޗަކަށް ވާތީ، މިއީ ބަރުދަން ލުއިކުރަން ބޭނުންވާ މީހުންނަށް ވަރަށް ރަނގަޅު ކެއުމެކެވެ.

ފިހުނު ބަނބުކޭލުގެ ރަހަ ބަލާލާނީ ކިހިނެއް؟
ރާއްޖޭގައި ފިހުނު ބަނބުކޭލާއެކު އާންމުކޮށް ކަނީ ކާށްޓާއި ހިކި މަހެވެ. މި ކެއުމުގެ އަސްލު ރަހަ ލިބޭނީ އަލިފާންގަނޑެއްގެ މަތީގައި، އޭގެ ބޭރު ތޮށިގަނޑު އަނދާލަންދެން ފިހެލުމުންނެވެ. އޭރުން އޭގެ އެތެރެ އޮންނާނީ ވަރަށް މަޑުކޮށް ކްރީމްގަނޑެއް ފަދައިންނެވެ. ފިހެ ނިމުމުން ފޮތިކޮށް ކޮށާލުމަށްފަހު، ކުޑަ ޒައިތޫނި ތެޔޮ ނުވަތަ ބަޓަރު އަދި ކުޑަ ލޮނުކޮޅެއް ބޭނުންކޮށްލުމުން ވަރަށް މީރުވާނެއެވެ. މި ބުނި އެއްޗެއްސާ އެއްކޮށްގެން ކެއުމަކީ އިހުގެ ދިވެހީން ދަންނަ ގޮތެއް ނޫންކަމަށްވެސް ވެދާނެއެވެ.

ވީމާ، ފިހުނު ބަނބުކޭލަކީ ސިއްހަތަށް ފައިދާހުރި އެއްޗެއް ހެއްޔެވެ؟ ޝައްކެއްވެސް ނެތެވެ! މިއީ ހަށިގަނޑަށް ބޭނުންވާ މުހިންމު މާއްދާތަކުން ފުރިގެންވާ، މީރު އަދި ސިއްހީ ގޮތުން ފައިދާހުރި ކެއުމެކެވެ. މިހާރުވެސް، ރަށްފުށުގެ ދިރިއުޅުމުގެ ތެރެއިން ފިހުނު ބަނބުކެޔޮ ކާން ލިބޭނެއެވެ. މާލެއިން ރަށަކަށް ދެވިއްޖެނަމަ ފިހުނު ބަނބުކޭލުގެ ރަހަބަލައިލުމަށް މާލޭ މީހުންނަށް ދަންނަވަމެވެ.